Read MAASAI REVISED PROTESTANT Esekiel 10 Bible Online

Esekiel 10 - MAASAI REVISED PROTESTANT bible

Esekiel 10

¹Naing'orisho nanu nadol ajo ore ilo oing'ang'e otii shumata nena lukuny e lelo kerubi etii enchumata enye entoki naaijo olorika le nkitoo oitobiruno to soit pus oji Safi.

²Nejoki Olaitoriani ilo tung'ani oishopito nkilani naapuyiapui, “Shomo atua nena kejek e ngarri naapuo to loing'ang'e naatii abori lelo kerubi; imputa inkaik inono inkuk naaishu te rishata lelo kerubi, nindapashaki ninche ina anasa.” Naduaaya ninye elo,

³ore ina kata neitashe ilkerubi te nkalo e kopikop eina aji, ore peyie ejing oltung'ani atua; neiput enkatampoi olodung'oro liatua.

⁴Neilep enkitoo o Laitoriani aing'uaa olkerubi o metabaiki enejing'ieki enkaji; neiput ina aji enkatampoi, ore olodung'oro neiput ewang'an e nkitoo o Laitoriani.

⁵Nening'i oltoilo loo naipuko oo lkerubi to lodung'oro liong'ota, etiu anaa oltoilo le Nkai Magilani teneiro.

⁶Ore peyie eitanap ilo tung'ani oishopito nkilani naapuyiapui ajoki, “Iwa enkima te mpolos e nena kejek eng'arri naapuo to loing'ang'e, te rishata oo lkerubi”, nelo ninye atua neitashe te mbata enkeju e ngarri.

⁷Neitorioo olkerubi enkaina enye te rishata oo lkerubi aitorioki enkima natii empolos oo lkerubi, neya embata enye, nepik atua nena aik e ilo tung'ani oishopito nkilani naapuyiapui, neya ninye, neipang boo.

⁸Etiu ilo kerubi anaa oloata enkaina oltung'ani tiabori naipuko enyena.

⁹Naing'orisho, nadol etii nkejek e ngarri ong'uan naashepita ilo kerubi, eshepita ake nabo olkerubi, ore emua oo nkejek engarri netiu anaa osoit oimerlel oji Krisol.

¹⁰Ore empukunoto enye, eeta nena ong'uan emua nabo, anaa enkeju eng'arri natii atua enkeju eng'arri.

¹¹Ore peyie epuo ninche, neim enkalo ake nabo te nena ong'uan eitu eibelekenya epuoito, kake ore ake pooki alo naibelekenyakino enkeju engarri e dukuya nesuju nkulie pooki, eitu eibelekenya aapuo.

¹²Ore nkaamanaa oo nkejek enye o ltidii loo nkejek enye o nkejek oo ngarrin nebore nkonyek naamanita.

¹³Ore nena kejek oo ngarrin, neipoti aning'ito aajo nkejek osiwuo o loing'ang'e.

¹⁴Ore pooki ng'ae te ninche neeta nkomomi ong'uan: Ore enkomom e dukuya naa enkomom o lkiteng, ore enkomom e are naa enkomom o ltung'ani, ore enkomom e uni naa enkomom o lng'atuny, ore enkomom e ong'uan naa enkomom o lkurragos.

¹⁵Nedumunye ilo kerubi ailep alo shumata. Ore kulo naa nena ng'uesi apa naaishu natoduaa te nkiyopata o lkeju le Kebar.

¹⁶Ore peyie epuo lelo kerubi nemanaa aapuo nena kejek e ng'arri; ore pee edumu lelo kerubi inaipuko enye aadumunye aaing'at enkop, neitu eibelekenya nena kejek aaing'uaa meshep ninche.

¹⁷Ore pee eitashe, neitashe sii kuna, ore pee edumunye aailep, neilep sii ninche tenebo, amu etii apa atua ninche enkiyang'et e nena ng'uesi naaishu.

¹⁸Nepuku enkitoo o Laitoriani aing'uaa kutuk aji e ina aji, neitashe te nchumata e lelo kerubi.

¹⁹Nedumu ilkerubi inaipuko enye aailep aapuo to loing'ang'e aaing'uaa enkop adolita epuo, ore epuo, etii nkejek emurte enye; neitashe te kutuk aji enkishomi e nkalo o loosaen e nkaji Olaitoriani; netii shumata enye enkitoo e Nkai e Israel.

²⁰Ore kuna naa ing'uesi naaishu nena natoduaa tiabori ina Ai e Israel te nkiyopata o lkeju le Kebar; nayiolou ajo ilkerubi apa ninche.

²¹Neeta ake pooki obo te ninche nkomomi ong'uan, neeta ake pooki inaipuko maa ong'uan, ore tiabori inaipuko enye nenyaanyukie nkaik oo ltung'ana.

²²Ore empukunoto oo nkomomi enye, netiu anaa inapa omomi natoduaa te nkiyopata olkeju le Kebar. Nepuo pooki dukuya aaitoriori.