Read MAASAI REVISED PROTESTANT Yeremia 28 Bible Online

Yeremia 28 - MAASAI REVISED PROTESTANT bible

Yeremia 28

¹Ore ake teilo ari, te nkiterunoto e nkitoria e Sedekia olaiguanani le Yuda, to lapa le imiet lo lari liong'uan naairorie nanu Hanania olayioni le Asuri, ilo oiboni oing'uaa Gibeon, tiatua enkaji o Laitoriani, te dukuya ilapolosak o ltung'ana pooki, ejo,

²“Nji ejo Olaitoriani loo lororani, Enkai e Israel: Atigila nanu ina golon o laiguanani le Babilon.

³Ore te rishata oo larin oaare naa kashuku nanu ayau ene wueji nena masaa pooki e nkaji o Laitoriani, apa naatanapa Nebukadnesa olaiguanani le Babilon aitung'uaa ene wueji neya Babilon.

⁴Kayau sii ashuku ene wueji Yekonia olayioni le Yehoiakim, olaiguanani le Yuda, o lelo yararot pooki ooing'uaa Yuda apa ooshomo Babilon, Olaitoriani ojo, amu kagil nanu enchata e murt o laiguanani le Babilon.”

⁵Neitoki oloiboni le Nkai oji Yeremia airorie Hanania ilo oiboni te dukuya ilapolosak o ltung'ana pooki apa ooitashe tiatua enkaji o Laitoriani;

⁶nejo oloiboni le Nkai oji Yeremia, “Eesai! Metaasa olaitoriani neijia; meitobira Olaitoriani lelo rorei limbonuo iyie metisipata, neshuku ayau ene wueji aitung'uaa Babilon nena masaa e nkaji Olaitoriani, o lelo yararot pooki.

⁷Ore eyia toning'o taata ele rorei lairo nanu ining'ito iyie nening'ito iltung'aa pooki.

⁸Ore apa iloibonok ooiturukutuo te dukuya iyie o nanu ebaiki apa neibonutuo olarrabal o lameyu o lmeitai tialo nkuapi kumok o nkitoriat kituaak.

⁹Ore oloiboni oibonu eseriani, ore ake pee ebaya ororei leilo oiboni, neyioulouni taa aajo kesipa Olaitoriani oiriwua ilo oiboni.”

¹⁰Neya ilo oiboni oji Hanania nena keek naatii emurt e Yeremia ilo oiboni le Nkai, negil ninche,

¹¹neiro Hanania te dukuya iltung'ana pooki, ejo, “Nji ejo Olaitoriani, kaiko nanu neijia agil enchata e murt e Nebukadnesa olaiguanani le Babilon aitayu te murt oo nkuapi pooki te rishata oo larin oaare.” Kake eshomo Yeremia oloiboni le Nkai enkoitoi enye.

¹²Ore te nkiti rishata eidipa oloiboni Hanania atigila nkeek aitayu te murt e Yeremia ilo oiboni le Nkai, nelotu ororei lo Laitoriani enetii Yeremia ejo:

¹³“Shomo, tiaaki Hanania, nji ejo Olaitoriani: itigila iyie nkeek, kake akaitobir nanu te rishata enye isekenke.

¹⁴Amu nji ejo Olaitoriani loo lororani, Enkai e Israel: Atipika nanu shumata emurt e kuna kuapi pooki esekenkei e sinkaisho te Nebukadnesa olaiguanani le Babilon, naa keisiaai ninche ninye, amu aishoo nanu ninye ebaiki ing'uesi e ong'ata.”

¹⁵Nejoki Yeremia ilo oiboni le Nkai ilo oiboni oji Hanania, “Toning'o Hanania: eitu iyie kirriu Olaitoriani ninchoo iyie kulo tung'ana meisiliga elejare.

¹⁶Neaku nji ejo Olaitoriani: ‘Ng'ura, kaaiwuang'ie nanu iyie ti oriong e nkop. Ore tele ari ake niye iyie, te nkaraki niroro inengolongu tialo Olaitoriani.’ ”

¹⁷Ore teilo ari ake, to lapa li opishana, neye oloiboni oji Hanania.