Read MAASAI REVISED PROTESTANT Yeremia 41 Bible Online

Yeremia 41 - MAASAI REVISED PROTESTANT bible

Yeremia 41

¹Ore to lapa liopishana, nelotu Ishmael ilo ayioni le Netania, olayioni le Elishama, leilo marei le nkitoria, laa ninye obo loo lkituaak lo laiguanani, tenebo iltung'ana tomon enetii Gedalia olayioni le Ahikam, te Mispa. Ore enyaita ninche endaa te nebo teine te Mispa,

²nedumunye Ishmael o lelo tung'ana tomon apa ootii te nebo ninye nedung to lalem Gedalia ilo ayioni le Ahikam olayioni le Shafan, near ninye metua, naa ninye apa etegelua olaiguanani le Babilon metaa olgafanai teina kop.

³Nesesekuan sii Ishmael Ilyahudi pooki apa ootii tenebo Gedalia te Mispa o sikarini loo Lkaldayo apa otii ine.

⁴Ore apa teina olong te siadi esesekuanata e Gedalia, eton eitu eyiolou hoo ng'ae,

⁵nebau iltung'ana ntomoni isiet ooing'uaa Shekem o Shilo o Samaria ebarno ilmunyo lenye nepolosa nkilani enye, nedung'udung'o iseseni lenye, eyau nkishoorot e nkurma o enkorropil pee eishooyo te nkaji o Laitoriani.

⁶Nelotu Ishmael olayioni le Netania te Mispa anang'are ninche, eishirita elotu. Ore enang'are ninche, nejoki ninche “Entijing'u wootu enetii Gedalia olayioni le Ahikam.”

⁷Ore pee epuonu ninche atua enkanasa, nesesekuan ninche Ishmael olayioni le Netania o lelo tung'ana ootii te nebo ninye, nenang'akini ninche atua engumoto.

⁸Kake etii apa iltung'ana tomon atua ninche ootiaakita Ishmael, “Miar iyie iyiook matuatua, amu kiata ilchumat le nkano o eilata o enaisho oo lotorok eisudoro ti ong'ata.” Neaku etoning'o ninye neitu ear ninche metuata tenebo lelo apa le ncholiek enye.

⁹Ore apa ina gumoto natanang'aka Ishmael impopoki e lelo tung'ana ootasesekuana naa engumoto sapuk apa naitobira olaiguanani Asa arripore ina kata egilunore olaiguanani oji Baasha le Israel; neigany Ishmael olayioni le Netania impopoki oo lootuata.

¹⁰Neitoki Ishmael araya lelo kulikae tung'ana apa ootii Mispa, ntoyie o laiguanani o ltung'ana pooki apa ootung'uayioki te Mispa ootung'ueikia Nebusaradan, olkitok le rripore Gedalia olayioni le Ahikam. Neraya ninche Ishmael olayioni le Netania neboin ninche metalang'aki Ilamori.

¹¹Kake ore ake pee ening Yohanan olayioni le Karea o larikok pooki loo njorin te nebo ninye ina torroni pooki naataasa Ishmael olayioni le Netania. Nerik ninche ilewa lenye pooki nepuo aarare Ishmael olayioni le Netania, nepuonu ninche aainepu ninye to lchorro apa otii Gibeon.

¹²Neriku ninche iltung'ana lenye pooki nepuo aarare Ishmael olayioni le Natania. Nerik ninche ilewa lenye pooki nepuo aarare Ishmael olayioni le Natania. Neinepu ninye to lchorro sapuk otii Gibeon.

¹³Ore ake pee edol iltung'ana pooki apa ootii tenebo Ishmael Yohanan olayioni le Karea o larikok pooki loo njorin te nebo ninye, neng'idayu ninche.

¹⁴Neaku ore iltung'ana pooki apa ootaarayie Ishmael aitung'uaa Mispa neibelekenya aashukunye, nepuo enetii Yohanan olayioni le Karea.

¹⁵Kake etuluayie Ishmael olayioni le Netania ailany Yohanan te nebo iltung'ana isiet, nelo atua Ilamoni.

¹⁶Neya Yohanan olayioni le Karea o larikok pooki loo njorin apa ootii tenebo ninye lelo tung'ana pooki apa ootarayie Ishmael olayioni le Netania aitung'uaa Mispa ina kata pee eidip atasesekuana Gedalia olayioni le Ahikam o sikarini o nkituaak o nkera o sunashi oo gelema apa ooyaua Yohanan ashuku te Gibeon.

¹⁷Nepuo ninche, aatoni te Geruut Chimham te mbata e Betlehem, ejo pee epuo Misiri,

¹⁸te nkaraki Ilkaldayo; amu keure apa ninche, te nkaraki netasesekuana apa Ishmael olayioni le Netania Gedalia olayioni le Ahikam, laa ninye eitaa olaiguanani le Babilon olgafanai oitore ina kop.