Read MAASAI REVISED PROTESTANT Esekiel 14 Bible Online

Esekiel 14 - MAASAI REVISED PROTESTANT bible

Esekiel 14

¹Nepuonu kulikae payiani le Israel enatii, netoni te dukuya nanu.

²Nelotu ororei lo Laitoriani enatii, aajoki:

³“Enkerai e tung'ani ewaita kulo tung'ana inkaitin naaguetuno nemeishu aapik iltauja lenye, nepik entoki narrueshisho oo ntorrok enye dukuya nkomomi enye; kaisho kewan maikilikuanishore tukul ninche?

⁴Neaku irorie ninche, nijoki ninche, inji ejo Olaitoriani Enkai: Ore pooki tung'ani le nkaji e Israel opik inkaitin naaguetuno enyena nemeishu oltau, nepik entoki narror oo ntorrok dukuya enkomom enye, neitoki ake alotu enetii ilo oiboni le Nkai, kawaliki nanu ninye makewan ara Olaitoriani, te nkaraki olorora loo nkitanyaanyukot oo nkaitin enyena nemeishu,

⁵peyie atum aibung'a lelo tauja leina aji e Israel, lelo pooki ootapong'ori te nanu too nkitanyaanyukot oo nkaitin enye nemeishu.

⁶“Metaa tiaaki enkaji e Israel, inji ejo Olaitoriani Enkai: Erridutu nimbelekenyunyenye aaing'uaa nkitanyaanyukot oo nkaitin inyi nemeishu; nimbelekenyunyu inkomomi inyi to lminong linyi pooki.

⁷Amu ore ake ninye pooki ng'ae le nkaji e Israel, aashu olomoni ake pooki tiatua Israel ooroo kewan te nanu, nepik inkitanyaanyukot oo inkaitin nemeishu oltau lenye nepik entoki narror oo ntorrok enyena dukuya enkomom enye, eji neitoki ake alotu enetii oloiboni le Nkai pee elotu aikilikuanu imbaa enyena te nanu, ore nanu makewan Olaitoriani naa kawaliki ninye nanu enkorrok ai;

⁸naa kaitorioki enkomom ai ilo tung'ani agilunore ninye, ekaitaa ninye olmonekie naitaa olomenuni, nadung'oo ninye tiatua iltung'ana laainei; niyiolouu aajo Kara nanu Olaitoriani.

⁹“Naa teneleji oloiboni meiroro ororei, ore nanu, Olaitoriani oteleja ilo oiboni, naa kaitorioo enkaina ai agilunore ninye naidaikie ninye tiatua iltung'ana laainei Isiraeli.

¹⁰Naa kenap ninche enkitamioto enye enkitamioto oloiboni naa ketiu neijia enkitamioto e ilo oikilikuanu,

¹¹peyie meitoki aekata enkaji e Israel aapuo aapong'ori aaing'uaa nanu, nemeitoki aaigil aaisarkionie ate too ng'ok enye pooki, kake pee etum aataa iltung'ana laainei, natum ataa nanu Enkai enye, ejo Olaitoriani Enkai.”

¹²Nelotu ororei lo Laitoriani enatii ejo:

¹³“Enkerai e tung'ani teneas enkop ing'ok aa nanu egilunore eas inemetii enkirukoto, naitorioki enkaina ai agilunore ninye, nagil ine netumie endaa nairriwaki ninye olameyu, nadung'oo te ninye tung'ani o eng'ues,

¹⁴ore ninye naaji te kulo tung'ana okuni, Noa o Daniel o Yob te netii atua ine naa enkishui enye ake maate eitajeu te supatisho enye, ejo Olaitoriani Enkai.

¹⁵“Tenaisho ing'uesi entim meima atua ina kop, neinyal ninye metaa mitil, metaa meetae oltung'ani oidim aima atua te nkaraki nena ng'uesi;

¹⁶o tenaa ketii duoo ninye lelo tung'ana pokira okuni atua, ore anaa enaishu, ejo Olaitoriani Enkai meitajeu hoo nkayiok aashu intoyie, ninche ake enkorrok enye eitajeuni, kake keaku enkop mitil.

¹⁷Aashu tenayau olalem shumata e ina kop, najo, inchoo olalem eim atua ina kop; nadung'oo te ninye tung'ani o eng'ues,

¹⁸ore hoo netii apa kulo tung'ana pokira okuni atua, ore anaa enaishu, ejo Olaitoriani Enkai, meitajeu hoo nkayiok aashu intoyie, kake ninche ake inkorroki enye eitajeuni.

¹⁹Aashu tenairriu olmeitai atua ina kop, nabuku engoro ai napi abukoki shumata ninye tenebo osarge, pee adung'oo te ninye tung'ani o eng'ues;

²⁰enyor duoo naa Noa otii o Daniel o Yob atua ninye, ore anaa enaishu, ejo Olaitoriani Enkai, meitaju hoo nkayiok aashu intoyie, enkishui enye ake eitajeu te supatisho enye.

²¹“Nji ejo Olaitoriani Enkai: Kebaa elang tenairriwaki Yerusalem nena kitamiot aainei ong'uan e nkiguana; olalem, olameyu, ing'uesi torrok o lmeitai, pee adung'oo tung'ani o eng'ues tiatua!

²²Ore ake eyia, tenelo neing'uari tiatua ilooleku pee erik aaipang'ie ilayiok o ntoyie, tenepuo nepuonu enitii nidol inkoitoi enye o yasat enye, naa aikintagoli iyie teina torrono nayau shumata e Yerusalem, te nena pooki nayawua shumata ninye.

²³Naa keitagol ninche intae, tinidolidolo inkoitoi enye o yasat enye; niyiolouu aajo eitu aas ina meeta enataasie pooki nataasa te ninye,” ejo Olaitoriani Enkai.