Read MAASAI REVISED PROTESTANT Yeremia 25 Bible Online

Yeremia 25 - MAASAI REVISED PROTESTANT bible

Yeremia 25

¹Eewuo ele rorei enetii Yeremia oipirta iltung'ana pooki le Yuda, tiatua olari liong'uan le Yehoiakim olayioni le Yosia, olaiguanani le Yuda (ilo apa olari le dukuya le Nebukadnesa olaiguanani le Babilon),

²laa ninye etolikio Yeremia oloiboni le Nkai iltung'ana pooki le Yuda o lelo pooki oomanya Yerusalem:

³“Too larin tikitam okuni, ebaiki olari le tomon ookuni le Yosia olayioni le Amon, olaiguanani le Yuda, ometabaiki ena olong, eewuo ororei lo Laitoriani enatii nanu, nairorie nanu intae akurraki, kake eitu intae ining'ining'i.

⁴Eitu ninye ining'ining'i neitu irrugugu nkiyiaa inyi aaning, hoo neirriwaka intae Olaitoriani akurraki sinkan lenyena, iloibonok, ejo,

⁵‘Embelekenyata taata, pooki ng'ae te intae, aing'uaa enkoitoi enye torrono o nkiaasin torrok, nibikibiki ti oriong ina kop apa naishoo Olaitoriani intae ebaiki apa o ntarasi;

⁶emipuo aasujaa kulie aitin aaisiaai niserememe ninche, aashu kintagorigoro nanu te siaai oo nkaik inyi. Nemaitaas nanu intae entorrono.’

⁷Kake ore eyia eitu intae kining'ining'i nanu, Olaitoriani ojo, pee kitumutumu intae aaitagoro nanu teina siaai oo nkaik inyi naar intae.

⁸“Neaku nji ejo Olaitoriani loo lororani: Ore te nkaraki neitu ining'ining'i irorei laainei,

⁹ng'ura, kairriu nanu lelo oshon pooki le moikuape, Olaitoriani ojo o Nebukadnesa olaiguanani le Babilon, osinka lai, naa kayau nanu ninche metaarare ena kop o lelo oomanya o lelo oreren pooki oomanita. Kaidakie nanu ninche katukul, naitaa ninche olkirutoto, o enkiputukuny o enkurruna oo ntarasi.

¹⁰Ore ake sii, kaiwuang'ie te ninche oltoilo le nkuenia o ltoilo le ng'ida, oltoilo lo loyamisho o ltoilo le nayami, enkiwutuwutore oo soito oo wutuwutishoreki o ewang'an o ltaa.

¹¹Ore ena kop pooki keaku emutata o enkidaata, naa keisiaai kuna kuapi olaiguanani le Babilon ilarin ntomoni naapishana.

¹²Ore pee elusoo ilarin ntomoni naapishana, naitame nanu olaiguanani le Babilon o ina kop oo Lkaldayo te nkaraki entorroni enye, Olaitoriani ojo, aitaa ina kop mitil intarasi.

¹³Kayau nanu shumata ina kop lelo rorei laainei pooki apa latejo nanu tialo ninche pooki toki naigero tiatua ena buku apa naibonoko Yeremia oloiboni le Nkai nkuapi pooki.

¹⁴Amu ore doi ninye nkuapi kumok o laiguanank kituaak naa keitaa ninche irrindiki; naa kalaaki nanu ninche te risioroto oo nkiaasin enye o siaatin oo nkaik enye.”

¹⁵Nji ejo Olaitoriani, Enkai e Israel: “Aatiaka ninye nanu, Iwa iyie te nkaina ai ena kikompe e naisho nabore ngoro ai, nincho nena kuapi pooki naairriwaki iyie metooko.

¹⁶Keok ninche nemera nerruoyo lukuny te nkaraki ilo alem lairriwaki nanu atua ninche.”

¹⁷Naya nanu ina kikompe te nkaina o Laitoriani, naisho nanu lelo oreren pooki laairriwaka Olaitoriani metooko:

¹⁸Yerusalem o nkanas e Yuda, ilaiguanak lenyena o lkituaak lenyena, pee eitaa ninche olmuaate, neitaa mitil o enkiputukuny o ldeket, anaa enatiu ena olong;

¹⁹Farao olaiguanani le Misiri o isinkan lenyena o lkituaak lenyena o ltung'ana lenyena pooki,

²⁰o lelo pooki omon ootii atua ninche; laiguanak pooki le nkop e Usi o laiguanak pooki le nkop e Filisti (Ashkelon o Gasa o Ekron o ilo pisiai le Ashdod),

²¹Edom o Moab o layiok le Amon;

²²o ilaiguanak pooki le Tiro o laiguanak pooki le Sidon o laiguanak lo lomanaa le naiposha;

²³o Dedan, Tema o Busi o pooki oo dung ilpijat loo lpapit lenye;

²⁴o ilaiguanak pooki le Arabia o laiguanak pooki loo loshon ooshula oomanya olpurkel;

²⁵o ilaiguanak pooki le Simri, ilaiguanak pooki le Elam o ilaiguanak pooki le Amedi;

²⁶ilaiguanak pooki le moikuape oolakua o lootaana, obo te siadi o likae o nena kitoriat pooki enkop naatii oriong enkop. Naa ore te siadi ninche neok sii ninye olaiguanani le Babilon.

²⁷“Nintoki iyie ajoki ninche, ‘Nji ejo Olaitoriani loo lororani, Enkai e Israel: Tooko, temerayu nilopisho, tabatatayu niming'il aekata adumunye, te nkaraki ilo alem lairriu nanu atua intae.’

²⁸“Naa teneany ninche eng'amu ina kikompe te nkaina ino aaok, nijoki iyie ninche, ‘Nji ejo Olaitoriani, loo lororani: Meeta nchere pee miokioko!

²⁹Amu ng'ura, kaiteru nanu aas entorroni too nkanas naaipotieki enkarna ai, naa eilo iyie mintamio? Milo iyie mintamio, amu aipotoko nanu olalem lelo pooki oomanya enkop, Olaitoriani loo lororani ojo.’

³⁰“Ore naa iyie, shomo imbonisho tigilunore ninche te kulo rorei pooki, nijoki ninche, ‘Keikurrukur Olaitoriani te shumata, tiatua ina manyisho sinyati neitayu oltoilo lenye; keikurrukur ninye te ngolon aarare iltung'ana lenyena, nebuaku, anaa iltung'ana ooitunyoo isabibu, te nkaraki lelo pooki oomanya enkop.

³¹Kelo enkorui e nkikurrukur ineeiting'ie enkop. Amu kegilunore Olaitoriani nkuapi; kejing ninye atua enkiguana tenebo pooki tung'ani ore ilo torrono nepik ninye enetii ilo alem, Olaitoriani ojo.’

³²“Nji ejo Olaitoriani loo lororani: ng'ura, kelotu entorroni aipang'u to lorere o to lorere, neyuko osiwuo sapuk oing'uaa imatuan naalakua e nkop.

³³“Ore lelo ootara Olaitoriani teina olong neponari ebaiki enkiting'oto nabo enkop ometabaiki enkae. Meishirakini ninche, aashu eiturrurrokinoi, aashu enukari; keaku ninche emodiei ti oriong enkop.

³⁴Enteyietu, intae ilairritak loo ntare, ninchirishiri, nimperiperara too nkurruon intae ilaitoriak loo ntare, amu ore nkolong'i eyiang'are inyi o sina linyi neetuo, naa ibatatata intae anaa ilmeregeshi gelunot.

³⁵Meetae esarunoto naitokini aata too luaat oo ntare, aashu eneisudoriyie ilaitoriak loo ntare.

³⁶Entoning, olkiyioi loo lairritak o eyiolounoto oo laitoriak lo lturrur! Amu einyalita Olaitoriani eneirritishoreki enye,

³⁷ore ilo turrur le seriani neitigiraki te nkaraki ina goro napi o Laitoriani.

³⁸Etung'uayie ninye orrumat linyi anaa olng'atuny, amu etaa enkop enye mitil te nkaraki ilo alem leilo oitorogonyisho o te nkaraki engoro enye napi.”