Read MAASAI REVISED PROTESTANT Yeremia 44 Bible Online

Yeremia 44 - MAASAI REVISED PROTESTANT bible

Yeremia 44

¹Ele rorei oewuo enetii Yeremia eipirta lelo Yahudi pooki apa oomanya enkop e Misiri, te Migdol, te Tafahes, te Memfis o tiatua enkop e Patros ejo,

²“Nji ejo Olaitoriani loo lororani, Enkai e Israel: Itoduaa intae ina torroni pooki nayawua nanu shumata Yerusalem o shumata nkanas pooki e Yuda. Ng'ura, ore ena olong olmuaate ninche, nemetii hoo ng'ae omanya atua ninche,

³te nkaraki ina torroni nataasa ninche, naaitagor nanu, teina nashomo ninche aapej enkorropil neisiaai kulie aitin apa neitu eyiolou ninche, ninche aashu o intae aashu loo papaai linyi.

⁴Ore ake eyia aitirrishaka nanu airriwaki intae isinkan laainei pooki lelo oibonok le Nkai, ajo, ‘Ee, miaas ena taboi naiba nanu!’

⁵Kake eitu ninche ening aashu eishoru enkiok enye, pee eibelekenya aaing'uaa entorroni enye nemeitoki aapejoki enkorropil kulie aitin.

⁶Neaku ore emion o engoro ai napi netubukuoki neyupuyupieki tiatua nkanas e Yuda o tiatua nkoitoi e Yerusalem; neaku ninche mijoonito o lmuaateni, anaa enatiu tena olong.

⁷Ore naa taata nji ejo Olaitoriani Enkai oo lororani, Enkai e Israel: Kainyoo intae pee iasiasa ena torroni sapuk tialo intae maate, aadung'oo aaiwuang'ie tiatua intae olee o enkitok, elooyo o enkerai, aaitung'uaa empolos e Yuda, nemeing'uiekini intae olpisiai?

⁸Kainyoo pee kintagorigoro nanu te siaai oo nkaik inyi, ipejokiki enkorropil kulie aitin tiatua enkop e Misiri teine apa nietuo aatonie, pee etumi aaiwuang'ie intae niakuku oldeket o enkurruna tiatua iloreren pooki le nkop?

⁹Ketorikine intae esuujisho oo loo papaai linyi, entorroni o laiguanani le Yuda o entorroni oo kituaak enye o entorroni inyi maate o entorroni oo nkituaak inyi apa nataasa ninche tiatua enkop e Yuda o too nkoitoi naalala e Yerusalem?

¹⁰Eitu ninche eitobor ate ometabaiki ninye ena olong, aashu eureishoyu, aashu epuo te nkitanapata ai o nkiguanat aainei apa natipika dukuya intae o dukuya loo papaai linyi.

¹¹“Ore naa nji ejo Olaitoriani loo lororani, Enkai e Israel: Ng'ura kaing'orie nanu enkomom ai intae te ntorroni, pee aiwuang'ie Yuda pooki.

¹²Kaya nanu ilo pisiai le Yuda ooibelekenya inkomomi enye pee epuonu enkop e Misiri aatonie naa keidaikieki ninche pooki; tiatua enkop e Misiri epuo ninche aabatata to lalem o to lameyu eidaikieki ninche; ebaiki oloti ometabaiki olkitok, keye ninche to lalem o to lameyu; naa keaku ninche enking'asia o enkuretisho o ldeket o enkurruna.

¹³Kaitame nanu lelo oobikito tiatua enkop e Misiri anaa enaidipa aitamio Yerusalem, to lalem to lameyu o to lmeitai,

¹⁴keaku meetae hoo obo teilo pisiai le Yuda apa oewuo aton tiatua enkop e Misiri, ojeu aashu epok aashu eshuko alo enkop e Yuda, naa ninye apa etang'uarra pee eshuko aapuo aabik teine, amu merrinyo ninche meteleku ake ilkuti aisikak.”

¹⁵Ore apa lelo lewa pooki ooyiolo aajo eishoo nkituaak enye enkorropil kulie aitin o nkituaak pooki naaitasheto te mbata o lturrur kitok, ore iltung'ana pooki oomanya Patros tiatua enkop e Misiri, newaliki Yeremia ejo:

¹⁶“Ore tialo ele rorei litolikio iyiook te nkarna o Laitoriani, mikining iyiook iyie.

¹⁷Kake eikiaas iyiook pooki toki naba anaa enikinosakita olmumai, aapejoki enkorropil enkai ng'oruoi e shumata, nikibukoki ninye ilasarri ooki, anaa apa enikitaasa iyiook o loo papa, o laiguanak lang o lkituaak lang, tiatua inkanas e Yuda o too nkoitoi naalala e Yerusalem; amu ore apa ina kata nikiata endaa sapuk nikidupoyu, neitu kidol entorroni.

¹⁸Ore anaa nikipal iyiook eitu kipejoki enkorropil enkai ng'oruoi e shumata o embukokinoto o lasar ooki, nikitalaita iyiook pooki toki neidaikieki iyiook to lalem o to lameyu.”

¹⁹Nejo nkituaak, “Amaa apa pee kipejoki enkorropil enkai ng'oruoi e shumata nikibukoki ninye olasar ooki, aimeyiolo apa ilpayiani lang pee kintayu imukateni naata enkitanyaanyukoto enye nikibukoki ninye ilasarri ooki?”

²⁰Neitoki Yeremia ajoki iltung'ana pooki, ilewa o nkituaak o lelo tung'ana pooki ooishoo ninye ena walata:

²¹“Amaa tialo ina orropil apa nitapejo intae tiatua inkanas e Yuda o too nkoitoi e Yerusalem, intae o loo papaai linyi o laiguanak linyi olkituaak linyi, oltung'ana lena kop, keitu edamu Olaitoriani? Keitu elotu ena damunoto enye?

²²Meekure eidim Olaitoriani ating'iriakinoyu entorroni oo nkiaasin inyi o nena o lminong nitaasa intae, neaku etaa enkop inyi olmuaate ewueji mitil oldeket meetae olomanya, anaa enatiu ena olong.

²³Te nkaraki nitapejo intae enkorropil o te nkaraki nitaasa intae eng'oki to Laitoriani aashu ipuopuo te nkitanapata enye o too nkiguanat enyena o te shakenisho enye, pee etadoikio intae ena torroni, anaa enatiu ena olong.”

²⁴Nejoki Yeremia iltung'ana pooki o nkituaak pooki, “Entoning ororei lo Laitoriani, intae pooki le Yuda ootii atua enkop e Misiri,

²⁵nji ejo Olaitoriani loo lororani, Enkai e Israel: Ore intae o nkituaak inyi nimbalie too nkutukie inyi, nintabaitie too nkaik inyi, ijojo, ‘Esipa eikiaas iyiook nena nikinosakita olmumai likintobira aapejoki enkorropil enkai ng'oruoi e shumata nikibukoki ninye olasar ooki.’ Entudup naa ilmuma linyi niasiasa nena!

²⁶Ore naa entoning ororei lo Laitoriani Enkai intae pooki le Yuda oobikito tiatua enkop e Misiri: ng'ura, ainosa nanu olmumai te nkarna ai kitok, Olaitoriani ojo, nchere ore enkarna ai meitokini aekata aaipot te nkutuk e pooki tung'ani le Yuda tiatua enkop pooki e Misiri, ejo, ‘Anaa enaishu Olaitoriani Enkai.’

²⁷Ng'ura, aing'orita nanu ninche te ntorroni neme te sidai, ore iltung'ana pooki le Yuda ootii atua enkop e Yuda naa keidaikieki to lalem o to lameyu, ometabau enkiting'oto enye.

²⁸Ore lelo ooimisho to lalem naa keshuko aaing'uaa enkop e Misiri aapuo enkop e Yuda, naa kuti esiana; ore ilo pisiai pooki le Yuda, apa oewuo enkop e Misiri aton, neyiolou aajo kalo rorei ouno, kolalai aashu olenye.

²⁹Ele olo aaku olmonekie te intae, Olaitoriani ojo, nchere kaitame nanu intae tene wueji, pee itumutumu aatayiolo nchere esipa keitashe ororei lai tialo intae te ntorroni:

³⁰Nji ejo Olaitoriani, ng'ura, kaishooyo nanu Farao, aisho Hofra ilo aiguanani le Misiri apik atua enkaina oo lmang'ati lenyena o atua enkaina e lelo ooing'oru enkishui enye, anaa apa enaishooyie Sedekia olaiguanani le Yuda apik atua enkaina e Nebukadnesa olaiguanani le Babilon olaa olmang'atinta lenye apa neing'oru enkishui enye.”