Read MAASAI REVISED PROTESTANT Yeremia 26 Bible Online

Yeremia 26 - MAASAI REVISED PROTESTANT bible

Yeremia 26

¹Ore te nkiterunoto e nkitoria e Yohoiakim olayioni le Yosia, olaiguanani le Yuda, ele rorei oewuo eing'uaa Olaitoriani ejo:

²“Nji ejo Olaitoriani: Ntasho to lgoriet le nkaji o Laitoriani nirorie nena anas pooki e Yuda naapuonu aaseremisho tiatua enkaji o Laitoriani. Toliki kulo rorei pooki laaitanap nanu iyie; mimbooyo ake ororei,

³keidimayu nening ninche; neibelekenya pooki ng'ae aing'uaa enkoitoi enye torrono, pee atum nanu aibelekenyayu teina torroni apa natonyorra ajo kaitaas ninche te nkaraki nkiaasin enye torrok.

⁴Tiaaki iyie ninche, ‘Nji ejo Olaitoriani: Tinimikining'ining'i intae nanu, pee ipuopuo te nkitanapata ai nairragie nanu te dukuya intae,

⁵nining'ining'i irorei loo sinkan laainei lelo oibonok le Nkai lairriwaka nanu intae te siokinoto, hoo neitu intae ining'ining'i,

⁶naitotiu nanu ena aji anaa Shilo, naa kaitaa sii ena anasa oldeket too loreren pooki le nkop.’ ”

⁷Etoning'o ilapolosak o loibonok o ltung'ana pooki Yeremia eirorita kulo rorei tiatua enkaji o Laitoriani.

⁸Ore ake pee eidip Yeremia airoro ina pooki naitanapa Olaitoriani ninye pee eirorie iltung'ana pooki, neibung ilapolosak ninye o loibonok, iltung'ana pooki ejoito, “Iye iyie!

⁹Kainyoo iyie pee imbonishe te nkarna o Laitoriani, ijo, ‘Keyooki ena aji atiu anaa Shilo ore ena anasa neaku olmuaate memanya toki’?” Ore iltung'ana pooki neiturrurrokino Yeremia tiatua enkaji o Laitoriani.

¹⁰Ore pee ening ilkituaak le Yuda kuna baa, nepuonu te nkaji o laiguanani enkaji o Laitoriani netoni te kishomi ng'ejuk eina aji o Laitoriani.

¹¹Nejoki ilapolosak o loibonok lelo kituaak o lelo tung'ana pooki, “Keishiaakino ele endung'okinoto e nkiguana e keeya, te nkaraki naibonoko te ntorroni ena anasa, anaa enitoning'o too nkiyiaa inyi.”

¹²Neitoki Yeremia airorie lelo kituaak pooki o ltung'ana pooki ejo, “Olaitoriani, laairriwua maibonoki entorroni ena aji o ena anasa lelo rorei pooki litoning'o.

¹³Ore naa taata entobira nkoitoi inyi o nkiaasin inyi, nining'ining'i oltoilo lo Laitoriani Enkai inyi, naa keirridu Olaitoriani teina torrono natudung'ie enkiguana tialo intae.

¹⁴Kake ore nanu, ng'ura atii atua nkaik inyi. Entaasaki nanu anaa enidolidolo aa sidai neishiaakino te intae.

¹⁵Entayiolo ake duoo intae te nkitisipata nchere te nikiariara nanu matua, niyauu osarge lemeeta entioto shumata intae maate o shumata ena anasa o lelo oomanya, amu ore te sipata o Laitoriani laairriwua nanu enitii pee airo kulo rorei pooki ootii nkiyiaa inyi.”

¹⁶Nejoki lelo kituaak o ltung'ana pooki lelo apolosak o loibonok, “Meishiaakino ele tung'ani endung'okinoto e nkiguana e keeya, amu eirorie ninye iyiook te nkarna o Laitoriani Enkai ang.”

¹⁷Neinyototo embata oo lpayiani leina kop neirorie ina umata pooki oo ltung'ana ejo,

¹⁸“Ore apa Mika le Moreshet neibonishe too nkolong'i e Hesekia olaiguanani le Yuda, nejoki iltung'ana pooki le Yuda: ‘Nji ejo Olaitoriani loo lororani, keturi Sion anaa enkurma neaku Yerusalem osototi loo suut, ore enkaji e Nkai neaku entim oo lkeek.’

¹⁹Ketaara ninye metua Sedekia olaiguanani le Yuda o Yuda pooki? Keitu ninye eureyu Olaitoriani nesayu esupatisho o Laitoriani, naa keitu ninye eirridu Olaitoriani teina torroni apa natudung'oko ninche? Kake etaa iyiook enikijo pee kiyau entorroni shumata ate.”

²⁰Etii sii likae tung'ani oibonishe te nkarna o Laitoriani, Uria olayioni le Shemia eing'uaa Kiriat-Yearim. Eibonuo entorroni tialo ena anasa o ena kop too rorei ooikununo anaa kulo le Yeremia.

²¹Ore ake pee ening olaiguanani Yehoiakim, tenebo enjore enye pooki o lkituaak pooki, irorei lenyena, neing'oru olaiguanani ajo aar ninye metua; kake ore ake pee ening Uria ina, neureishoyu neisik alo aisudori te Misiri.

²²Neirriwaa olaiguanani Yehoiakim kulikae tung'ana meshomo Misiri, Elnatan olayioni le Akbo o kulikae tenebo ninye,

²³neyau ninche Uria aaitung'uaa Misiri neyaki ninye olaiguanani Yehoiakim, laa ninye otaara ninye to lalem nenang'aki empopok enye atua ewueji e nkurare oo ltung'ana pooki.

²⁴Erripito apa Ahikam olayioni le Shafan Yeremia neaku eitu apa eisho iltung'ana metaara ninye metua.