Read MAASAI REVISED PROTESTANT Yeremia 38 Bible Online

Yeremia 38 - MAASAI REVISED PROTESTANT bible

Yeremia 38

¹Ore apa Shefatia olayioni le Matan o Gedalia olayioni le Pashur olayioni le Malkia o Yukal olayioni le Shelemia nening lelo rorei apa oojoki Yeremia iltung'ana pooki,

²“Nji ejo Olaitoriani, ore ilo oton tena anasa neye to lalem o to lameyu o to lmeitai; kake ore ilo oipang alo Ilkaldayo nepok, netum ninye enkishui enye anaa enkishooroto to larrabal, nepok.

³Nji ejo Olaitoriani, Esipa keishoori ena anasa aapik atua enkaina e njore o laiguanani le Babilon neyai ninye.”

⁴Neitoki lelo kituaak aajoki olaiguanani, “Nchoo ele tung'ani metaari metua, amu eitashalita ninye nkaik e lelo sikarini oo tung'uayioki tiatua ena anasa o nkaik oo ltung'ana pooki, tena kiroroto nairorie ninye ninche kulo rorei. Amu ore ele tung'ani mme olmabarishoi le kulo tung'ana eing'oru, kake enkitamioto enye.”

⁵Nejo olaiguanani Sedekia, “Ng'ura ajo, etii ninye atua nkaik inyi; amu meidim olaiguanani ataasa ae toki napaashare intae.”

⁶Neaku etudumutua ninche Yeremia nesulaki ninye atua olchorro le Malkia olayioni lo laiguanani, apa otii atua olgoriet le rripore, eitadoyio Yeremia abori too lgoso. Nemetii apa enkare atua ilo shorro, kake esarng'ab ake, neimis Yeremia ti atua ina sarng'ab.

⁷Ore ake pee ening Ebed Melek ilo apa le Etiopia, ilo apa sunash ogelema kitok otii atua enkaji o laiguanani, nchere etipika ninche Yeremia atua olchorro. Netonita apa olaiguanani ti atua kishomi e Benchamen.

⁸Nelo Ebedmelek te nkaji o laiguanani nejoki olaiguanani,

⁹“Olkitok lai olaiguanani, etaasa kulo tung'ana entorroni teina pooki naitaasa ninche Yeremia oloiboni le Nkai te sulakinoto natusulakita ninye atua olchorro: naa keye ninye te sumash, amu meetae emukate natelekua tiatua ena anasa.”

¹⁰Neitoki olaiguanani aitanap Ebedmelek ilo apa le Etiopia ajoki, “Iwa iltung'ana okuni tene nipuopuo aailepunye Yeremia oloiboni le Nkai aaitayu ti atua olchorro eton eitu eye.”

¹¹Nerik Ebedmelek iltung'ana tenebo ninye enkaji o laiguanani, enetii osanduku loo nkilani teine neshumishoreki, neitayu ninye teine mpurdat o nkilani naatopolosate, apa naaitadoikio ninye Yeremia ti atua olchorro too lgoso.

¹²Nejoki Ebedmelek ilo le Etiopia Yeremia, “Tipika nena purdat oo nkilani nkitikit inono o lgoso.” Neiko neijia Yeremia.

¹³Neitayu ninche Yeremia aailepunye too lgoso neilepunye ninye aaitayu ti atua ilo shorro. Nebik Yeremia to lgoriet le rripore.

¹⁴Neirriwaa Sedekia olkilikuai meyauni Yeremia oloiboni le Nkai neng'amu ninye te nejing'ieki e uni e nkaji o Laitoriani. Nejoki olaiguanani Yeremia, “Kaaikilikuan nanu iyie enkikilikuanata; misudoo toki te nanu.”

¹⁵Nejoki Yeremia Sedekia, “Amaa te naaliki nanu, aimintisip iyie pee kiar nanu matua? Naa te naaisho iyie enkikoo nimikining iyie nanu.”

¹⁶Nenya olaiguanani Sedekia olmumai te nkisudoroto te Yeremia, “Anaa enaishu Olaitoriani, laa ninye oitayio iltauja lang, maar nanu iyie tua aashu aapik atua nkaik e kulo tung'ana ooing'oru enkishui ino.”

¹⁷Nejoki Yeremia Sedekia, “Nji ejo Olaitoriani, Enkai oo lororani, Enkai e Israel, te nintayu iyie kewan aishooyo too lkituaak lo laiguanani le Babilon, neitajeuni enkishui ino, nemepejori ena anasa te nkima, ore iyie o enkaji ino nipokipoko.

¹⁸Kake te nimintayu iyie kewan aishooyo too ilkituaak ooya lo laiguanani le Babilon, neishoori ena anasa aapik atua enkaina oo Lkaldayo, naa kepejoo ninche ninye te nkima, nimisik iyie apuku te nkaina enye.”

¹⁹Nejoki olaiguanani Sedekia Yeremia, “Kaure nanu lelo Yahudi apa ooshomo aajing atua Ilkaldayo, maapuoi ake aaitarasaki ninche naamor ninche.”

²⁰Nejoki Yeremia ninye, “Mikipuoi aishooyo te ninche, toning'o taata oltoilo lo Laitoriani teina naajoki nanu iyie, amu kelo asidanu te iyie, neitajeuni enkishui ino.

²¹Kake tiniany iyie intayu kewan aishooyo, ena duaata nanu aaitoduaa Olaitoriani:

²²Ng'ura, ore nkituaak apa pooki naatung'uayioki ti atua enkaji o laiguanani le Yuda netorikokoki ilkituaak lo laiguanani le Babilon nejoito ninche, ‘Ore ilchoreta linono apa lisilig nikiteleja iyie nikisulaa ninche iyie; ore taata eimiso nkejek inono ti atua esarng'ab kimbelekenyate ninche aing'uaa iyie.’

²³Ore nkituaak inono pooki o layiok linono naa keyookini aaipang'ie aarikoki ilkaldayo, ore iyie enkorrok ino nimijeu te nkaina enye, kake eikimbung olaiguanani le Babilon; ore ena anasa nepejori te nkima.”

²⁴Nejoki Sedekia Yeremia, “Mincho hoo oltung'ani eyiolou kulo rorei pee miye iyie.

²⁵Tenening ilkituaak nchere aairorie nanu iyie nepuonu enitii nikijoki iyie, ‘Toliki iyiook ina nitiaaka olaiguanani naa kaa kitiaka olaiguanani, misudoo hoo toki te iyiook amu mikiar iyiook iyie tua.’

²⁶Tiaaki iyie ninche, ‘Atasayia nanu olaiguanani te nkanyit pee maaigil ake areu enkaji e Yonatan mashomo aye teine.’ ”

²⁷Nepuonu ilkituaak pooki enetii Yeremia neikilikuan ninye, newaliki ninche anaa enatiaka ninye olaiguanani. Nepuo ninche aaing'uaa ninye, amu ore ina kiroroto neitu apa ening'i.

²⁸Nebik Yeremia te nkaji e rripore o metabau ina olong apa naawaki Yerusalem.