Read MAASAI REVISED PROTESTANT Yeremia 9 Bible Online

Yeremia 9 - MAASAI REVISED PROTESTANT bible

Yeremia 9

¹Oi naaji aa olmoti le nkare endukuya ai, neijirrijirru ilkiyio too nkonyek aainei, pee atum nanu aishira dama o kewarie te nkaraki esesekuanata oo ltung'ana laainei!

²Oi naaji aa kaata to lpurkel ewueji neirragari pee atum nanu atung'uai iltung'ana laainei nalo enelakua aing'uaa ninche! Amu ile loloito ninche pooki, olturrur loo ltung'ana lemeisiligayu.

³Nekordil irorei lenye lenye anaa nkai, elejare neme esipata natubulayie tiatua ena kop; amu kepuo ninche dukuya te ntorroni o te ntorroni, nemaayiolo ninche nanu, Olaitoriani ojo.

⁴Enchoo pooki ng'ae erripo to le latia lenye nemepik osiligi atua likae alashe; amu ore pooki alashe naa olairrikinoni amu ore pooki le latia enye neloolo ainosaa olmarenke.

⁵Kelej pooki ng'ae ole latia enye, nemeetae oloiro esipata; eitamoo ninche ilng'ejepa lenye meiroro elejare neas ninche ntorrok neshal oleng te nkirridunoto.

⁶Nesot enkibookinoto e nkop te shumata enkibookinoto e nkop, o elejare te shumata elejare, neany ninche aayiolou nanu, Olaitoriani ojo.

⁷Neaku nji ejo Olaitoriani loo lororani: “Ng'ura ajo kashol nanu ninche natem ninche, amu kaa ae naas nanu, te nkaraki iltung'ana laainei?”

⁸Embae e sayiet olng'ejep lenye; keiro ninye te lejare; ore too nkutukie enye meetae ake olemeirorie olelatia enye te seriani, kake ore tiatua oltau lenye neitobiraki ninye orreshet.

⁹Aimaitame nanu ninche te kuna baa, Olaitoriani ojo; naa aimaitalaaki nanu kewan to lorere laaijo ele.

¹⁰Teyietu nchiraki ldoinyo ninchiraki to sina ndaat e ongata te nkaraki naitaaki mitil neaku meetae oltung'ani oim atua, ore enkorui oo nkishu nemening'o ore imotonyi o loing'ang'e o ng'uesi neisika aapuo.

¹¹Kaitaa nanu Yerusalem osototi loo suut, olmuaate, emanyisho oo mbariak naitaa nanu nkanas e Yuda mijoonito, meetae olomanya.

¹²Kaing'ae ilo tung'ani ng'en oleng oidim atayiolo ena: laa ninye eirorie enkutuk o Laitoriani, pee etum ninye aibalunye? Kainyoo pee einyalaki enkop aaidaikie anaa ong'ata, metaa meetae hoo obo ooim atua?

¹³Nejo Olaitoriani: “Te nkaraki natung'uaitie ninche enkitanapata ai apa natipika nanu dukuya ninche, neitu ening oltoilo lai, aashu epuo te risioroto enye,

¹⁴kake te ngolong'akinoto etusujaitie iltauja lenye maate neshomo aasujaa nena aitin e Baal, anaa enaiteng'ena loo menye ninche.

¹⁵Metaa nji ejo Olaitoriani loo lororani, Enkai e Israel: Ng'ura, kaitoti nanu kulo tung'ana te sayiet, naisho ninche enkare natii esayiet metooko.

¹⁶Kaidapashaki nanu ninche iloshon leitu apa eyiolou ninche aashu loo menye; naitoki nanu airriwaa olalem aitusuj ninche ometaba anaa namut nanu ninche.”

¹⁷Nji ejo Olaitoriani loo lororani: “Entadamu, nimpotutu nena kituaak naaishir meetu; erriu nena kituaak arriyiak meetu.

¹⁸Nchoo ninche eisarisaru neilepakinye iyiook olkiyioi pee etum nkonyek ang aaturukoto too lkiyio, neshalu nchonito oo nkonyek te nkare.

¹⁹Amu etoning'oki oltoilo lo lkiyioi te Sion. ‘Eneikunakaki iyiook enkidaata! Eitukurruaki iyiook oleng, te nkaraki nikitung'uaitie iyiook ina kop, te nkaraki naturoitie ninche imanyishoritin ang.’ ”

²⁰Entoning, intae na kituaak, ororei lo laitoriani, ninchosho nkiyia inyi eng'amu ororei le nkutuk enye; enteng'ena ntoyie inyi enkishirata, oltung'ani ake neiteng'en enelatia enye olkiyioi linchirishiri.

²¹Amu eilepua keeya alotu atua ilusien ang, etijing'ua ninye iwuejitin ang e nkitoo etaara metuata nkera too nkoitoi naalala e nkanasa, o lbarnot too lkurrot ootumoreki.

²²Eroro, “Inji ejo Olaitoriani: ‘Ore mpopoki oo ltung'ana naa keirragaa anaa modiok too nkisiashat, anaa suut enkano te siadi olaikesani nemeetae oloiturrur ninche.’ ”

²³Nji ejo Olaitoriani, “Minchosho ilo tung'ani ng'en eng'idare eng'eno enye, minchosho ilo tung'ani magilani eng'idare emagilanisho enye, minchosho ilo tung'ani karsis eng'idare karsisisho enye;

²⁴tenetii oltung'ani oyieu newuasa, nchoo ewuasare ena, nchere kaayiolo nanu, nchere kara Olaitoriani, ilo ooibung enyorrata nauno, esipata, o enkitorioroto tiatua enkop; amu te kuna tokitin ashipa nanu, Olaitoriani ojo.”

²⁵“Kepuonu nkolong'i, Olaitoriani ojo, pee aitame nanu lelo pooki oomurata too seseni ake,

²⁶Misiri, o Yuda, o Edom, lelo ayiok le Amon, o Moab o lelo pooki, oomanya olpurkel oiriri ilpapit lenye! Amu ore kulo oshon pooki nememurata, ore enkaji pooki e Israel nememurata iltauja.”