Read MAASAI REVISED PROTESTANT Esekiel 1 Bible Online

Esekiel 1 - MAASAI REVISED PROTESTANT bible

Esekiel 1

¹Ore to lari le tomoni uni, to lapa li ong'uan, te nkolong e miet o lapa, ina kata atii tenebo iyarunot te mbata o lkeju le Kebar te Babilon, nebolo keper nadol induaat e Nkai.

²Ore te nkolong e imiet o lapa (naa olari le imiet le yararoto o laiguanani Yehoiakin),

³nelotu ororei lo Laitoriani enetii Esekiel ilo apolosani, olayioni le Busi teina kop oo Lkadayo te mbata o lkeju le Kebar; netii apa enkaina o Laitoriani shumata enye teine.

⁴Ore aing'orisho, nadol osiwuo le nchan olotu eing'uaa enkalo e moikuape o enkatampoi sapuk o enkimerlel namanita ninye o lng'ejepa le nkima ooidikidiko. Ore te mpolos e nkima, netiu anaa entoki enkimerlel o suyai.

⁵Ore te mpolos enye nepuku enkitanyaanyukoto oo ng'uesi ong'uan naaishu. Naa nji apa eikununo eliooto enye: keeta apa pooki enyaanyukie e tung'ani

⁶nemeeta ake nabo nemeeta nkomomi ong'uan, neeta ake nabo te ninche inaipuko[1] ong'uan.

⁷Ore inkejek enye naa keitoriori, ore ndapi oo nkejek enye netiu anaa iloisotok le nkeju o lashe neitintil ninche anaa osuyai otisikaki oleng.

⁸Ore tiabori oo naipuko enye too matuan enye pokira ong'uan neeta nkaik oo ltung'ana. Neeta nena pokira ong'uan inkomomi enye o naipuko enye eikununo nji:

⁹Eibung'a nena aipuko, nepuo pooki dukuya, meibelekenya epuo.

¹⁰Ore enyaanyukie oo nkomomi enye, keeta ake nabo te ninche enkomom o ltung'ani te dukuya; ore pokira ong'uan neeta enkomom o lng'atuny te matua e tatene, ore pokira ong'uan neeta enkomom olkiteng te nkalo e kedianye, neeta pokira ong'uan enkomom o lkurragos te siadi.

¹¹Neijia apa etiu nkomomi enye. Ore inaipuko enye nelak aaitorioo, meeta ake eng'ues nemeeta inaipuko are, nemeeta ake enemeibung'ita enaipukoi e nkae, neeta ake kulie aipuko are naanunuare too seseni lenye.

¹²Nelo ake pooki ng'ues aitoriori dukuya, ore pooki wueji nelo enkiyang'et, nepuo sii ninche, nemeibelekenya epuo.

¹³Ore te mpolos e nena ng'uesi naaishu netii apa entoki natiu anaa nkuk naaishu enkima, netiu anaa iltaai oopuopuo tiatua nena ng'uesi naaishu; naa kewang apa enkima oleng, nepuku tiatua ina kima enkiwuang'ata.

¹⁴Ore nena ng'uesi naaishu neipirri dukuya netiu, anaa enkiwuang'ata.

¹⁵Ore peyie aaing'or nena ng'uesi naaishu, nadol inkejek ong'un oo ngarrin naaibung'ita enkop, meeta ake eng'ues neme enenye enkeju nabo.

¹⁶Ore anaa enatiu empukunoto e nena kejek o enkitobirata enye, etiu empukunoto enye anaa enkitiil o soit barrikoi oji Krisol; neeta pokira ong'uan empukunoto nabo; ore enkitobirata enye netiu apa anaa enkeju e ngarri natii atua enkae keju e ngarri.

¹⁷Ore pee epuo, neim inkaloli pokira ong'uan, nemeibelekenya sii tenepuo.

¹⁸Ore nena kejek e ngarri pokira ong'uan neeta enkamanaa naado naitureisho, neeta sii nkonyek naamanita too nkaloli pooki.

¹⁹Ore pee epuo nena ng'uesi naaishu, neiriamariyie nkejek ninche aashep; ore pee edumunye ng'uesi naaishu te nkop, nedumunye sii nena kejek.

²⁰Ore pooki wueji nelo enkiyang'et nepuo sii ninche, nedumunye nena kejek tenebo ninche eshepita, amu etii enkiyang'et e nena ng'uesi naaishu nena kejek.

²¹Ore pee epuo nena nepuo sii kuna; ore pee eitashe nekua, neitashe sii kuna; ore pee edumunye nekua aing'uaa enkop, nedumunye nena kejek te nebo ninche; amu etii apa enkiyang'et e nena ng'uesi naaishu atua nena kejek oo ngarrin.

²²Ore te shumata e nena lukuny e nena ng'uesi naaishu netii entoki nanyaanyukie oloing'ang'e le keper, newang oleng anaa soito oibor oleng, neisalaashakino shumata ilukuny enye.

²³Ore tiabori oloing'ang'e neitoriori inaipuko enye aitoriokino dukuya, neipirare enkae enkae; nemeeta ake eng'ues nemeeta inaipuko are naitoipito osesen.

²⁴Ore epuoito naning oltoilo loo naipuko enye, netiu anaa oltoilo loo nkariak kumok, netiu anaa endarata Olmagilani, oltoilo lo larrabal anaa oltoilo lo lorora, ore ake peyie eitashe neshuk inaipuko enye;

²⁵nelotu oltoilo oing'uaa oloing'ang'e le keper, oimua shumata lukuny enye; ore pee eitashe aaitirring'a neshuk inaipuko enye.

²⁶Ore te shumata oloing'ang'e te nchumata oo lukuny enye netii enkitanyaanyukoto olorika le nkitoo, nenyaanyukie osoit pus oji Safi; ore entopij enye netonie enkitanyaanyukoto olorika le nkitoo netii enkitanyaanyukoto naa ijo oltung'ani.

²⁷Ore ebaiki empolos enye neilep, nadol enkimerlel naikununo anaa osuyai otisikaki, netiu anaa enkima naikenoro te pooki alole; ore ebaiki empolos enye nedoyio nadol etiu anaa enkitanyaanyukoto e nkima netii ewang'an namanita ninye.

²⁸Etiu anaa eliooto o lokirrai too nkatampo teina olong enchan. Neijia apa etiu eliooto e wang'an sapuk namanita ninye. Neijia apa etiu eliooto enkitanyaanyukoto e nkitoo o Laitoriani. Ore peyie adol ninye, nabatata te nkomom ai naning oltoilo le ilo oirorita.