Read MAASAI REVISED PROTESTANT Yeremia 31 Bible Online

Yeremia 31 - MAASAI REVISED PROTESTANT bible

Yeremia 31

¹“Ore kenya teina kata, Olaitoriani ojo, naa kaaku nanu Enkai oo lmareita pooki le Israel, neaku ninche ilaainei.”

²Nji ejo Olaitoriani: “Ore lelo tung'ana apa ootelekutua to lalem nenoto empiris ti ong'ata; ina kata apa eing'oru Israel enkiyeng'yeng.

³Eipang'aka Olaitoriani ninye tenelakua ajoki. Aatonyorra nanu iyie te nyorrata oo ntarasi. Neaku atobiko nanu aisiligayu te intae,

⁴ore ake sii kaashet iyie, naa eishetayu iyie Israel! Ore ake sii inkod iyie kewan too sekekuani naa ilo dukuya to sinkolio le lelo ooshipa.

⁵Ore ake sii naa iiun inkurman oo sabibu too nchumat oo ldoinyo le Samaria neunisho ilaunok neitumurru ilng'anayio.

⁶Amu kelotu kenya enkolong naipotisho ilarripok tiatua ina kop oo ldoinyo o Efraim. Tudumunye maape Sion enetii Olaitoriani Enkai ang.”

⁷Amu nji ejo Olaitoriani: “Entarany entabuaku te ng'ida te nkaraki Yakobo, niliepiepie mbuakunot too laiguanak loo loshon; embalie, ninchosho enkisisa, nijojo, ‘Eitajewuo Olaitoriani iltung'ana lenyena, ilo pisiai le Israel!’

⁸Ng'ura kayau nanu ninche aitung'uaa enkop e moikuape. Naiturrur ninche aitung'uaa ilubot enkop naalakua, ore tiatua ninche netii olmodooni o lmaima, o enkitok nairoshiwuo o enasaisai, tenebo; olturrur kitok, keshukunye ninche ene.

⁹Te nkishirata epuonu ninche naa te nkitigirata ariku nanu ninche ashuku, naisho nanu ninche meshomo too nchorroi oo nkariak, tiatua enkoitoi naitoriori nemerrorrore ninche. Amu ara nanu papaai te Israel, naa olkikau lai Efraim.

¹⁰“Entoning ororei lo Laitoriani intae iloreren nimbalunyenye ninye too loomanaa le naiposha oo lakua; entejo, ‘Ore ilo oidapasha Israel naa keiturrur ninye, naa keing'or ninye anaa enaing'or olairritani eluaata enye oo nkerra.’

¹¹Amu etalakua Olaitoriani Yakobo, nelaku ninye aitung'uaa nkaik naagol oleng te ninye.

¹²Kepuonu ninche aabuaku aaranyisho te nchumata oldoinyo le Sion, naa keaku keng'ida ninche teina supatisho o Laitoriani te nkurma, te naisho oo sabibu te ilata o to lkuo le luaata oo ntare o lashe loo nkishu; ketiu enkishui enye anaa enkurma natipikaki enkare, nemeitoki aekata aatum osina.

¹³Neranyisho taa ntoyie te ng'ida. Ore ilbarnot loo ltung'ana kituaak neshipayu kaibelekeny nanu enkishirata enye metaa eng'ida, kaitagol nanu ninche, naisho ninche eng'ida to sina.

¹⁴Kaisho osirua iltauja loo lapolosak te nkiputakinoto, neidipakino iltung'ana laainei te supatisho ai, Olaitoriani ojo.”

¹⁵Nji ejo Olaitoriani: “Etoning'oki oltoilo tiatua Rama, olkiyioi o enkishirata e mion. Eishirita Rahel te nkaraki nkera enyena, etanya ninye eitagoli too nkera enyena, amu meekure eetae.”

¹⁶Nji ejo Olaitoriani: “Torripo oltoilo lino pee minchir, o nkonyek inono too lkiyioi; amu kelaki esiaai ino, Olaitoriani ojo, naa keshukunye ninche aaing'uaa ina kop olmang'atinta.

¹⁷Etii osiligi too nkolong'i inono e dukuya, Olaitoriani ojo, naa keshukunye nkera inono aapuonu enkop enye maate.

¹⁸Atoning'o nanu Israel eishiraki kewan, ‘Kintamio apa nanu, nameyu nanu, anaa olashe lemeyiolo eenata; torrinyuoki nanu pee aatumi aaitopuaa, amu ira iyie Olaitoriani Enkai ai.

¹⁹Amu ore aidipa aibelekenyayu atapaashai nairridu ore aaidipaki aataarriyiana naosh enkupes ai, atukurrua nanu naanya sura te nkaraki nanapita esulare e kitisho ai.’

²⁰Kolayioni lai kirotet Efraim? Ke nkerai ai ninye nanyor? Amu ore anaake te nairo aarare ninye naa kadamu ake ninye. Neaku keng'uar oltau lai ninye; meeta nchere pee maing'urrie ninye, Olaitoriani ojo.

²¹“Tipikaki kewan enkoitoi ilmonek, ntobiraki kewan ilmonek likiutaa tadamu oleng ina oitoi kitok, ina oitoi apa naa ninye iima. Tushukunye, na selenkei e Israel tushukunye wou kuna anas inono.

²²Ing'aeng'ae kenya o anu iyie na selenkei nemeisiligayu? Amu eitayio Olaitoriani entoki ng'ejuk te nkop; enkitok namitu olee.”

²³Nji ejo Olaitoriani loo lororani, Enkai e Israel: “Keigil ake ninche aasishore kulo rorei tiatua enkop e Yuda o tiatua nkanas enyena te narriny nanu ninche enkop enye. ‘Mikitamayiana iyie Olaitoriani, iyie namanyisho e supatisho, iyie to ldoinyo sinyati!’

²⁴Nebik Yuda o nkanas enyena teine tenebo o laramatak o lelo oopuopuo tenebo nkerrai enye.

²⁵Amu kaitaraposh nanu ilo tau oshal ore pooki tau otashala naitagol.”

²⁶Naitoki nanu aputunye, naing'orisho naa eisidain njo aainei te nanu.

²⁷“Idol ajo, kepuonu nkolong'i Olaitoriani ojo, pee aun nanu enkaji e Israel o enkaji e Yuda tenebo olantererai lo ltung'ani o lantererai le ng'ues aitubul.

²⁸Naa kelotu enkata, ore anaa enaing'ura nanu ninche, pee adotu nanang'aa, nainyal nayau entorroni, neijia sii aiko aing'oru ninche pee ashet naun, Olaitoriani ojo.

²⁹Ore kenya te nena olong'i nemeigil aekata ninche aajo: ‘Einosa iloomenye ilng'anayio ooisuisho, nesirayu ilala loo nkera too mbat.’

³⁰Kake keye pooki ng'ae te ng'oki enye makewan; ore pooki lee onya isabibu ooisuisho nesirayu ilala lenyena too mbat.

³¹ “Ng'ura, kepounu nkolong'i, Olaitoriani ojo, pee aitobir nanu olning'o ng'ejuk tenebo enkaji e Israel o enkaji e Yuda,

³²nemeikununo anaa ilo apa ning'o lo sotua apa laitobira tenebo iloomenye ina kata apa pee aibung ninche enkaina aitayu ninche aitung'uaa enkop e Misiri, ilo ning'o lo sotua lai apa otigila hoo nara apa nanu olpayian lenye, Olaitoriani ojo.

³³Kake ore ele sotua laitobiru nanu tenebo enkaji e Israel te siadi nena olong'i, Olaitoriani ojo, kapik nanu e nkitanapata ai atua ninche nasir nanu too ltauja lenye; naa kaaku nanu Enkai enye neaku sii ninche iltung'ana laainei.

³⁴Nemeigil aekata oltung'ani aiteng'en olelatia enye o pooki ng'ae olalashe lenye, ejo, ‘Tayiolo Olaitoriani’; amu kaayiolou ninche pooki nanu, ebaiki oloti lenye ometabaiki olkitok, Olaitoriani ojo: amu kapalaki nanu entorroni enye, nemaitoki aekata nanu adamu eng'oki enye.”

³⁵Nji ejo Olaitoriani, ilo oishoru enkolong dama meitawang'isho o nkatitin olapa naaishiaakino o lakir ooitawang'isho te nkewarie, laa ninye oing'oling'ol enaiposha neaku keikurrukur ilopir lenyena Olaitoriani loo lororani ninye enkarna enye.

³⁶“Teneiwuang'a ena kitobirata apa naitoriokoki alo te dukuya nanu, Olaitoriani ojo, netum taa iishoritin e Israel aaishunye, meitoki aaku olosho te dukuya nanu ntarasi.”

³⁷Nji ejo Olaitoriani: “Tenaa keidimi naaji aatetem shumata keper, neyiolouni ilkitamanyunot le nkop tiabori, natum taa aiturrai iishoritin pooki e Israel te nena pooki naataasa, Olaitoriani ojo.”

³⁸“Ng'ura kepuonu nkolong'i, Olaitoriani ojo, pee eshetakini Olaitoriani enkanasa aaigil ebaiki oltalet le Hananel o metabaiki kishomi olpijata.

³⁹Ore olkereri otemieki neipang alo auluo oleng, neitoriori abaya oldoinyo le Gareb, neitoki taa arrinyo alo Goa.

⁴⁰Ore oyarata pooki loo lmeneng'a o nkuruon, o nkong'at pooki naalakua aabaya ereyiet e Kidron, ometabaiki olpijata le nkishomi oo mbartan te nkalo enkilepunoto enkolong naa keiteng'elakini Olaitoriani. Meigili aekata aadotu aashu eibelekenyi aanang'aa ntarasi.”