Read MAASAI REVISED PROTESTANT Yeremia 37 Bible Online

Yeremia 37 - MAASAI REVISED PROTESTANT bible

Yeremia 37

¹Ore Sedekia olayioni le Yosia, laa ninye eitaa Nebukadnesa olaiguanani le Yuda, neitoreisho te rishata e Konia olayioni le Yehoiakim.

²Kake eitu Sedekia aashu isinkan lenyena aashu iltung'ana leina kop ening lelo rorei lo Laitoriani ooiroro aimunye Yeremia oloiboni le Nkai.

³Neirriwaa olaiguanani Sedekia Yehukal olayioni le Shelemia o Sefania olapolosani, olayioni le Maaseia meshomo enetii Yeremia oloiboni le Nkai, ejo, “Toomonoki iyiook to Laitoriani Enkai ang.”

⁴Neton apa elo Yeremia aipang nejing'u tiatua iltung'ana, amu eton apa eitu epiki ninye jila.

⁵Neipang'ua apa enjore e Farao tiatua Misiri, ore ake pee ening lelo Kaldayo apa oomanita Yerusalem ilomon lenye, nepuo aaing'uaa Yerusalem.

⁶Neitoki ororei lo Laitoriani alotu enetii Yeremia oloiboni:

⁷“Nji ejo Olaitoriani, Enkai e Israel: Nji iyie tiaaki ilo aiguanani le Yuda likirriwua iyie enatii nanu pee kinkilikuanishore nanu, ‘Ng'ura, ore enjore e Farao duoo nikiewuo aretu iyie netaa keshuko alo Misiri, enkop enye makewan.

⁸Naa keshukunye Ilkaldayo aapuonu aarare ena anasa; keya ninche ninye nepejoo ninye te nkima.

⁹Nji ejo Olaitoriani, Emileja maate, ijojo: Kepuo Ilkaldayo aaing'uaa iyiook, amu mepuo ninche aaing'uaa iyiook.

¹⁰Amu ore naaji ninye te nimirimiri enjore pooki oo Lkaldayo oarare intae, neing'uari te ninche iltung'ana oata ilbaa ake, oltung'ani ake to lng'obor lenye, naa kedumunye ake ninche nepejoo ena anasa te nkima.’ ”

¹¹Ore ina kata pee eshuko enjore oo Lkaldayo aing'uaa Yerusalem etataana enjore e Farao,

¹²nelo Yeremia te Yerusalem alo enkop e Benchamen pee eng'amu erubata enye teine tiatua iltung'ana.

¹³Ore apa etii ninye enkishomi e Benchamen netii olkitok loo larripok oji Irija olayioni le Shelemia, olayioni le Hanania otimira aibung Yeremia oloiboni, ejo, “Isikaka iyie enkalo oo Lkaldayo.”

¹⁴Nejo Yeremia, “Elejare ina: maisik nanu alo enkalo oo Lkaldayo.” Kake mening Irija ninye, neibung Yeremia neyau ninye enetii ilkituaak.

¹⁵Netagorokinote apa oleng lelo kituaak Yeremia neidong ninche ninye neikenoo ninye tiatua enkaji e Yonatan olaigeroni, amu eitaaki apa jila.

¹⁶Ore apa ina kata pee elo Yeremia nena ajijik eenata naatii atua enkop, nebik teine nkolong'i kumok,

¹⁷neirriwaa olaiguanani Sedekia olkilikuai meyauni ninye, neng'amu ninye. Neikilikuanishore olaiguanani ninye too nkurrat tiatua enkaji enye, nejo, “Ketii ororei oing'uaa Olaitoriani?” Nejo Yeremia “Ketii” Neitoki ajo, “Eikiyauni iyie aapik atua nkaik olaiguanani le Babilon.”

¹⁸Neitoki sii Yeremia ajoki olaiguanani Sedekia, “Kaa torroni ataasa te iyie aashu too sinkan linono aashu te kulo tung'ana pee kitipika nanu jila?

¹⁹Koree lelo oibonok linono apa likimbonokito iyie, ejo, ‘Mikilotu olaiguanani le Babilon agilunore iyie nearare ena kop?’

²⁰Toning'o taata, aatoomono iyie, olkitok lai olaiguanani nchoo esayiata ai enkanyit elotu dukuya iyie, nimikingil nanu areu enkaji e Yonatan olaigeroni, maye ake nanu teine.”

²¹Neishooyo Sedekia nkitanapat, nepik ninche Yeremia enkaji erripore; neishori ninye emukate anaake eing'uaa enepejunyeki te nkoitoi, ometaba anaa neishunye imukateni eina anasa. Neaku etobiko apa Yeremia tiatua enkaji e rripore.