Read MAASAI REVISED PROTESTANT Yeremia 42 Bible Online

Yeremia 42 - MAASAI REVISED PROTESTANT bible

Yeremia 42

¹Ore ilarikok pooki loo njorin o Yohanan olayioni le Karea o Asaria olayioni le Hoshaia o ltung'ana pooki ebaiki oloti ometabaiki olkitok, nepuonu aanyiku.

²Nejoki ninche Yeremia ilo oiboni le Nkai, “Nchoo esayiata ang elotu dukuya iyie, niomon Olaitoriani Enkai ino te nkaraki iyiook o te nkaraki ele pisiai pooki, (amu etelekuaki iyiook ilkuti too lkumok, anaa enidolita iyiook.)

³Pee etum Olaitoriani Enkai ino aitoduaa iyiook enkoitoi nikiim o embae nikias.”

⁴Nejoki Yeremia oloiboni le Nkai ninche, “Atoning'o nanu intae, ng'ura, kaomon nanu Olaitoriani Enkai inyi te risioroto eomonunoto inyi, ore eneba anaa enawaliki intae Olaitoriani naa kaliki nanu intae; maisudoo nanu hoo toki te intae.”

⁵Nejoki ninche Yeremia, “Metaa Olaitoriani olchakeni osipa tialo iyiook te nikiaas iyiook te risioroto eilo rorei likirriwakinye Olaitoriani Enkai ino iyiook.

⁶Te naa sidai aashu torrono, eikiruk iyiook ororei lo Laitoriani Enkai naa ninye kirriwaa iyie enetii, pee etum atisidana te iyiook tinikiruk oltoilo lo Laitoriani Enkai ang.”

⁷Ore te siadi nkolong'i tomon nelotu ororei lo Laitoriani enetii Yeremia.

⁸Neitoki ninye aipotu Yohanan olayioni le Karea o Larikok pooki loo njorin apa ootii te nebo ninye, oltung'ana pooki ebaiki oloti ometabaiki olkitok,

⁹nejoki ninche, “Nji ejo Olaitoriani, Enkai e Israel, naa ninye kirriwakita nanu mayaki enkomono inyi dukuya ninye:

¹⁰ti nibikibiki intae ti atua ena kop nashetu nanu intae nemauroo nanu intae; naun nanu intae, nemadotu nanu intae; amu airridua nanu ina torroni apa naitaasa nanu intae.

¹¹Emiureyu olaiguanani le Babilon, laa ninye iurere intae; emiureyu intae ninye, Olaitoriani ojo, amu atii nanu te nebo intae, pee aitajeu intae nakordu intae aitung'uaa enkaina enye.

¹²Kaisho nanu intae olng'ur, pee etum ninye aing'urrie intae neisho intae itonini te nkop inyi maate.

¹³Kake te nijojo intae, ‘Mikitoni iyiook ti atua ena kop,’ aagolong'aki oltoilo lo Laitoriani Enkai inyi;

¹⁴nijojo, ‘A'a, eikipuo iyiook enkop e Misiri, ine nimikidolie iyiook olarrabal, aashu kining oltoilo le mowuo, aashu kiata esumash oo mukateni, naa eikipuo iyiook aabik teine,’

¹⁵toning'o naa ororei lo Laitoriani, lopisiai le Yuda. Nji ejo Olaitoriani loo lororani, Enkai e Israel: Tenipuopuo intae Misiri niming'iligili aashukunye,

¹⁶ore ilo alem liurere nelo ainepu intae teine tiatua enkop e Misiri; ore ilo ameyu liurere nesuj intae te ngolon indipa aashom Misiri; nipuopuo aaye teine.

¹⁷Ore lelo tung'ana pooki ooipirie nkomomi enye aapuo Misiri aatoni teine naa kepuo aaye to lalem o to lameyu o to lmeitai; metum ninche olpisiai aashu ololeku teina torroni nayooki nanu ayau shumata ninche.

¹⁸“Amu nji ejo Olaitoriani loo lororani, Enkai e Israel: Ore anaa enapa natubukoko engoro ai o engoro ai napi lelo oomanya Yerusalem, neijia eikoni aabukoki engoro ai napi intae te nipuopuo Misiri. Naa iakuku intae entaboi o olkirutoto o ldeket o esulare. Mingiligili aekata aadol ene wueji.

¹⁹Etiaaka intae Olaitoriani, lo pisiai le Yuda, ‘Milo Misiri’ tayiolo te sipata nchere aaikoo nanu iyie ena olong,

²⁰nchere ishomo intae aaimin te nkinyiang'a enkishui inyi. Amu kirriwaitie intae enetii Olaitoriani Enkai inyi, ijojo, ‘Toomonoki iyiook to Laitoriani Enkai ang, ore enaba anaa enajo Olaitoriani Enkai ang mbalakinye iyiook amu eikiaas iyiook.’

²¹Naibalakinye nanu ena olong intae, kake eitu irukuruku oltoilo lo Laitoriani Enkai inyi te pooki toki naairriua nanu matoliki intae.

²²Ore naa taata entayiolo entisipa nchere iyeye intae to lalem o to lameyu o to lmeitai ti atua ine wueji nitang'uarra intae aapuo aatonie.”