Read MAASAI REVISED PROTESTANT Esekiel 11 Bible Online

Esekiel 11 - MAASAI REVISED PROTESTANT bible

Esekiel 11

¹Naailepunye nanu Enkiyang'et shumata, naayau nanu kishomi o loosaen e nkaji o Laitoriani, ina naipirare oloosaen. Nadol te kutuk aji e ina kishomi iltung'ana tikitam o imiet; ootii Yaasania olayioni le Asuri o Peletia olayioni le Benaia o lkituaak loo ltung'ana.

²Naajoki Olaitoriani nanu, “Enkerai e tung'ani, iltung'ana kulo laa ninche ooipiru enkarruoisho laa ninche ooishoru nkikoot torrok tena anasa;

³ninche oojo, ‘Eton eitu enyiku enkata nikishetie nkajijik; ore ena anasa naa emoti nayierishoreki ake nikira iyiook nkiri.’

⁴Metaa imbonoki ninche, tigilunore ninche imbonoki iyie enkerai e tung'ani.”

⁵Naadoiki nanu Enkiyang'et o Laitoriani naajoki ninye nanu, “Tejo, Inji ejo Olaitoriani: Metaa idamu, iyie na aji e Israel; amu kayiolo nena baa pooki naajing endamunoto ino.

⁶Intaa kumok oleng ilmeneng'a linono tena anasa nimputa inkoitoi naalala enkanasa ilmeneng'a.

⁷Metaa inji ejo Olaitoriani Enkai: Ore ilmeneng'a linono lirragie tiatua ninye, naa nkiri ake, naa emoti nayierishoreki ena anasa, kake aikintaini iyie tiatua ninye.

⁸Ituria iyie olalem; naa kayau shumata iyie olalem, ejo Olaitoriani Enkai.

⁹Naa kaaitupuku nanu iyie tiatua ninye, naapik iyie nkaik oo ltung'ana leeiking'a, naadung'oki iyie enkiguana.

¹⁰Ekibatati iyie to lalem, ekaaiguanare iyie to lpolosie le Israel: niyiolou iyie ajo kara Olaitoriani.

¹¹Meaku ena anasa emoti ino nayierishoreki nimiaku iyie nkiri tiatua ninye; ekaaiguanare iyie to lpolosie le Israel;

¹²niyiolou ajo kara nanu Olaitoriani; amu eitu imbung alotie nkitanapat aainei, aashu isujaa nkiguanat aainei, kake itaasa anaa enatiu nkitanapat oo loshon lelo likimanita iyie.”

¹³Ore pee ebau ina kata, aibonisho nanu, neye Peletia olayioni le Benaia. Nabatata te nkomom ai, naishir to ltoilo sapuk najo, “Aha Olaitoriani Enkai! Inting'ie aishu lelo lekunot le Israel?”

¹⁴Nelotu ororei lo Laitoriani enatii nanu ejo:

¹⁵“Enkerai e tung'ani, ore iltung'ana linono, aa lelo alashera, lelo yarunot linono, ina aji pooki e Israel, ninche pooki, naa ninche lelo ootejo iloomanya Yerusalem inchere, ‘Eshomo ninche aalam Olaitoriani; eishooki iyiook ena kop metaa enaang.’

¹⁶Metaa tejo, ‘Inji ejo Olaitoriani Enkai: Ore hoo naitayio ninche aitalamaa too loshon naa ore hoo naidapashayie ninche tiatua nkuapi, nataa nanu emanyisho Enkai te ninche te nkiti kata tenena kuapi, naashomo.’

¹⁷Metaa tejo, ‘Inji ejo Olaitoriani Enkai: Ekaiturrurru intae too loreren, naiturrurru ntae aitung'uaa nena kuapi naaidapashakaki ntae, naa kaisho ntae ina kop e Israel.’

¹⁸Naa tenepuonu ninche ine, neitayu tiatua ninye intokitin pooki torrok o pooki toki olminong.

¹⁹Naa kaisho ninche oltau obo, napik enkiyang'et ng'ejuk atua ninche; naitayu tiatua ninche ilo tau lo soit aitung'uaa iseseni lenye naisho ninche oltau le nkiring'o,

²⁰peyie etum aashomie nkitanapat aainei, neibung inkitanapat aainei neyanyit ninche; naa keaku ninche iltung'ana laainei, naaku nanu Enkai enye.

²¹Kake ore lelo oopuo aasuj too ltauja lenye intokitin torrok o mbaa o lminong, naitalaku nena siaaitin enye torrok too lukuny enye, ejo Olaitoriani Enkai.”

²²Ina peyie edumu lelo kerubi inaipuko enye, eeta nkejek oo ngarrin too mbat enye; ore enkitoo Enkai e Israel neitoipito ninche.

²³Nepuku enkitoo Olaitoriani aing'uaa atua ina anasa, neitashe te nchumata oldoinyo otii enkalo o loosaen eina anasa.

²⁴Naadumu nanu Enkiyang'et e Nkai ailepie shumata naayau nanu te nduaata Enkiyang'et e Nkai atua Ilkaldayo, enetii lelo yarunot. Ore ina duaata natoduaa naalo aing'uaa nanu.

²⁵Naliki lelo yarunot imbaa pooki naaitodua Olaitoriani nanu.