Read MAASAI REVISED PROTESTANT Yeremia 48 Bible Online

Yeremia 48 - MAASAI REVISED PROTESTANT bible

Yeremia 48

¹Ena naipirta Moab. Nji ejo Olaitoriani loo lororani, Enkai e Israel: “Woi iltung'ana le Nebo, amu eitomijoonoki Eitukurruaki Kiriataim, ewaki ninye; eitukurruaki osempewuet negili ninye;

²meekure ening'o Moab. Tiatua Heshbon eitobira ninche entorroni te nkaraki ninye: ‘Wou, maiwuang'ie iyiook ninye meitoki aaku olosho!’ Ore sii intae, lo tung'ana oomoda, keitigiri intae; kesujaa intae olalem.

³“Etoning'e olkiyioi te Horonaim ‘Eyararoto o enkidaata sapuk!’

⁴Eidaikieki Moab; ening'itoi olkiyioi te nelakua anaa Soar.

⁵Amu ore eilepaki iltung'ana Luhit neilepaki eishirita; amu ore edoiki Horonaim netoning'o ninche olkiyioi le nkidaata.

⁶Eisika! Entajeu ate! Kueta anaa oloitiko to lpurkel!

⁷Amu, ore te nkaraki nisiliga intae engolon inyi o lchumat linyi, keyae sii ninche intae; naa kelo Kemosh atua eyararoto, tenebo ilapolosak lenyena o lkituaak lenyena.

⁸Kelotu olainyalani shumata pooki anasa, nemeetae enkanasa naimisho keidak oyarata, ore enkisiashata neidaikieki anaa enairoro Olaitoriani.

⁹Enchoo Moab inaipuko, amu kelotu ninye tiaai, keaku nkanas enyena ilmuateni meetae olomanya atua ninche.

¹⁰Kedia ilo oas esiaai Olaitoriani ayietut; netediaaki ilo oibooyo olalem lenye meibukoo osarge.

¹¹“Eitirring'a apa Moab ebaiki kitisho enye eitirring'e ninye te ntorroni enye eitu epikuni te mpirbil aapik ae pirbil, neitu ninye elo atua eyararoto; neaku etii olnyorrie lenye atua ninye, neitu eibelekenya olng'usil lenye.

¹²“Neaku, kepuonu nkolong'i, Olaitoriani ojo, nairriwaki nanu ninye lelo oopiku pee epikuni ninye, neitoroki empirbil enye nebelibel mpirbili enyena aaitaa mbelibelat.

¹³Nekurru Moab te nkaraki enkai enye naji Kemosh, anaa apa enatukurrua enkaji e Israel te nkaraki Betel, osiligi lenye.

¹⁴“Kaji intae inkoko pee ijojo, ‘Kira iyiook iloing'ok, iltung'ana ooidipa olarrabal?’

¹⁵Ore olainyalani le Moab o nkanas enyena neilepua alotu, ore ilbarnot lenyena gelunot nedoyio aapuo enkidaaroto Olaiguanani ojo laa ore enkarna enye naa Olaitoriani loo lororani.

¹⁶Ore olkiyioi le Moab netataana ore osina lenye nekuetu.

¹⁷Enchiraki ninye, intae pooki oomanita ninye, o pooki ooyiolo enkarna enye; entejo, ‘Eng'ura etigile eng'udi nagol, ina ng'udi enkitoo.’

¹⁸Wou tadou tung'uai enkitoo ino, niton te nkop e nkure iyie olomanya Dibon! Amu eewuo oloidaikie Moab pee kigilunore, neidaikie ninye isempewueti linono.

¹⁹Ntasho te mbata e nkoitoi ing'ura, iyie olomanya Areor! Nkilikuana ilo oisik o ina naluaya; tejo, ‘Kaa nataase?’

²⁰Eitukurruaki Moab, amu etigilaki; teyietu ninchir! Tolikioi te mbata olkeju le Aron, nchere eirragita Moab aa olmuaate.

²¹“Eewuo enkiguana shumata ina kop naitoriori, shumata Holon o Yahasa o Mefaat

²²o Dibon o Nebo o Bet-diplataini

²³o Kiriataim o Betagam o Betmeon

²⁴o Keriot o Bosra o nkanas pooki enkop e Moab, naalakua o naataana.

²⁵Etudung'oyioki esesekuan e Moab, ore enkaina enye netigilaki, Olaitoriani ojo.

²⁶“Ntemera ninye, te nkaraki nailepie ninye kewan aitorisioki Olaitoriani; neaku kelo Moab aiperipera tiatua irrugumat enyena, naa keaku sii entoki nakueniyieki.

²⁷Aime entoki apa nakueniyieki Israel te iyie? Keinepuaki apa ninye tiatua ilapurrok, eji peyie aa ore ake pee iimaki nimipirripir elukunya?

²⁸“Entung'uai nkanas nimanyimanya ndapidapo intae iloomanya Moab! Entotiu anaa nturkuluoni naaitobir nkajijik too mbat enkutuk e ngumoto.

²⁹Kitoning'oitie iyiook olwuasa le Moab kewuasa ninye oleng te nkilashilash enye, olwuasa lenye, enkitokoos enye, o emusunoto oltau lenye.

³⁰Ayiolo nanu enkilashilash enye, Olaitoriani ojo: ore enkitoo enye naa elejare, ore nkiaasin enyena naa elejare.

³¹Neaku kayietu nanu te nkaraki Moab; kaishir nanu te nkaraki Moab pooki; ore te nkaraki iltung'ana le Kiheres naishir nanu.

³²Kaaishiraki nanu iyie oleng oleng alang enaishiraki Yaser, lo sabibu le Sibma! Elang ilng'osil linono enaiposha, nepuo aabaya Yaser, ore shumata ilng'anayio linono te nkata enkirowuaj etadoikio olainyalani oidaikie.

³³Ewaki enchipai o eng'ida aaitung'uaa ina kop naisho oleng e Moab; aishoo nanu enaisho oo sabibu meishunye too nkironyeta; meetae hoo ng'ae oirony ninche too mbuakunot eng'ida; ore ina buakunoto neme embuakunoto e ng'ida.

³⁴“Ening'itoi oltoilo le nkishirata e Heshbon o Eleale te Yahas, eitayutuo iltoiloishi lenye eing'uaa Saor ometabaiki Horonaim o Eglat-shelishia. Amu etomijoono sii nkariak e Nimrim.

³⁵Naa kayau nanu meiting'o te Moab, Olaitoriani ojo, ilo oitayu olasar tiatua ewueji e shumata nepejoki enkorropil enkai enye.

³⁶Neaku keishiraki oltau lai Moab anaa endule, neishir oltau lai anaa endule te nkaraki iltung'ana le Kiheres; neaku ore enkarsisisho apa nanoto ninche neidaayie.

³⁷“Amu etabarnoki pooki lukunya nedung'i pooki munyei; netii nkaik pooki indung'ot ore mpolosi neishopokino ilkuniyiani to sina.

³⁸Ore nchumat oo nkajijik e Moab o tiatua nkoitoi dapashi metii ae toki neme enkishirata, amu atigila nanu Moab anaa emasaai nemeetae oltung'ani oshilaa, Olaitoriani ojo.

³⁹Eng'ura etigile! Eng'ura eyietu! Eibelekenye Moab te nkurruna! Neaku etaa Moab entoki nakueniyieki o enkuretisho te lelo pooki oomanita ninye.”

⁴⁰Amu nji ejo Olaitoriani: “Ng'ura kelo obo tiaai aipirri anaa olkurragos, neisalaashaki inaipuko enyena shumata Moab;

⁴¹keyae nena anas neibung'i lelo sempewueti. Ore oltau loo loing'ok le Moab teina olong netiu anaa oltau le nkitok nasaisai;

⁴²keidaikieki Moab nemeitoki aatii iltung'ana, te nkaraki nailepie ninye kewan aitorisioki Olaitoriani.

⁴³Etii enkuretisho o engumoto o rreshet dukuya intae, iloomanya Moab! Olaitoriani ojo.

⁴⁴Ore ilo oisik aing'uaa enkuretisho nedoiki atua engumoto, ore eked engumoto ailepu neibung orreshet. Amu kayau nanu kuna baa shumata Moab teilo ari le nkitamioto enye, Olaitoriani ojo.

⁴⁵Eitashe ilaisikak meeta engolon metorripo Heshbon; amu eipang'a enkima alo eing'uaa Heshbon, enkiyupuyup naing'uaa enkaji e Sihon: einyala ninye enkomom e Moab, enkopiyia enkitoo o ruparen e lelo ayiok oonyor olarrabal.

⁴⁶Oi ntae iltung'ana le Moab! Eishieki iltung'ana ooserem Kemosh; amu ewaki ilayiok linyi aaraya ore ntoyie inyi neyae eyararoto.

⁴⁷Ore eyia kashuku nanu dupoto e Moab too nkolong'i naapuonu, Olaitoriani ojo.” Nji eikununo endung'okinoto e nkiguana e Moab.