Read MAASAI REVISED PROTESTANT Esekiel 12 Bible Online

Esekiel 12 - MAASAI REVISED PROTESTANT bible

Esekiel 12

¹Nelotu ororei lo Laitoriani enatii naajoki:

²“Enkerai e tung'ani, imanya atua enkaji kiserut, lelo ooata nkonyek naadolishore, nemedolisho, lelo ooata nkiyiaa naaning'ishore, nemening'isho

³amu enkaji kiserut ninche. Metaa, enkerai e tung'ani, intobiraki kewan olola le yararoto, nilo eyararoto dama kiduaaya ninche; ilo anaa oyaroroti aing'uaa ewueji ino alo dikae wueji kiduaaya ninche. Ebaiki neidim ninche aatoning'u hoo naa enkaji natogolong'ua ninche.

⁴Intupuku iyie olola lino dama kidolita ninche anaa olola le yararoto; naa ipuopuo intae teipa edolita ninche ntae, anaa enaas iltung'ana lelo oopuo e yararoto.

⁵Entutur intae esuntai edolita ninche niimiimi ina lusie.

⁶Ore edolita ninche intae nidumumu olola aaiteleiki iloilila linyi, ninapinapa aaipang'ie te naimin, nintoipipi inkomomi inyi, peyie midolidolo ina kop; amu aaitaa iyie olmonekie te nkaraki enkaji e Israel.”

⁷Naataasa ina anaa enaaitanapaki. Ayaua olola lai te ndama, anaa olola le yarunoto, ore teipa, natur esuntai too nkaik aainei, nalo te naimin, anapita pooki toki ai to loililai lai edolita ninche.

⁸Ore tadekenya nelotu ororei lo Laitoriani enatii naajoki,

⁹“Enkerai e tung'ani, amaa enkaji e Israel, ena aji kiserut keitu kijoki iyie, ‘Kaa doi iasita iyie?’

¹⁰Tiaaki ninche, ‘Inji ejo Olaitoriani Enkai: Ore ele kilikuai oiroishi neipirta ilo kitok otii Yerusalem o ina aji pooki e Israel natii atua ninye.’

¹¹Tejo, ‘Kara nanu olmonekie te iyie: anaa enataasa, neaku ina eitaasi ninche ekepuo ninche eyararoto aaku ilooena.’

¹²Ore ilo kitok otii tenebo ninche nedumu olola lenye aiteleiki oloililae lenye te naimin, neipang alo; ketur esuntai aaim; naa keimulumul enkomom enye, peyie medol ina kop too nkonyek enyena.

¹³Naa kaisalaash orreshet lai aitoipoki ninye, naa keyae ninye tiatua orreshet lai; naa kayau ninye Babilon ina natii enkop oo Lkaldayo, nemedol ake sii ninye; naa keye ninye teine.

¹⁴Naa kaidapashaki aing'orie pooki kijape lelo pooki oomanita ninye, ilaretok lenyena tenebo iltimito lenyena pooki; naa kashutu olalem asujaa ninche.

¹⁵Naa keyiolou ninche aajo kara nanu Olaitoriani, ina kata naidapashaki ninche iloshon naidapashaa ninche too nkuapi.

¹⁶Kake kaisho ilkuti lenye eilanyisho aailany ilo alem, aaing'uaa olameyu o lmeitai torrono, peyie etum aaisirayia olminong lenye pooki tiatua lelo oshon oojing atua, netum aatayiolo aajo kara nanu Olaitoriani.”

¹⁷Enyaaka ake sii ororei lo Laitoriani alotu enatii nanu ejo,

¹⁸“Enkerai e tung'ani inosa endaa ino to lkirutoto, niok enkare to lokirikiri o te nkuretisho;

¹⁹nijo te nkaraki lelo tung'ana leina kop, Inji ejo Olaitoriani Enkai te nkaraki lelo oomanya Yerusalem teinakop e Israel: Kenya ninche endaa enye te nkuretisho, neok enkare te nking'asia, amu keitayuni te nkop ina pooki natii, te nkaraki ina kikonya e lelo pooki oomanya atua ninye.

²⁰Ore nena anas neitomijooni, neaku ina kop enememanyae; niyiolouu aajo kara nanu Olaitoriani.”

²¹Nelotu ororei lo Laitoriani enatii nanu ejo:

²²“Enkerai e tung'ani, kaa dung'et e rashe ena niata naipirta ena kop e Israel, ijo, ‘Etoodoro inkolong'i, ore pooki duaata nelotu aaku enemeetae.’ Tiaaki naa ninche,

²³‘Inji ejo Olaitoriani Enkai: Ekaiting'ie ena dung'et e rashe, nemeitoki aekata aasishore anaa endung'et e rashe te Israel.’ Kake tiaaki ninche, etinyikutua nena olong'i, oo nkitabarot e pooki duaata.

²⁴Amu meitokini aata aekata enduaata nemesipa aashu enduaata elejare te nkaji e Israel.

²⁵Kake ore nanu Olaitoriani naa kairo ororei, ilo lairo, naa keasi. Meekure eitokini aekata aaitumutiki, kake ore too nkolong'i inyi iyie na aji kiserut ekairo nanu ororei naas ina, ejo Olaitoriani Enkai.”

²⁶Ore ake sii eewuo ororei lo Laitoriani enatii naajoki:

²⁷“Enkerai e tung'ani, ing'ura, ore lelo le nkaji e Israel ejo, ‘Ore ina duaata enye naa enoo nkolong'i kumok e dukuya, nelimu nduaat oo nkolong'i naatii dukuya oleng.’

²⁸Neaku tiaaki ninche, Inji ejo Olaitoriani Enkai: Meetae ororei lai hoo obo oitokini aitumutiki, kake ore ilo rorei lairo naa keasi, ejo Olaitoriani Enkai.”