Read MAASAI REVISED PROTESTANT Yeremia 30 Bible Online

Yeremia 30 - MAASAI REVISED PROTESTANT bible

Yeremia 30

¹Ororei oewuo enetii Yeremia eing'uaa Olaitoriani ejo:

²“Nji ejo Olaitoriani, Enkai e Israel: Ngero tiatua embuku lelo rorei pooki laatiaaka iyie.

³Amu ng'ura, kepounu nkolong'i Olaitoriani ojo, pee arrinyu aitopok iltung'ana laainei, Israel o Yuda, Olaitoriani ojo, nayau nanu ninche ashuku meetu enkop apa naishoo loo menye, naa keya ninche ina kop.”

⁴Kulo rorei ninche eiroro Olaitoriani tialo Israel o Yudas:

⁵“Nji ejo Olaitoriani, kitoning'o iyiook enkishirata o enkirutoto enkuretisho, neme eseriani.

⁶Nkilikuanu taata pee idol, keidim olee atunutai neiu enkerai? Kainyoo naa pee adol pooki lee etii nkaik enyena mpolosi anaa enkitok nasaisai? Kainyoo pee eipusa[5] pooki ng'ae?

⁷Kelotu enkolong torrono oleng; meetae ae olong naitanyaanyukieki enkata o sina too ltung'ana kumok kake kekorduni ninye aaitayu teine.

⁸“Naa kelotu ina olong, Olaitoriani loo lororani ojo, nchere kagil nanu enchata emurt aitung'uaa imurto enye nalak nanu ienat enye, nemeigil aekata ilomon aaitaa ninche isinkan.

⁹Kake keisiaai ninche Olaitoriani Enkai enye o Daudi olaiguanani lenye laa ninye nanu aput te nkaraki ninche.

¹⁰“Miureishoyu naa, iyie Yakobo osinka lai, Olaitoriani ojo, aashu ing'aing'ai iyie Israel, amu itayiolo ajo kaaitajeu nanu iyie aitung'uaa enelakua naitajeu eishoi ino aitung'uaa enkop enye eyararoto. Keshukunye Yakobo netum enkitirring'ata o enkiyeng'iyeng, nemeitoki hoo ng'ae aiture ninye.

¹¹Amu atii nanu tenebo iyie pee aaitajeu iyie, Olaitoriani ojo: Kaiting'ie nanu iloshon pooki apa laidapashaka nanu intae, kake ore iyie maaiting'ie nanu iyie. Kaaitame nanu iyie te nkiririkinoto, nemaaing'uaa nanu hoo tiae oitoi mintamio.

¹²Amu nji ejo Olaitoriani: “Meishiunoyu olbae lino netarruoyie olbae lino.

¹³Metii hoo obo likinyor iyie meetae olchani to lbae lino meetae enkishuinoto te iyie.

¹⁴Aaikidamu lelo lewa mao linono pooki; mikishilaa ninche iyie amu aaikuna nanu anaa olmang'atinta enkitamioto o lmang'atinta lemeeta, olng'ur, amu eikitok enkitarruoroto ino te nkaraki natoponari ing'ok inono.

¹⁵Kainyoo iyie pee nchir te mion meishiunoyu emion ino. Amu eikitok entorroni ino, ore te nkaraki natoponari ing'ok inono, aaitaasa nanu iyie kuna baa.

¹⁶Neaku ore lelo pooki likimut iyie naa kemuti sii ninche, ore ilmang'ati linono pooki, pooki ng'ae te ninche naa kelo eyararoto; ore lelo pooki oorresh naitobiraki ninche orreshet.

¹⁷Amu kaarrinyoki nanu embiotisho, ore ilbaa linono naishiunye, Olaitoriani ojo, te nkaraki nikitejo ninche iyie, ‘Oloiturrayioki, Sion ina, nemeetae oloshilaa!’

¹⁸Nji ejo Olaitoriani: ng'ura, karriny nanu lelo ootarayioki too lng'oborri le Yakobo, naing'urrie emanyisho enye. Neitokini aashet nkanas too wuejitin apa neetelekutua neitashe enkaji enkitoo te wueji apake neitasheyie.

¹⁹Atua ninche epukunye isinkolioitin le nkishooroto e nashe o ltoiloishi le lelo ooshipa. Kaponaa nanu ninche nemeitoki ninche aaku kuti; kaisho nanu ninche meyanyituni nemeitoki aaku ooti.

²⁰Netiu inkera enye anaa enatiu apake ore olosho lenye neitasheyieki te dukuya nanu, naa kaitame nanu lelo pooki ooibooki ninche enkop.

²¹Ore olkitok lenye naa keaku obo lenye maate, ore olarikoni lenye naa kepuku tiatua ninche; kaisho nanu ninye metinyiku nayiaya ninye, amu kaing'ae laaitasim te kewan enye ayiaya nanu? Olaitoriani ojo.

²²Na iakuku intae iltung'ana laainei naaku nanu Enkai inyi.”

²³Ng'ura olkutati lo Laitoriani! Eipang'ua engoro enye napi, olkutati ogol kedanyakino ninye endukuya eilo torrono.

²⁴Merrinyo ina goro napi o Laitoriani, ometaba anaa nedung'oki enkiguana neitabaya iyieunot oltau lenye. Ore too nkolong'i e siadi naa ilo ayiolou ena.