Read MAASAI REVISED PROTESTANT Nkishirat 1 Bible Online

Nkishirat 1 - MAASAI REVISED PROTESTANT bible

Nkishirat 1

¹Enking'asia enkanasa e Yerusalem, nabore apa iltung'ana nataa mitil[1] Ina apa naa ninye enkitok alang nkuapi! Ina apa naata enkitoo too loreren, netaa taata errindik.

²Eishir ninye te mion kewarie, etii ilkiyio ntakul enyena; ore tiatua lelo lang'at[2] lenyena pooki meetae hoo obo oitagol ninye eibelekenyate ilchoreta lenyena pooki etaa ninche ilmang'ati lenyena.

³Eshomo Yuda eyararoto te nkaraki osina. O te nkaraki enkisiaayiare nagol; ebikito taata ninye tiatua iloreren; kake eitu etum ewueji neyeng'iyeng'are. Ore lelo oomirita ninye neineputua ninye tiatua ilo sina lenye.

⁴Ore nkoitoi naapuo Sion, naa olkiyioi, amu meetae oltung'ani olotu lelo siruai oogeluno, etoliyiote nchomito enyena pooki eigorito ilapolosak lenyena te mion; neteyietayioki intoyie enyena aaya; ore ninye makewan neeta olosilisili te mion sapuk.

⁵Etaa ilmang'ati lenyena ooitoreisho. Etubula ilmang'ati lenyena te nkaraki naishoo ninye Olaitoriani menoto osina, te nkaraki enkumoi oo nkitarruorrot eshomo nkera enyena eyararoto, ereuta ilmang'ati lenyena.

⁶Ore Yerusalem netung'uayie enkitoo pooki. Etotiutuo ilkituaak lenyena, anaa eng'ues natala enedaare. Eilanyisho ninche neeta engolon te dukuya ilo omirita ninche.

⁷Kedamu Yerusalem inkolong'i enyena o losilisili o emion, mbaa pooki naatulusoitie, apa naa inenyena ebaiki apa moitie. Ina kata apa pee ejing iltung'ana lenyena, enkaina o lmang'atinta, nemeetae hoo obo oretu ninye. Neikordod olmang'atinta ninye, nesurdaany teina batatata enye.

⁸Etaasa Yerusalem eng'oki torrono, ore te nkaraki ina etaa ninye olminong; ore apa pooki ooyanyit ninye netemena, amu etoduaa ninye emasipaisho enye; ee eishirita ninye makewan te mion, neibelekeny enkomom enye aing'or idia alo.

⁹Eibale oleng olduruk lenye eitu ninye edamu enkidaata enye ore te nkaraki ina aikitok embatatata enye. Meeta ninye oltung'ani oitagol ninye. Olaitoriani, ing'ura osina lai, amu eisula olmang'atinta.

¹⁰Etalaa olmang'atinta nkaik enyena, aisalaashaki ntokitin enyena pooki e tipat ee, etoduaa ninye iloreren eibung ewueji enye sinyati, lelo apa litomitikio iyie ejing atua eumata ino.

¹¹Eigorito iltung'ana lenyena pooki, eing'oru endaa, newalunye ntokitin enye e tipat endaa, ejo pee eitoki aagolu. “Ng'ura Olaitoriani, naa toduaa, amu aatemenaki nanu.”

¹²“Aime toki te intae, lelo pooki oogiroo? Eng'ura nidolidolo, tenaa keetae osina onyaanyukie osina lai oyawuaki shumata nanu, ilo laatipika Olaitoriani teina olong e ngoro enye napi.

¹³“Eitadowuo ninye enkima te shumata; nereu apik iloik laainei neisalaashaki nkejek aainei orreshet; naaibelekeny ninye nanu, aatung'uayie ninye aidang'ita naiterre endama pooki.

¹⁴“Eteenikiaki nkitarruorot aainei pooki enchata oo murto; te nkaina enye eteenaki aakurraki tenebo; nepiki ninche emurt ai, neisho ninye engolon ai meishunye; aaishooyie Olaitoriani apik inkaik e lelo lemaidim aitasheikinore.

¹⁵“Eitaa Olaitoriani pesho iltung'ana laainei pooki magil, te mpolos ai; eipotuo ninye enjore oo lmang'ati maatigilunore nanu. Pee epurdipurdi ilbarnot laainei; eitunyo Olaitoriani anaa enkironyet ina selenkei e Yuda.

¹⁶“Ore te nkaraki kuna baa naishir nanu; neruko ilkiyio too nkonyek aainei, amu kelakua olaaitagol nanu, ilo laaputu manyaaki apiju; eliyio inkera aainei, amu etimirishe olmang'atinta.”

¹⁷Eitorioyie Sion inkaik enyena, kake meetae oloitagol ninye, eitanapishe Olaitoriani tialo Yakobo, nchere ore ile latia enye pooki naa keaku ilmang'ati lenyena; etaa Yerusalem entoki naiduruk olminong tiatua ninche.

¹⁸“Olaitoriani ninye olasipani; amu atogolong'ua nanu apaash ororei lenye; kake entoning intae iloreren nidolidolo isinaitin laainei; ore ntoyie aainei o lbarnot laainei neshomo eyararoto.

¹⁹“Aipotuo nanu ilang'at laainei, kake aateleja ninche, ore ilapolosak laainei o lpayiani neidaaitie tiatua enkanasa ina kata eing'oru ninche endaa pee eitang'ejuk engolon enye.

²⁰“Toduaa, Olaitoriani, amu atii nanu atua osina. Etii oltau lai atua enyamali, eibelekenye oltau lai tiatua nanu te nkaraki nara apa nanu oltung'ani ogolong'u oleng, ore te nkoitoi nalala e nkanasa neitayu olalem inkera okishin, ore tiatua aji netiu anaa keeya.

²¹“Toning'o enkigoroto ai metii hoo obo laaitagol nanu etoning'o ilmang'ati laainei pooki enyamali ai etishipate nchere itaasa iyie ina. Iyau iyie ina olong apa nitolimuo, nincho ninche etiu anaa nanu.

²²“Nchoo nkiaasin enye pooki torrok epuonu dukuya iyie, nintaas ninche anaa enikintaasa nanu te nkaraki nkitarruorot aainei pooki amu kumok inkishirat aainei e mion neiterria oltau lai.”