Read MAASAI REVISED PROTESTANT Yeremia 4 Bible Online

Yeremia 4 - MAASAI REVISED PROTESTANT bible

Yeremia 4

¹“Tinirrinyunye iyie, Israel, Olaitoriani ojo, naa nanu irrinyokino. Tiniwuang'ie iyie ilo minong lino, aitung'uaa enatii, nimintoki aing'aing'ai,

²Naa tininya iyie olmumai, ‘Anaa enaishu Olaitoriani,’ tiatua esipata, tiatua enkitorisiokinoto o tiatua enkitorioroto, naa kemayian nkuapi ate te ninye, naa te ninye ewuasa ninche.”

³Amu nji ejoki Olaitoriani iltung'ana le Yuda o lelo oomanya Yerusalem: “Entutur nena kurman inyi nemeturo nimiunishosho tiatua ilkiku.

⁴Entumurataki ate Olaitoriani ewuang'ie isuaaten oo ltauja linyi, intae iltung'ana le Yuda o lelo oomanya Yerusalem; mepuku ake engoro ai anaa enkima, neyupuyup nemeeta hoo aetoki narr te nkaraki entorroni oo nkiaasin inyi.”

⁵Embalie tiatua Yuda, nintudupaa tiatua Yerusalem, nijojo, “Toosho esekekua tiatua enkop pooki; nchira tabuaku nijo, ‘Enturrurroto, maape iyiook atua nena ang'itie naasheta sunta!’

⁶Tudumu enanka ing'orie enkalo e Sion. Isika ing'oru eseriani, miton ake amu kayau nanu entorroni aitung'uaa enkalo e moikuape o enkidaata kitok.

⁷Eilepa olng'atuny alo to sanag lenye, etii ilo oidakie nkuapi enkoitoi enye eshomo ninye teine wueji enye pee eitaa enkop ino mitil; neidaikieki inkanas inyi metaa meetae olomanya.

⁸Neaku terretena kewan too lkuniyiani te nkaraki osina nchira niyietu; amu ina goro napi o Laitoriani neitu eibelekenya aing'uaa iyiook.”

⁹“Ore kenya teina olong, Olaitoriani ojo, naa keing'uaa empijan olaiguanani o lkituaak; neiputukuny ilapolosak neing'asia iloibonok.”

¹⁰Naitoki nanu ajo, “Ee Olaitoriani Enkai, esipa iteleja apa iyie kulo tung'ana o Yerusalem, ijo, ‘Kesidanu te intae,’ aa olalem otabaikia enkishui enye katukul.”

¹¹Ore kenya teina kata nejokini kulo tung'ana o Yerusalem, “Osiwuo oirowua oing'uaa inkisiashat naaika to lpurkel eing'or enkalo oo ltung'ana laainei neme pee ekut aashu esil.

¹²Ore ilo siwuo olotu te nkitanapata ai naa kegol oleng te nanu. Naa Nanu ilo oiro tendung'okinoto e nkiguana enye.”

¹³Ng'ura, elotu olmang'atinta ailepu anaa nkatampo, neikununo ngarrin enyena oo mbartan anaa olkutati, neneneng mbartan enyena aalang ilkurragoso - oi iyiook, amu kindaaitie!

¹⁴Iyie Yerusalem, ntukuoi entorroni to ltau lino, pee kitumi aaitajeu. Keton kenya endamunoto ino torrono tiatua iyie o anu?

¹⁵Amu eibalunye oltoilo oing'uaa Dan neitudupaa entorroni ebaiki oldoinyo le Efraim.

¹⁶Enkoo iloreren nchere kelotu ninye; embalunye te Yerusalem nchere kepuonu lelo oomuat aaman enkang te nkop nalakua, nebuaaki ninche nkanas e Yuda.

¹⁷Neman ninche Yerusalem anaa larripok le nkurma te nkaraki naatanya Yerusalem nanu, Olaitoriani ojo.

¹⁸Ore nkoitoi inono o nkiaasin inono nikintadoikitio iyie ena, entorroni ino makewan ena, naa kedua, etabaikia atua oltau lino kewan.

¹⁹Emion ai, emion ai! Aainosita emion! Oi mbat o ltau lai keng'oring'oro oltau lai oleng; maidim nanu atigirayu; amu aning'ito oltoilo le ntarumpeta, oltoilo lo larrabal.

²⁰Esujita enkidaata enkidaata ore enkop pooki neirragita metii toki nabo kata einyalaki ilng'oborri laainei ilkarash laainei tenkata nabo.

²¹Kaing'or nanu enanka o anu naning oltoilo le ntarumpeta?

²²“Amu kemoda iltung'ana laainei, nemaayiolo ninche nanu; nkera naakilo[1] ninche, meeta ninche ening'unoto. Arriyiak ninche te asata oo ntorrok, kake ore eneiko teneas esidai meyiolo ninche.”

²³Aing'ura nanu oriong enkop, naa ng'ura keliyio naa mitil; o shumata, nemeeta ninye ewang'an.

²⁴Aing'ura nanu shumata ildoinyo, naa ng'ura, keikirikira ninche, ore ndoinyo pooki nepuo idie o idie.

²⁵Aing'orishe nanu, naa ng'ura, metii apa hoo oltung'ani, ore motonyi pooki oloing'ang'e neisika.

²⁶Aing'orishe nanu, naa ng'ura, ore ina kop oo lng'anayio etaa olpurkel, ore nkanas enyena pooki neirragaa eidaaitie, te dukuya Olaitoriani, te dukuya ina goro enye napi.

²⁷Amu nji ejo Olaitoriani, “Keaku enkop pooki mitil; ore eyia maitaa nanu enkiting'oto.

²⁸Amu keishir ena kop, ore shumata neroku; amu airoro nanu, atootikio nanu eitu nanu aainosu nemashuko siadi.”

²⁹To ltoilo lo lakedoni le mbarta o ltung'ani le nkawuo eilany nkanas pooki o larrabal, nejing ninche ntimi; neked nchumat oo ndapidapo; etung'uayioki nkanas pooki nemetii oltung'ani oton tiatua ninche.

³⁰Naa ore iyie, ena nara mijooni, kainyoo intodolu nchere, eji nchopo iyie too nkilani sinteti, nchere inkod iyie kewan too masaa e saabu, nchere isir iyie nkonyek inono? Te mpesho iyie ikus kewan kimen iyie ilmao linono; eing'oru ninche enkishui ino.

³¹Amu atoning'o nanu enkishirata naaijo ene nkitok nasaisai, naishirita te mion anaa enaiu enkerai enye e dukuya, enkishirata e Yerusalem eng'a enkutuk pee etum enkijape, neitorioo nkaik enyena, “Woi nanu!; Ekaiterre nanu te dukuya lelo ooitayu loikop.”