Read MAASAI REVISED PROTESTANT Yeremia 7 Bible Online

Yeremia 7 - MAASAI REVISED PROTESTANT bible

Yeremia 7

¹Eirorie Olaitoriani Yeremia nejoki:

²“Ntasho te kishomi e nkaji o Laitoriani, nilikioo teine ele rorei, nijo, Entoning ororei lo laitoriani, intae iltung'ana pooki le Yuda ooimu kuna shomito aaserem Olaitoriani.

³Nji ejo Olaitoriani loo lororani, Enkai e Israel, embelekenya nkoitoi inyi o nkiaasin inyi, naa kaisho nanu intae ibikibiki teine wueji.

⁴Emisilig kulo rorei le lejare: ‘Enkaji Olaitoriani ena, enkaji Olaitoriani, enkaji o Laitoriani.’

⁵“Embelekenyata intae entung'uai nena oitoi inyi o nkiaasin inyi. Entaasata enaishiaa te sipata olikae o likae.

⁶Tinimimbookiki enkop ilo omoni, ilo lemeeta menye aashu enkoliai aashu imbukoo osarge leilo lemeeta entioto tene wueji, nimintokiki aasujaa kulie aitin te nkitamioto inyi,

⁷naa kaisho nanu intae entobik tene wueji, tiatua ena kop apa naishoo nanu loo papaai linyi ntarasi.

⁸“Ng'ura, isiligigi intae irorei le lejare lemeeta eretoto.

⁹Ipurrisho iyie, nintayu iloikop, niloloito, ninya olmumai le lejare, nipejoki Baal enkorropil, nirubare kulie aitin neitu iyiolou,

¹⁰paa intokiki aapuonu aaitashe te dukuya nanu tena aji, naa ninye eipotieki enkarna ai, nijojo, ‘Etokorduaki iyiook!’ Nipuopuo dukuya iasiasa kuna pooki olminong?

¹¹Ketaa ena aji, naa ninye eipotieki enkarna ai, enkapune oo lapurrok too nkonyek inyi? Ng'ura ajo atoduaa nanu enkorrok ai ina, Olaitoriani ojo.

¹²Enchom taata ine wueji ai apa netii shilo, naa ine aishoo enkarna ai metobikie te dukuya; pee idolidolo enaitaasa ninye te ntorroni oo ltung'ana laainei Israel.

¹³Ore taata, te nkaraki nitaasa intae kuna baa pooki, Olaitoriani ojo, ore pee airorie intae aitirrishaki neitu ining'ining'i, ore pee aipot intae neitu irukishosho, kake itanyita irukishosho,

¹⁴neaku kaitaas nanu ina aji naa ninye eipotieki enkarna ai, naa ninye isiligigi, oine wueji apa naishoo nanu intae o loo papaai linyi anaa enaitaasa Shilo.

¹⁵Naa kanang'aa nanu intae too nkonyek aainei, anaa enatanang'ayie nanu ilalashera linyi o eishoi pooki e Efraim.

¹⁶“Ore iyie miomonoki kulo tung'ana, aashu ilepiepie olkiyioi aashu enkomono te nkaraki ninche nimiomonoki te nanu, amu maaning nanu iyie.

¹⁷Aimidol iyie inaasita ninche too nkanas e Yuda o too nkoitoi naalala e Yerusalem?

¹⁸Esotu nkera ilkeek, neinok loo menye enkima, neipurj nkituaak enkurma, pee eitobiraki imukateni enkai ng'oruoi e shumata; nebukoki ninche ilasarri ooki kulie aitin, pee aaitagor nanu.

¹⁹Ainanu ninche eitagor? Olaitoriani Enkai ojo. Aime ate, to lmilo lenye!

²⁰Neaku inji ejo Olaitoriani Enkai: ‘Ng'ura keibukori engoro ai o engoro ai napi tene wueji, te shumata oltung'ani o eng'ues, shumata ilkeek liong'ota olng'anayio le nkop: keyupuyup ninye nemearayu.’ ”

²¹Nji ejo Olaitoriani loo lororani Enkai e Israel: “Entoponai nkishoorot inyi oo lasarri oopejori, ninyanya nkiri.

²²Amu ore apa teina olong nayawua nanu ninche aitung'uaa enkop e Misiri, eitu nanu airorie loo papaai linyi aashu aaraki ninche tialo nkishorunot naapejori o lasarri.

²³Kake ena kitanapata nanu aishoo ninche; ‘Entoning oltoilo lai, naa kaaku nanu Enkai inyi, niakuku intae iltung'ana laainei; nipuopuo teina oitoi pooki naitanapa nanu intae, pee etum atisidana te intae.’

²⁴Kake eitu ninche ening aashu eishoru enkiok enye, kake eshomo ninche too ndamunot enye o engolon oo ltauja lenye torrok, nepuo siadi neitu epuo dukuya.

²⁵Ore ebaiki ina olong apa napuonu loo papaai linyi aaing'uaa enkop e Misiri ometabaiki ena olong, aitirrishaka nanu airriwaa isinkan laainei pooki lelo oibonok le Nkai enetii ninche te nkolong ake o te nkolong,

²⁶ore eyia neitu ninche aainining nanu, aashu eishoru enkiok enye, kake eitagolo lukuny enye. Etaasa ninche ntorrok aalang loo papaai lenye.

²⁷“Neaku ilo iyie aliki ninche kulo rorei pooki, kake mikining ninche iyie. Impot iyie ninche kake mikiruk ninche iyie.

²⁸Naa ilo iyie ajoki ninche, ‘Olosho ele leitu ening oltoilo lo Laitoriani Enkai enye, neitu eng'amu enkitamito e rerioroto; eidaayie esipata; eiwuang'ieki too nkutukie enye.’

²⁹“Entudung'oi ilpapit linyi ninturraa to sina, elepie olkiyioi too nkisiashat naaika; amu etanya Olaitoriani netung'uayie ina ishoi e ngoro enye napi.’

³⁰“Amu etaasa ilaiyiok le Yuda entorroni too nkonyek aainei, Olaitoriani ojo; etipika ninche ilo minong lenye atua enkaji naa ninye eipotieki enkarna ai, pee eisarkionie ninye.

³¹Netesheta ninche olperere lo lasar te wueji neika neji Tofet, ina natii oyarata lo layioni le Hinom, pee etum aatapejoi ilayiok lenye o ntoyie enye tiatua ina kima neitu nanu aitanap ninche neitu elotu atua ndamunot aainei.

³²Metaa, ng'ura ajo kepuonu nkolong'i, Olaitoriani ojo, nemeitokini aajo Tofet, aashu oyarata lo layioni le Hinom, kake oyarata le sesekuanare amu te Tofet ninche enukaa ilootuata, te nkaraki metii erishata dikae.

³³Ore mpopoki e kulo tung'ana neaku endaa too motonyi o loing'ang'e o too ng'uesi enkop; nemeetae oloiture ninche meshomo.

³⁴Naa kaitobir nanu meishunye too nkanas e Yuda o too nkoitoi naalala e Yerusalem, oltoilo le nkuenia o ltoilo le nchipai o ltoilo lo loyamisho, oltoilo le nayami; amu keaku enkop mijooni.