Read MAASAI REVISED PROTESTANT Esekiel 16 Bible Online

Esekiel 16 - MAASAI REVISED PROTESTANT bible

Esekiel 16

¹Neitoki ake ororei lo Laitoriani alotu enatii, ejo:

²“Enkerai e tung'ani, intayiolo Yerusalem olminong lenye,

³nijoki, inji ejo Olaitoriani Enkai ajoki Yerusalem: Ore entipat ino o einoto ino netii enkop oo Lkanaan; ore apa papaai lino naa Olamori, ore yieyio lino naa ene Hiti.

⁴Ore te nkipirta e inoto ino, teina olong eitu edung'i osotua lino, neton eitu kisuji iyie te nkare neton eitu kiutuutieki emunyan, aashu kirridi too nkarash.

⁵Meetae obo liking'urrie iyie, pee eas embae nabo e kuna to lng'ur te nkaraki iyie; kake kitanang'akaki iyie ong'ata naisiasha, amu kinturrayioki, ina olong apa nikitoiwuoki iyie.

⁶“Ore peyie aaim ine nitii iyie, naadol iyie ishuma tiatua osarge lino, naajoki iye tiatua osarge lino, Miye,

⁷nibulu anaa enkaitubului e ong'ata nibulu niadoru abaiki enkiputakinoto e nkaisiaayiani; netubulutua ilki linono, netubulutua ilpapit linono; nira ake emasipai nemeishopo.

⁸“Ore ina kata naim embata ine nitii naaing'or iyie, ing'ura, itaa apa olerisiori le nyorrata; naaisalaashaki iyie enkila ai, naitoipoo emasipaisho ino: ee naaliki ajoki ainosa olmumai te iyie nikintayu olning'o o iyie, ejo Olaitoriani Enkai, niaku iyie olalai.

⁹Naaitadoiki iyie enkare naisujaa osarge ilo liata, naael iyie te ilata.

¹⁰Aaishopo ake sii too nkilani naaikodo naishopoki iyie inamuka, naaishopoki iyie inkilani naapuyiapuy e kitani naaitoip iyie te nkila napuyiapui.

¹¹Naakus iyie too masaa, naishopoki iyie ilgiso inkaik inono o olpisiai emurt ino.

¹²Naapik olgisoi enkume ino, naapik imuna nkiyiaa inono, napik enkopiyia e nkitoo sidai endukuya ino.

¹³Neaku neijia apa kinkunaki aakus te saabu o te nkosholai. Ore inkilani inono naa kitani napuyiapui sidai o enkila napuyiapui o enkila naikodo; ninya enkurma sidai tenebo enaisho o eilata. Nibulu asidanu oleng, nilotu abau enetii olkitok.

¹⁴Ore iyie niaku ning'oti tiatua iloshon kumok te nkaraki enkishiaa ino, amu aisidai apa oleng eibulayie iloshon te nkaraki ina kishiaa naisul naaishopoko nanu iyie, ejo Olaitoriani Enkai.

¹⁵“Kake isiliga iyie esidano ino, nias ine nkiborra oo nkonyek te nkaraki nitoning'e, nintubulaa enkiborra ino oo nkonyek te lelo likiimaa epuo.

¹⁶Iwaita embata oo nkilani inyi, nintobirakiki ate iwuejitin neeika, niasiasa ine nkiborra oo nkonyek te nchumata enye; eitu aikata etumi inaanyaanyukie, nemeitokini aikata aatum.

¹⁷Iwaita sii kulikae soito le tipat laainei le saabu o le nkosholai ai, lelo laaishoo iyie, nintobirakinye kewan inkaitin naaguetuno nemeishu oo ltung'ana, niasie ninche ine nkiborra oo nkonyek.

¹⁸Niya nkilani inono naaikodo aitoipie ninche, nirragie eilata ai o enkorropil ai te dukuya ninche.

¹⁹Aaishoo iyie emukate ai, aitotio iyie te nkurma napuyiapui o eilata o enaisho irragie te dukuya ninche metaa olng'usil orropil, ejo Olaitoriani Enkai.

²⁰Niya ilayiok linono o ntoyie inono, nena nikitoikio nanu, nintainye ninche olasar peyie emuti. Amaa isiaaitin inono e nkiborra oo nkonyek ke nkiti toki apa

²¹eji metaa iteyiang'a nkera aainei nintarasaa ninche anaa olasar te nkima aitaiki ninche?

²²Ore to lminong lino pooki o te nkiborra ino oo nkonyek eitu idamu nena olong'i inono e kitisho, ina kata minchopo nira emasipai, itii atua osarge lino.

²³“Ore pee eish intorrok inono pooki (Woi, woi iyie! Ejo Olaitoriani Enkai)

²⁴iteshetaka kewan enkaji sidai, nintobiraki kewan ewueji neika too wuejitin pooki e nkanasa, neesotoreki.

²⁵Ore te dukuya e pooki oitoi nalala e nkanasa nishetu ewueji nimborrie onyek esidano ino, nincho kewan pooki ng'ae ogiroo, niponaa esiaai ino e nkiborra oo nkonyek.

²⁶Itaasa sii iyie esiaai e nkiborra oo nkonyek too Lmisiri, tenebo lelo litashare oobore eng'uarrata, niponaa enkiborra oo nkonyek nikintagor nanu.

²⁷Metaa aitorioyie enkaina ai pee aagilunore iyie, naitong'oroo ina rubata nikinchooki iyie, naaitarasaki iyie ilo olubo loo lmang'ati linono, nena toyie oo Lfilisti, nena naatukurrutua te nkaraki olkuaak lino torrono.

²⁸Itaasa sii ine nkiborra oo nkonyek tenebo ile Asiria, amu ira apa olemeraposho; ee nias ine nkiborra oo nkonyek tenebo ninche, neton ake eitu iraposho.

²⁹Intaa kumok isiaaitin inono e nkiborra oo nkonyek tenebo ina kop e biashara enkop oo Ilkaldayo; ore ake sii tena neitu ake iraposho.

³⁰“Kebaa emoyian e nyorrata o ltau lino, ejo Olaitoriani Enkai, idol ajo itaasa kuna baa pooki isiaaitin naaijo osuyai e nkiborra oo nkonyek;

³¹nishetu inkajijik te dukuya pooki oitoi nalala enkanasa, nintobiru iwuejitin inono neeika too wuejitin pooki neetumoreki. Niminyaanyukie ake enkitok naibor onyek, amu itanya ing'amaa elaakinoto ole koisiaayio.

³²Enkitok naibor onyek nang'amu ilomon te rishata o lpayian lenye!

³³Keisho ilewa nkishoorot ing'oruo pooki naibor onyek; kake inchoo iyie inkishoorot inono lelo pooki linyor, irop ninche meetu ine nitii too nkaloli pooki te nkaraki isiaaitin e nkiborra oo nkonyek inono.

³⁴Metaa inyaanyukie apa iyie kulie kituaak te siaai ino enkiborra oo nkonyek, meeta olikitaaraka iyie taa enaibor onyek; nincho olekoisiaayio eitu kinchori iyie olekoisiaayio; metaa ira iyie enapaashaa.

³⁵“Neaku naa, iyie naibor onyek, toning'o ororei lo Laitoriani.

³⁶Inji ejo Olaitoriani Enkai, ore amu eibalunyeki enkurruna ino, neboluni emasipaisho ino tiatua enkiborra ino oo nkonyek tenebo isintan linono o te nkaraki nena aitin inono pooki nemeishu o te nkaraki ilo sarge loo nkera inono nena ninchoo ninche,

³⁷neaku, ing'ura ekaiturrurru isintan linono pooki, lelo litishipakine lelo pooki linyor o lelo limbayie; ekaiturrurru ninche mikitaarare iyie too nkaloli pooki, naboloo emasipaisho ino aboloki ninche, pee etum aatodol emasipaisho ino pooki.

³⁸Naa kaaiguanare iyie anaa nkituaak naagil olning'o le nkiyama neiguanareki ilooibukoo osarge, neyau shumata iyie ilo sarge le ngoro napi o lom.

³⁹Naa kaishooyo iyie apik inkaik oo sintan linono naa kasulaa ilgilat linono negil aauroo iwuejitin inono neeika, naa aikioru ninche iyie inkilani inono neya imasaa inono sidain, niking'uaa iyie ira emasipai, minchopo.

⁴⁰Naa keyau ninche olorora likigilunore iyie, naa aikinang ninche iyie too soito nikidung ninche iyie aitaa ndung'udung'ot too lalema lenye.

⁴¹Naa kepejoo nkajijik inyi neyau enkiguana shumata iyie te dukuya nkituaak kumok; naamitiki iyie pee mias esiaai e nkiborra oo nkonyek, nimintoki aikata aishoru olekoisiaayio.

⁴²Metaa kaitaraposh engoro ai te iyie, neiwuang olom lai te iyie; kaaku nanu olobor, nemaitoki aigil agoro.

⁴³Ore amu eitu idamu nena olong'i e kitisho ino, kake kintagoro nanu oleng te kuna tokitin pooki; neaku kaitalaku sii nanu inkiaasin inono te shumata endukuya ino, ejo Olaitoriani Enkai. Keitu doi ias eloloito aitushulaki olminong lino pooki?

⁴⁴“Ing'ura ajo ore pooki ng'ae oasishore endung'et e rashe naa keasishore ena dung'et e rashe te nkaraki iyie, anaa enatiu ng'otonye, ‘Anaa enatiu entito.’

⁴⁵Ira iyie entito e yieyio lino, ina naiba olpayian lenye o nkera enyena; nira enkanashe oo nkanashera inono, nena naaiba ilpayiani lenye oo nkera enye, ore apa yieyio lino naa e Hiti ore papaai lino naa Olamori.

⁴⁶Ore enkanashe ino botor naa Esamariai, ina naboitare intoyie enyena te nkalo ino e moikuape. Ore enkanashe ino kiti, ina namanya enkalo ino e kopikop naa Sodom tenebo intoyie enyena.

⁴⁷Neitu ake kindip enkiimata oo nkoitoi enye aashu ias enatiu olminong lenye; ore te nkata kiti oleng nitarruoyie alang ninche too nkoitoi inono pooki.

⁴⁸Ore anaa enaishu nanu, ejo Olaitoriani Enkai, ore enkanashe ino Sodom o ntoyie enyena eitu eas ninche anaa ina nitaasa iyie o intoyie inono.

⁴⁹Ena apa entorroni naata enkanashe ino Sodom: ore ninye tenebo ntoyie enyena neeta olwuasa o endaa sapuk o embularoto metii engoloto, kake eitu eretu lelo aisinak o lemeeta toki.

⁵⁰Ekewuasa apa ninche, netaasa imbaa o lminong te dukuya nanu; neaku aiwuang'ie nanu ninche, ina kata nadol ninye.

⁵¹Eitu eas Samaria olpisiai loo ng'ok inono; itaasa intae imbaa kumok o lminong aalang ninche, nintaa nkanashera inyi inaalioo aa supati tiatua nena baa pooki o lminong nitaasa.

⁵²Tanapa esulare ino, iyie sii, amu iyopiruo enkiguana sidai too nkanashera inono; te nkaraki ing'ok inono nena nitaasa te ntorroni oleng alang ninche, etisipa ninche aalang iyie. Metaa tukurru, iyie sii, ninap esulare ino makewan, amu intaa nkanashera inono inemeeta entioto.

⁵³“Ekashuku aiturrurru emunyani enye, emunyani e Sodom tenebo ntoyie enyena o emunyani e Samaria tenebo ntoyie enyena, naa kashuku emunyani inyi tiatua ninche,

⁵⁴peyie itumutumu aatanap esulare inyi nikurrurru te pooki nitaasa, niakuku enkilejilej te ninche.

⁵⁵Ore too nkanashera inono, Sodom tenebo intoyie enyena naa kerrinyokino eneikununo apa te dukuya, ore Samaria o ntoyie enyena nerrinyo eneikununo apa te dukuya; ore iyie tenebo ntoyie inono naa irrinyokino eninkununo apa.

⁵⁶Amaa apa enkanashe ino Sodom keitu eipoti te nkutuk ino teina olong apa o lwuasa lino,

⁵⁷eton eitu eboluni intorrok inono? Indipa taata atotiu anaa ninye, entoki nadol esulare too ntoyie e Edom o lelatia enye pooki o too ntoyie oo Lfilisti, lelo pooki likimanita likimenaa iyie.

⁵⁸Inap iyie enkitamioto e loloito ino, tenebo olminong lino, ejo Olaitoriani.

⁵⁹“Ee, inji ejo Olaitoriani Enkai: Ekaitaas iyie anaa ina nitaasa, ilo otemenayie ilo mumai agil ilo ning'o lo sotua.

⁶⁰Kake kadamu osotua lai tenebo iyie too nkolong'i e kitisho ino, naa kaitasheyie te iyie olning'o lai lo sotua loo ntarasi.

⁶¹Ina peyie ilotu adamu inkoitoi inono nikurru tenaya nkanashera inono, nkanashera inono botoro o nkutiti, naaisho ninche iyie anaa ntoyie, kake mme te nkaraki ilo sotua tenebo iyie.

⁶²Ekaitasheyie osotua lai tenebo iyie, naa iyiolou ajo kara nanu Olaitoriani,

⁶³peyie itum atadamu nimputukuny, nimintoki aekata abol enkutuk ino te nkaraki enkurruna ino, tenaapalaki iyie nena pooki nitaasa, ejo Olaitoriani Enkai.”