Read MAASAI REVISED PROTESTANT Yeremia 3 Bible Online

Yeremia 3 - MAASAI REVISED PROTESTANT bible

Yeremia 3

¹“Amaa tenearaa olee enkitok enye nelo ninye aing'uaa ninye neaku enkitok e likae lee, keitoki ilo apa lee ashukokino ninye? Aimeitarruoo ina enkop oleng? Itaa iyie emulayoi nitaboitare ilewa kumok naa aikintoki arrinyokino nanu? Olaitoriani ojo.

²Taraposhu nkonyek inono ing'ura nena kisiashat naaika, eitiaaji eitu kiboitareki iyie? Ore too mbat oo nkoitoi niton aanyu ilewa, anaa Emarabui ti ong'ota. Intarruoyie enkop ino teina mulayaisho ino.

³Ore te nkaraki ina eibooki oloirujuruj, ore enchan oo nkokua neitu elotu, kake ore eyia eton ake inkununo anaa e mulayioi itanya iyie ikurru.

⁴“Keitu iyie taata kimpot nanu ajo ‘Papa lai, ira iyie olchore eleleleroisho ai

⁵kegoro ninye ntarasi, kebikoo engoro enye o kenya? Ng'ura iroro iyie, kake itaasa iyie entorroni pooki naba anaa enindim.”

⁶Aatiaka nanu Olaitoriani too nkolong'i o laiguanani Yosia, “Itoduaa iyie ina nataasa ninye, ina nemeisiligayu Israel, ina nashomo ailep shumata endoinyo pooki naika o abori pooki shani onyori, ore teine neas anaa emulayoi?

⁷Najo apa nanu, ‘Ore pee eidip ataasa kuna pooki naashukokino nanu kake eitu ninye eshukunye,’ ore ina anashe enye nemeisiligayu Yuda nedol ina.

⁸Etoduaa nchere ore te nkiborra enye enkong'u nemeeta enkirukoto, Israel, nadung'oki nanu enkiguana eyararoto, ore eyia, ore ina anashe enye Yuda nemeisiligayu neitu eureishoyu, kake eshomo sii ninye aaku emulayoi.

⁹Ore te nkaraki naa kelelek enkiborra enkong'u te ninye, neitarruoyie ninye enkop, aloloito to soit o to lchani.

¹⁰Ore eyia te kuna pooki, ore ina anashe enye nemeisiligayu, Yuda, neitu eshukunye enatii nanu to ltau lenye pooki, kake te nkitaakuno, Olaitoriani ojo.”

¹¹Naajoki nanu Olaitoriani, “Ore Israel nemeisiligayu neitodolua kewan ajo aikiti enkitarruorroto enye alang Yuda nemeisiligayu.

¹²Shomo, ntudupai kulo rorei te nkalo e moikuape, ijo, ‘Tushukunye Israel nemeisiligayu, Olaitoriani ojo. Maaing'or nanu iyie te ngoro, amu kara ololng'ur, Olaitoriani ojo; magoro nanu ntarasi.

¹³Tonyorrai ake duoo iyie enkitarruoroto ino, nchere itogolong'aka Olaitoriani Enkai ino nindapashaa enyorrata ino tiatua ilomon tiabori pooki shani onyori, o ina neitu ining oltoilo lai, Olaitoriani ojo.

¹⁴“ ‘Entushukunye, intae nkera nemeeta enkirukoto, Olaitoriani ojo; amu ara nanu olkitok linyi; kaya nanu intae, obo aitung'uaa enkanasa oaare aitung'uaa olmarei, nayau nanu intae Sion.

¹⁵Naa kaisho nanu intae ilchekuti laaitiship oltau lai, ooitoti intae te ng'eno o te yiolounoto.

¹⁶Ore ake pee iponariri niakuku kumok teinakop, te nena olong'i, Olaitoriani ojo, nemeitoki ninche aajo, “Osanduku lo sotua lo Laitoriani.” Melotu ina damunoto, aashu eetayieki tipat, nemeitokini aaigil aaitayu.

¹⁷Ore teina kata Yerusalem neaku keji olorika le nkitoo lo Laitoriani, neitururrokino nkuapi pooki ninye, ine netii Olaitoriani te Yerusalem, nemeitoki aekata aasuj te ngolong'u enye o ltau lenye torrono.

¹⁸Ore te nena olong'i neibung'are enkaji e Yuda enkaji e Israel, ore tenebo nepuonu ninche aaing'uaa enkop e Moikuape aapuonu ina kop apa naishoo nanu loo papaai linyi metujung'o.

¹⁹“ ‘Atejo apa nanu kebaa ayieu nanu naapik atua ilaiyiok laainei, naaisho iyie enkop sidai, ina jung'ore nalang nkuapi pooki. Najo nanu eikijo iyie papa lai, nimimbelekenyanya te sujata ai.

²⁰Esipa ore anaa enaing'uaa enkitok nemeisiligayu olmoruo lenye, neijia sii iyie itotiwuo aaku misiligayu te nanu, iyie na aji e Israel, Olaitoriani ojo.’ ”

²¹Etoning'oki oltoilo le nena kisiashat naaika, lelo ayiok ooishirita nesaisho le Israel, te nkaraki natapong'o ninche enkoitoi enye etorikine ninche Olaitoriani enkai enye.

²²Entushukunye intae ilayiok lemeisiligayu kaishiunye nanu ina nimisiligayuyu intae kietuo iyiook enitii iyie, amu ira iyie Olaitoriani Enkai ang.

²³Metii eretoto eseremata too nchumat oo ldoinyo esipa atua Olaitoriani enkai ang etii enjeunoto e Israel.

²⁴“Kake ore ebaiki leleroisho ang neidaikie ina toki e nkurruna nena pooki naaisiaayutua loo papa, nkerrai enye o nchoo enye, ilayiok lenye o ntoyie enye.

²⁵Mairraga iyiook tiatua enkurruna ang nchoo esulare ang eitoip iyiook, amu kitaasa iyiook eng'oki to Laitoriani Enkai ang, iyiook o loo papa, ebaiki kitisho ang ometabaiki ena olong; neitu iyiook kining oltoilo lo Laitoriani Enkai ang.”