Read MAASAI REVISED PROTESTANT Yeremia 36 Bible Online

Yeremia 36 - MAASAI REVISED PROTESTANT bible

Yeremia 36

¹Ore to lari liong'uan le nkitoria e Yehoiakim olayioni le Yosia, olaiguanani le Yuda, eewuo ele rorei enetii Yeremia eing'uaa Olaitoriani ejo:

²“Iwa olpiyayati ninger tiatua ninye lelo rorei pooki laairorie iyie tialo Israel o Yuda o loreren pooki, ebaiki apa enkolong naairorie nanu iyie ebaiki nkolong'i e Yosia ometabaiki taata.

³Ekeidimayu pee ening enkaji e Yuda ina torroni pooki naitobirita pee aitaas nanu ninche, pee etum pooki ng'ae aibelekenyayu atung'uai enkoitoi enye torrono, natumoki nanu atapalaki entorroni enye o eng'oki enye.”

⁴Neitoki Yeremia aipot Baruk olayioni le Neria, nesir Baruk tiatua olpiyayati nena naalimu Yeremia, lelo rorei pooki lo Laitoriani oirorie Yeremia ninye.

⁵Neitanapa Yeremia Baruk, nejoki, “Aateenaki nanu pee malo enkaji o Laitoriani;

⁶metaa ilo iyie, ore te nkolong e dukuya ening'ito iltung'ana pooki tiatua enkaji e Nkai nisuma iyie irorei lo Laitoriani te ilo piyayati lingero le limunoto ai. Nilo sii aisum ninche metoning'o lelo tung'ana pooki le Yuda ootupukutuo aaing'uaa nkanas enye.

⁷Ekeidimayu pee elotu esayiare enye dukuya o laitoriani, neibelekenya pooki ng'ae aing'uaa enkoitoi enye torrono, amu eikitok engoro o engoro napi natudung'oko Olaitoriani kulo tung'ana.”

⁸Neaku etaasa Baruk olayioni le Neria nena pooki naaitanapa ninye oloiboni Yeremia nchere pee eisum to lpiyayati irorei lo Laitoriani tiatua enkaji o laitoriani.

⁹Ore to lari le miet le nkitoria e Yehoiakim olayioni le Yosia, olaiguanani le Yuda, to lapa lioudo, ore iltung'ana pooki ooing'uaa nkanas e Yuda nepuonu Yerusalem neibalunye eenata aaitupukoo ate te dukuya Olaitoriani.

¹⁰Ore ina kata ening'ito iltung'ana pooki, neisum Baruk irorei le Yeremia to lpiyayati, tiatua enkaji e Nkai, tiatua olgilata le Gemaria olayioni le Shefan ilo aigeroni, apa otii olgoriet le shumata, teine nejing'ieki kishomi ng'ejuk e nkaji o Laitoriani.

¹¹Ore ake pee ening Mikaia olayioni le Gemaria, olayioni le Shefan lelo rorei pooki lo Laitoriani eing'uaa olpiyayati,

¹²nedoyio ninye alo enkaji o laiguanani, atua olgilata lo laigeroni netonita apa lkituaak pooki teine. Elishama ilo aigeroni o Delaia olayioni le Shemaia o Enatan olayioni le Akber o Gemaria olayioni le Shafan o Sedekia olayioni le Hanania, olkituaak pooki.

¹³Neliki Mikaia ninche lelo rorei pooki ootoning'o ninye, ina kata pee eisum Baruk olpiyayati ening'ito iltung'ana.

¹⁴Neitoki lelo kituaak pooki aairriwaa Yehudi olayioni le Netania, olayioni le Shelemia, olayioni le kushi, metiaki Baruk, “Tudumu te nkaina ino ilo piyayati lisuma ening'ito iltung'ana nilotu.” Nedumu Baruk olayioni le Neria olpiyayati te nkaina enye nelotu enetii ninche.

¹⁵Nejoki ninche ninye, “Totona isuma.” Neisumaki Baruk ninche.

¹⁶Ore pee ening ninche irorei pooki, neibelekenyakino maate te nkuretisho; nejoki ninche Baruk, “Meeta nchere mikiliki olaiguanani kulo rorei pooki.”

¹⁷Neitoki ninche aaikilikuan Baruk ejo, “Toliki iyiook, kaji iyie nkunaka enkigeroto e kulo rorei pooki? Aitelimunoto apa e Yeremia?”

¹⁸Newaliki Baruk ninche, “Aatolikio ninye nanu kulo rorei pooki, ina kata apa aigerito nanu ninche to ranki to lpiyayati.”

¹⁹Neitoki lelo kituaak aajoki Baruk, “Shomo isudori, iyie o Yeremia niminchosho ake oltung'ani eyiolou enitii.”

²⁰Nepuo ninche atua olgoriet enetii. Eidipa aairragie ilo piyayati to lgilata le Elishama ilo aigeroni; neinosaki olaiguanani mbaa pooki.

²¹Neirriwaa olaiguanani Yehudi meyau olpiyayati, neya ninye aitung'uaa olgilata le Elishama ilo aigeroni; neisumaki Yehudi olaiguanani o lelo kituaak pooki apa ooitashe aatashare olaiguanani.

²²Olapa lioudo apa ina rishata, netonita apa olaiguanani tiatua enkaji enye natonie te rishata enkirobi netii enkima nayupuyupito dukuya ninye.

²³Ore ake pee eisum Yehudi imatuan uni, ong'uan, nedung olaiguanani te nkalem nenang'aki atua ina kima nayupuyup ometaba anaa nemut enkima nayupuyup ilo piyayati.

²⁴Ore eyia eitu eirut olaiguanani aashu lelo sinkan lenyena ootoning'o kulo rorei neitu epolos nkilani enye.

²⁵Ore ninye Elnatan o Delaia o Gemaria pee esai olaiguanani pee mepej olpiyayati, mening duoo ninye ninche.

²⁶Neitanap olaiguanani Yerameel olayioni lo laiguanani o Seraia olayioni le Asriel o Shelemia olayioni le Abdeel pee epuo aaibung Baruk ilo aigeroni o Yeremia oloiboni, kake eisudoyie Olaitoriani ninche.

²⁷Ore te siadi, eidipa olaiguanani atapejo olpiyayati tenebo lelo rorei ooigero Baruk te limunoto e Yeremia, nelotu ororei lo Laitoriani enetii Yeremia ejo:

²⁸“Iwa likae piyayati ninger lelo rorei apa pooki ootii olpiyayati le dukuya, otapejo Yehoiakim olaiguanani le Yuda.

²⁹Naa ore tialo Yehoiakim olaiguanani le Yuda tejo, ‘Nji ejo Olaitoriani, itapejo iyie ele piyayati, ijo: Kainyoo iyie pee ingero tiatua ninye nchere esipa kelotu olaiguanani le Babilon neinyal ena kop neishie tiatua ninye oltung'ani o eng'ues?

³⁰Neaku nji ejo Olaitoriani tialo Yehoiakim olaiguanani le Yuda, metum ninye hoo obo otonie olorika le nkitoo le Daudi, ore empopok enye naa kenang'ari nepej oldalati dama neinosie endeem kewarie.

³¹Naa kaitame nanu ninye o eishoi enye o sinkan lenyena te nkaraki entorroni enye; kayau nanu shumata ninche o shumata lelo oomanya Yerusalem o shumata ilewa le Yuda, ina torroni pooki natudung'oko nanu ninche, kake mening ninche.’ ”

³²Neitoki Yeremia adumu likae piyayati neisho Baruk ilo aigeroni, ayioni le Neria, laa ninye oigero te limunoto e Yeremia lelo rorei pooki lo lpiyayati otapejo Yehoiakim olaiguanani le Yuda te nkima; neponiki kulikae rorei laaijo lelo.