Read MAASAI REVISED PROTESTANT Yeremia 5 Bible Online

Yeremia 5 - MAASAI REVISED PROTESTANT bible

Yeremia 5

¹Kueta nikuetu too nkoitoi naalala e Yerusalem, ing'orisho niyiolou! Tujurru olkurroto lenye otumoreki toduaa tenaa indim iyie anoto oltung'ani obo, obo oas te nkitorioroto neing'oru esipata pee atum nanu atapalaki ninye.

²Ore hoo nejo ninche, “Anaa enaishu Olaitoriani,” kake ore eyia, enya ninche olmumai le lejare.

³Olaitoriani, aime esipata eing'oru nkonyek inono? Itoosho iyie ninche, kake eitu ninche emeyu; indaikie iyie ninche, kake etanyaita ninche engamaa ererioroto. Eitagolito ninche nkomomi enye aaitulus te endapidapoi; etanyaita ninche eirridu.

⁴Najo nanu, “Ore kulo naa laisinak ake, meeta ninche endamunoto; amu meyiolo ninche enkoitoi o Laitoriani, enkitanapata e Nkai enye.

⁵Kalo nanu enetii lelo kituaak, pee airorie ninche; enkitanapata o Laitoriani Enkai enye.” Kake enyaanyuk pooki, etigila enchata oo murto, etalaa ninche ilidat oo enat.

⁶Metaa kear ninche olng'atuny oing'uaa entim metuata, keidaikie ninche osuyiani oing'uaa olpurkel. Erreshito olkinya lasho nkanas enye, ore pooki ng'ae ooipang tiatua ninche nepolosi aaitaa ndung'udung'ot; amu aikumok nkitarruorrot enye, ore nchukot enye errinyo siadi naa aikumok.

⁷“Kaji nanu aiko tenaapalaki iyie? Aatung'uaitie nanu nkera inono neinosa olmumai te nena neme nkaitin ore aidipa nanu aitotio ninche aitaraposho, neloloito ninche neiturrurrokino nkajijik oo mulayioni.

⁸Eikununo ninche anaa lamuyeishi pushunot ootaraposhote meetae ake olemeishir eyieu enkitok olelatia enye.

⁹Ai maitame nanu ninche te kuna baa? Olaitoriani ojo; naa aimaitalaku nanu to losho laaijo ele?

¹⁰“Elepa enchom atua ilkererin lenye loo sabibu enyiala kake minyialinyala katukul; entong'osilu ilng'osil lenye, amu mme ilo Laitoriani ninche.

¹¹Amu ore enkaji e Israel o enkaji e Yuda neitu ninche tukul ening'isho tialo nanu, Olaitoriani ojo.

¹²“Amu eiroro ninche te lejare tialo Olaitoriani, nejo ninche, ‘Meeta ninye enaas; meetae entorroni nalotu shumata iyiook, nimikidol olalem aashu olameyu.

¹³Netiu iloibonok anaa enkijape; metii ororei atua ninche. Neijia eitaasi ninche!’ ”

¹⁴Metaa nji ejo Olaitoriani Enkai oo lororani: “Ore te nkaraki nairoro ninche ele rorei, ng'ura, kaitaa nanu irorei laainei tiatua enkutuk ino enkima, ore kulo tung'ana neaku ilkeek, nenya enkima ninche.

¹⁵Ng'ura, kayau nanu shumata iyie, iyie na aji e Israel, olorere oing'uaa enelakua, Olaitoriani ojo. Olorere ogol ninche olorere li apa ninye olorere laa ore enkutuk enye miyiolo iyie nimiyiolou enajo ninche.

¹⁶Netiu emootian enye anaa enkurare nabolo, iltung'ana magil ninche pooki.

¹⁷Kenya ninche ina ninkesu ino o endaa ino, nenya ninche ilayiok linyi o ntoyie inyi; nenya ninche nkerrai inyi o nchoo inyi nenya ninche isabibu linyi o lng'abolo linyi; ore nkang'itie inyi naasheta isunta naa ninche isiligigi naa keidaikie ninche.”

¹⁸“Kake ore ake sii te nena olong'i, Olaitoriani ojo, maamut nanu iyie katukul.

¹⁹Ore pee ejo iltung'ana linono, kainyoo pee eitaasa Olaitoriani Enkai iyiook kuna baa pooki? Nijokiki intae ninche, ‘Ore anaa enikitung'uaitie intae nanu nisiaayiayia nkaitin oo loreren tiatua enkop inyi, neaku ipuopuo aisiaai iltung'ana leeiking'a teinakop neme eninyi.’ ”

²⁰Mbalunye ena tiatua enkaji e Yakobo, ntudupai tiatua Yuda.

²¹“Entoning ena intae iltung'ana oomoda lemedamisho, lelo oata nkonyek kake medolisho lelo oata nkiyiaa, kake mening'isho.

²²Aimikiurere intae nanu? Olaitoriani ojo; Aiminkirikirara intae te dukuya nanu? Atipika nanu osinyai aitaa olpolosie le naiposha, olpolosie loo nkolong'i pooki lemeidim ninye atogiroi; ore hooneilugo lopir le naiposha, meidim ninche aaima ore hoo neikurrukur meidim aaima shumata enye.

²³Kake eeta kulo tung'ana oltau ogol le ngolong'u; eibelekenyate ninche aapuo.

²⁴Mejo ninche too ltauja lenye, ‘Matureita iyiook Olaitoriani Enkai ang, laa ninye oishoru enchan terishata enye, enchan oo nkokua o enchan oltumuret, nepikaki iyiook nkatitin naageluno enkikesare.’

²⁵Eibelekenya entorroni inyi kuna aiwuang'ie, neitalamaitie ing'ok inyi mbaa supati aitung'uaa intae.

²⁶Amu etii iltung'ana torrok atua iltung'ana laainei; nerreshisho anaa larreshok ooirrag aarreshisho neitayu ninche orreshet; neibung ninche iltung'ana.

²⁷Ore anaa enabore imotonyi orreshet ebore nkajijik enye enkeleekisho; neaku etaa ninche kituaak nekarsisu,

²⁸etopiro ninche nesipayu netuluso too inkiaasin enye entorroni meiguanare ninche te sipata ororei leilo lemeeta menye, pee eitaa ninye karsis, nememitu ninche isipat e ilo omena.

²⁹Aimaitame nanu ninche te kuna tokitin? Olaitoriani ojo, naa aimaitalaaki nanu kewan to lorere leeijo ele?”

³⁰Entaboi torrono oleng nataase tiatua ena kop;

³¹eibonisho iloibonok te lejare neitoreisho ilapolosak te nena naayieu ninche; ina enyor iltung'ana laainei, kake kaa iyie ias tenebau enkiting'oto?.