Read MAASAI REVISED PROTESTANT Yeremia 6 Bible Online

Yeremia 6 - MAASAI REVISED PROTESTANT bible

Yeremia 6

¹Enkuet eng'oru eseriani, intae iltung'ana le Benchamen, entung'uai empolos e Yerusalem! Entoosh esekekua te Tekoa, nidumumu olmonekie te Bet-hakerem; amu edakunye entorroni aipang'u te nkalo e moikuape, o enkidaata kitok.

²Ore ina sidai naata enkishaa kaidakie nanu Yerusalem,

³ore lchekuti tenebo nkerrai enye nepuonu aarare ninye neun ninche ilng'oborri lenye aaitaman ninye, neirritisho ninche, oltung'ani ake te wueji enye.

⁴“Ntobira olarrabal taarare ninye; matudumunye, pee kirasaki te nkipirata enkolong! Woi iyiook, amu etinyikayie enkolong, amu etoodorita iloipi le nteipa!”

⁵“Matudumunye, matarasaki kewarie, nikindaikie inkajijik enyena e nkitoo!”

⁶Amu nji ejo Olaitoriani loo lororani, “Entudung ilkeek lenyena; nimuatimuata aaman Yerusalem. Enkanasa ena nemeeta nchere pee meitamei; metii ae toki neme enkibookinoto enkop atua ninye.

⁷Ore anaa enashum olchorro enkare enye neijia sii ninye eiko ashum entorroni enye; emarmalisho o enkidaata naning'o tiatua ninye; etii emuoyian o lbaa dukuya nanu anaake.

⁸Toningu ena kikoo, iyie Yerusalem, pee maaorieki ake iyie; pee maaitaa ake olmuaate enkop, nememanya.”

⁹Nji ejo Olaitoriani loo lororani, “Kesotuni anaa isabibu olpisiai le Israel, anaa olasotunoni loo lng'anayio nyaaki ntogiroi enkaina ino shumata ilng'osil.”

¹⁰Kaing'ae nanu airorie naikok, pee etum ninche aatoning ng'ura eikeno nkiyiaa enye meidim ninche aatoning'isho; ng'ura, ore ororei lo Laitoriani te ninche netiu anaa emoroto, meshipakino ninche ninye.

¹¹Neaku aabore nanu engoro napi o Laitoriani; anaure aibookino. “Tubukoki ninye shumata nkera te nkoitoi nalala enkanasa o shumata sii iumat oo lbarnot; neyae olpayian o enkitok, lelo payiani olelo kituaak lenye.

¹²Ore nkajijik enye neibelekenyakini ilkulikae, inkurman enye o nkituaak enye tenebo; amu kaitorioo nanu enkaina ai aarare lelo omanya ena kop.” Olaitoriani ojo.

¹³“Amu ore ebaiki oloti o metabaiki olkitok lenye, meetae ake olemeng'uar dupoto e lejare; ore ebaiki oloiboni ometabaiki olapolosani, meetae ake olemeas inelejare.

¹⁴Eishiunye ninche olbae loo ltung'ana laainei te nkitaakunoto, ejo, ‘Eseriani, eseriani’ nemetii eseriani.

¹⁵Ketukurrutua apa ninche ina kata apa pee eas mbaa olminong? Aa, eitu ninche ekurru tukul; menya ninche orere. Neaku kebatata ninche tenebo lelo oobatata; ore teina kata naitame nanu ninche, kenang'ari ninche,” Olaitoriani ojo.

¹⁶Nji ejo Olaitoriani, “Entashoito too nkoitoi naalaa ning'orishosho, ninkilikuanunu nkoitoi e apa, ine apa netii nkoitoi sidain, niimiimi intae atua nitumutumu enkiyeng'iyeng too ltauja linyi. Kake etejo ninche, ‘Mikiim iyiook atua ninye.’

¹⁷Atipika nanu ilarripok shumata intae, ejo, ‘Entoning oltoilo le ntarumpeta’ Kake etejo ninche, ‘Mikinining iyiook.’

¹⁸Metaa entoning, intae iloshon, niyiolouu, intae ilturrurri, ina nayooki atiu te ninche.

¹⁹Toning'o iyie enkop; ng'ura kayau nanu entorroni shumata kulo tung'ana, ilng'anayio loo mbaa enye torrok, te nkaraki neitu ninche ening irorei laainei; ore tialo enkitanapata ai, etanyaita ninche.

²⁰Ai te nkaraki nyoo naa nanu aayakini enkorropil naing'uaa sheba, aashu esonkoyo naarropil naing'uaa enkop nalakua? Ore lasarri linono oopejori meng'amaroyu, nemaaitiship nanu nkishorunot inono.

²¹Neaku nji ejo Olaitoriani: ‘Ng'ura, kairragakinye nanu kulo tung'ana iloketa naa ninche errorrore ninche; iloomenye o layiok tenebo, ore olelatia olchore neidaaya.’ ”

²²Nji ejo Olaitoriani: “Ng'ura, epuonu iltung'ana ooing'uaa enkop e moikuape, eilepu olosho kitok eing'uaa enelakua oleng otanape te nkaraki olarrabal.

²³Eirraga ninche eibung'ita nkai o mperria, kegogong ninche nemeeta olng'ur, ore oltoilo lenye neikununo anaa enaiposha naikurrukur; neked ninche mbartan, nenapa ninche anaa oltung'ani le njore, pee kiarare iyie, Yerusalem!”

²⁴Kitoning'o iyiook olomoni lenye, nelepori inkaik ang; neibung iyiook osina o emion anaa enkitok nasaisai.

²⁵Emimpang aapuo ong'ata, aashu ipuopuo te nkoitoi; amu eeta olmang'atinta olalem, etii olkirutoto pooki shoto.

²⁶Intae lo tung'ana laainei, terretenayu too lkuniyiani, nimperipera too nkuruon; nchira anaa enatua olayioni obo oata, to lkiyioi le mion oleng, amu nabo kata nelotu olamutani shumata iyiook.

²⁷Aaitaa nanu iyie entemet o esilet tiatua iltung'ana laainei, pee itum atayiolo nitem nkoitoi enye.

²⁸Kegolong'u ninche pooki, nepuoopuo too nkiteenikinot; osuyai ninche o esekenkei, eas ninche pooki ine ntorroni.

²⁹Eyupuyup olkokuet oleng nenya enkima olduruk lioriong, ore ilo oshol esekenkei, pesho ake eshol amu eitu eiwuang'ieki entorroni.

³⁰Enkosholai nemeeta tipat ninche, amu etanya Olaitoriani ninche.