Read MAASAI REVISED PROTESTANT Yeremia 39 Bible Online

Yeremia 39 - MAASAI REVISED PROTESTANT bible

Yeremia 39

¹Ore to lari lioudo le nkitoria e Sedekia, olaiguanani le Yuda, to lapa le tomon, nelotu Nebukadnesa olaiguanani le Babilon o enjore enye pooki aarare Yerusalem nemuat aman ninye,

²ore to lari le tomon oobo le nkitoria e Sedekia, to lapa liong'uan, te nkolong e naaudo o lapa, negili isunta e nkang.

³Ore apa ina kata pee eyae Yerusalem, ore ilkituaak pooki lo laiguanani le Babilon nepuonu aatoni te kishomi empolos: Negal-Sharesa o Samgarebo o Sarsekim ilo apa kitok, tenebo lelo kulikae kituaak apa lo laiguanani le Babilon.

⁴Ore pee edol Sedekia olaiguanani le Yuda o sikarini pooki ninche, neisik ninche, nepuo auluo enkanasa te nkewarie aaim enkoitoi o enkurma o laiguanani aaim ina kishomi natii erishata oo sunta pokira are; nepuo ninche aaipir enkalo e Araba.

⁵Kake etusujaitie ninche enjore oo Lkaldayo, neinepu Sedekia too nkisiashat e Yeriko ore ake pee eibung ninche ninye, neyau ninche ninye enetii olaiguanani Nebukadnesa le Babilon, te Ribla, te nkop e Hamat; nedung'okini ninye enkiguana.

⁶Near olaiguanani le Babilon ilayiok le Sedekia te Ribla; metuata te dukuya nkonyek enyena; near olaiguanani le Babilon ilkituaak pooki le Yuda metuata.

⁷Naitayu ninye nkonyek e Sedekia, neyau ninye too lpisia pee eya ninye Babilon.

⁸Nepejoo Ilkaldayo enkaji o laiguanani o enkaji oo ltung'ana, neurori isunta e Yerusalem.

⁹Neitoki Nebusaradan, olkitok le rripore aya te yararoto meshomo Babilon lelo kulikae tung'ana ootelekutua tiatua ina anasa, lelo apa ooshomo enetii ninye o lelo tung'ana otung'uayioki.

¹⁰Neing'uaa Nebusaradan olkitok le rripore tiatua enkop e Yuda o embata oo ltung'ana aisinak lemeeta toki, neisho ninche nkurman oo sabibu o nkurman teina kata ake.

¹¹Neishooyo Nebukadnesa olaiguanani le Babilon enkitanapata ti alo Yeremia eimaa Nebusaradan, ilo kitok le rripore ejo,

¹²“Ewaita ninye eng'ura ninye oleng nimintaasiasa ake entorrono, kake entaasa ninye anaa enajoki intae.”

¹³Ore Nebusaradan ilo kitok le rripore, neirriwaa olkilikuai o Nebusaradan o Rabsaris o Negal Saresa o Rabmag o lkituaak pooki lo laiguanani le Babilon.

¹⁴Neirriwaa ninche olkilikuai, neitayu Yeremia tiatua olgoriet le rripore. Neisho ninche ninye Gedalia olayioni le Ahikam, olayioni le Shefan, nchere pee erik ninye ang. Neaku etotona ninye tiatua iltung'ana.

¹⁵Eewuo apa ororei lo Laitoriani enetii Yeremia ina kata apa eikenoro to lgoriet le rripore ejo.

¹⁶“Shomo naa tiaaki Ebedmelek ilo le Etiopia, ‘Nji ejo Olaitoriani loo lororani, Enkai e Israel: ng'ura kaitabaya nanu irorei laainei tialo ena anasa te ntorroni neme te sidai, naa keitabari kenya te dukuya iyie teina olong.

¹⁷Kake kaakordu kenya nanu iyie teina olong, Olaitoriani ojo, nimikinchoori iyie aapik atua enkaina e lelo tung'ana liure.

¹⁸Amu kesipa kaaitajeu nanu iyie, nimibatata iyie to lalem, kake itum iyie enkishui ino anaa enkishooroto o larrabal, te nkaraki nitipika osiligi lino atua nanu, Olaitoriani ojo.’ ”