Read MAASAI REVISED PROTESTANT Esekiel 13 Bible Online

Esekiel 13 - MAASAI REVISED PROTESTANT bible

Esekiel 13

¹Nelotu ororei lo Laitoriani enatii ejo:

²“Enkerai e tung'ani, imbonisho tigilunore iloibonok le Israel, imbonisho nijoki lelo ooibonisho too ndamunot enye maate: ‘Entoning ilo rorei lo Laitoriani!’ ”

³Inji ejo Olaitoriani Enkai, “Ekake ayia intae lelo oibonok oomoda lelo oosuj enkiyang'et enye maate, nemeeta toki natoduaa!

⁴Etotiwuo iloibonok linyi anaa mbariak tiatua ilmuaateni, iyie Israel.

⁵Eitu ilepaki ajing atua ilusien, aashu ishet esuntai te nkaraki enkaji e Israel, pee etum aitasho to larrabal teina olong o Laitoriani.

⁶Eiroro ninche elejare neibonu elejare; nejo ninche, ‘Ejo Olaitoriani’ eitu eirriwaa Olaitoriani ninche, neisilig ninche meitabai irorei lenye.

⁷Keitu idol iyie enduaata namilisho, nimbalie te nkutuk ino enaibon oo monko te pooki kata nitejo, ‘Ejo Olaitoriani, hoo neitu nanu airo?’ ”

⁸Metaa inji ejo Olaitoriani Enkai: “Ore amu imbalie te nkutuk ino inemesipa nitoduaa elejare, neaku kaagilunore iyie, ejo Olaitoriani Enkai.

⁹Ekegilunore enkaina ai lelo oibonok, lelo ooata nduaat oo monko neitayu nduaat e lejare; mejing ninche atua olturrur loo ltung'ana laainei, aashu eigeri ninche te mbuku oo nkarn e nkaji e Israel, aashu ejing ninche ina kop e Israel; niyiolouu aajo Kara nanu Olaitoriani Enkai.

¹⁰“Ore te nkaraki naitapong'oitie iltung'ana laainei, ejo, ‘Eseriani,’ nemeetae eseriani; te nkaraki, ina kata nashet iltung'ana esuntai, nepuonu iloibonok aamur te nturoto;

¹¹tiaaki lelo oibonok oomur te nturoto kesulari ninye! Ekelotu oloirrag le nchan o soito le nchan oodou nelotu olkutati kitok oleng.

¹²Ore peyie esulari esuntai, aimejokini intae, ‘Koree apa emurata nitumurie ninye?’

¹³Metaa nji ejo Olaitoriani Enkai: Ekaitaa olkutati kitok opuku lo siwuo metigila te ngoro ai; naa ketumi oloirrag le nchan te ngoro ai o enchan sapuk te ngoro napi naidaikie ninye.

¹⁴Naa kagil auroo ina suntai nitumurakita enturoto nauroo ninye te nkop, metaa ore olkitamanyunoto lenye neirrag metii toki; ore tenesulari, terishata enye; niyiolouu aajo Kara nanu Olaitoriani.

¹⁵Neaku neijia aiko tenaitayu engoro ai teina suntai o te lelo ootumura ninye te nturoto; naa kaajoki iyie, meekure eetae ina suntai, aashu lelo ootumura ninye.

¹⁶Ore lelo oibonok le Israel lelo ooibonoki Yerusalem nedol induaat eseriani te nkaraki ninye, ina kata meetae eseriani ejo Olaitoriani Enkai.

¹⁷“Ore iyie nakerai e tung'ani, intorioki enkomom ino tigilunore nena toyie oo ltung'ana linono, nena naaibonisho too ndamunot enye maate; imbonoki tigilunore ninche

¹⁸nijoki, inji ejo Olaitoriani Enkai: Ekake ayia nena kituaak naeniki nkaik enye pooki intasimi, naaitobiraki entoki naitoipie ilukuny iltung'ana pooki, irreshoo iltauja! Irreshoo iltauja loo ltung'ana laainei, ninchosho ilkulikae tauja etoni aaisho te nkaraki dupoto inyi.

¹⁹Kisarkionie nanu tiatua olorere lai te mborei e nkaina e shairi o te mbelati emukate, iariara metuata iltung'ana lemeishiaakino neye ninchosho iltung'ana lemeishiaakino neishu etoni eishu, te lejare inyi ilejileje iltung'ana laainei, lelo ooinining'u elejare.

²⁰“Neaku nji ejo Olaitoriani Enkai: Ing'ura kagilunore nena tasimi inyi nirreshieshie iltauja, naa kapolosu aiwuang'ie too nkaik inyi; naa kaisho lelo tauja litarresho epuo etalaayioki anaa imotonyi.

²¹Ore sii nena nintoipiepie ate naa kapolos aiwuang'ie, naitajeu iltung'ana laainei aitung'uaa inkaik inyi, nemeitoki aekata aatii nkaik inyi anaa eng'ues naibung'aki aanya; niyiolouu ina kata aajo kara nanu Olaitoriani.

²²Amu itaara iltauja loo supati te monkoi, hoo neitu nanu aar ninye oltau, nintagolo ilo torrono, nemeibelekenya ninye aing'uaa enkoitoi enye e ntorroni pee eitajeu enkishui enye;

²³neaku meekure aekata intokiki aadol induaat oo monko anaa iasishorere ntasimi; ekaitajeu iltung'ana laainei aitung'uaa inkaik inyi. Niyiolouu ina kata aajo Kara nanu Olaitoriani.”