Read MAASAI REVISED PROTESTANT Esekiel 17 Bible Online

Esekiel 17 - MAASAI REVISED PROTESTANT bible

Esekiel 17

¹Nelotu ororei lo Laitoriani enatii nanu ejo:

²“Enkerai e tung'ani, tolimu oloyiote niro enkitanyaanyukoto airorie enkaji e Israel;

³tiaaki inji ejo Olaitoriani Enkai, Eewuo olkurragos sapuk oata naipuko sapuki o nkopir naado too naipuko, nebore esidano oo muain kumok, nelotu Lebanon negil ilukuny oo ltarakua;

⁴negilu nena lukuny enye naaipilipil aya ninche enkop namirishoreki, nepik enkanasa oo lbiasharani.

⁵Neitoki aya lelo anterera leina kop neun ninche te nterit napir; nepik ninye embata oo nkariak sapuki; Neitasheyie ninye anaa Enkaitubului nabulu,

⁶nebulu ninye neaku osabibu oti oisalaashari, nerrinyokino ninye ilng'osil lenyena, ore ntona enyena nebik teine neitasheyie ninye. Metaa etaa ninye olchani lo sabibu, neiu ninye ilng'osil kumok neitayu ntapuka.

⁷“Kake etii apa likae kurragos sapuk oata inaipuko sapuki naa sidai oleng emua; nadol ilo shani loo sabibu pee eitorioki ntona enyena ninye peyie etum ninye atipika enkare ninye. Ore teine apa netuunieki ninye,

⁸neitoki ninye aun ninye te nterit sidai natii inkariak sapuki, peyie etum atoiu ilng'osil neiu ilng'anayio, neaku olchani loo sabibu sidai.

⁹Tejo, Inji ejo Olaitoriani Enkai: kebulaa ninye? Aimedotu ninye ntona enyena nedung'oo ilng'osil lenyena, neaku ore nena naipilipil enyena ng'ejuko oo mbenek netoyu? Meya enkaina nagol oo ltung'ana kumok peyie edotuni ninye too ntona enyena.

¹⁰Ore teneitokini aaun kebulaa ninye? Aimetoyu katukul teneosh enkijape oo loosaen ninye, netoyu teine netuunieki ninye?”

¹¹Neitoki ororei lo Laitoriani alotu enatii ejo,

¹²“Tiaaki taata ina aji kiserut, Aimiyiolo enautu kuna baa? Toliki ninche tiaaki, eewuo olaiguanani le Babilon Yerusalem, neya ilaiguanak lenyena tenebo ilkituaak lenyena neyaki ninche ninye te Babilon.

¹³Neya olantererai obo le nkitoo neitayunye olning'o o ninye, nepik ninye abori olmumai. (Ore iltung'ana kituaak leina kop oowa ninye aitung'uaa enkop,

¹⁴peyie etumi aaitoborro ina kitoo nemeitoki ailepie kewan shumata, neaku teneibung olning'o lenye neidim aitasho.)

¹⁵Kake etogolong'ua ninye pee eirriwaki ilbalusuni le Misiri, peyie etum ninche aaishoo mbartan o enjore kitok. Keidim ninye aisula? Keidim oltung'ani ailanyisho oas nena baa? Keidim atigila olning'o neitoki ake ailanyisho?

¹⁶Ore anaa enaishu nanu, ejo Olaitoriani Enkai, esipa ore teine wueji nemanya olaiguanani ilo oitaaki ninye olaiguanani, ilo otanya olmumai lenye, ilo otigila osotua lenye tenebo ninye, te Babilon elo ninye aye.

¹⁷Ore Farao tenebo o enjore enye kitok tenebo enkumoi enye meidim aataretu ninye to larrabal, ina kata nanang'ari inkang'itie nemani aamuat isunta naateshetaki peyie edung'oo enkishui oo lkumok.

¹⁸Ore amu etemenayie ninye ilo mumai, negil olning'o, neishoo enkaina enye metaasa ake kuna baa pooki, meimisho ninye.

¹⁹Metaa inji ejo Olaitoriani Enkai: ore anaa enaishu nanu, esipa katukul ajo ore olmumai lai otemenayie ninye, osotua lai otigila ninye, ekaikilikuanu ninye te lukunya enye.

²⁰Ekaisalaashaki ninye orreshet lai, naa keyae ninye Babilon najing atua enkiguana tenebo ninye teine te nkaraki ina taboi nataasa aagilunore nanu.

²¹Ore lelo arikok le njore enye, nebatata to lalem, ore lelo ooleku neidapashakini pooki shoto naimu enkijape; naayiolou ajo nanu Olaitoriani oiroro.”

²²Inji ejo Olaitoriani Enkai: Ore nanu enkorrok ai naa kaitayu elukunya o ltarakuai oodo, naitayu ninye aipang'ie; nagilu te ntopij, elukunya enye elukunya embeneyioi, naa idol nanu naa kaun ninye te nchumata entopij eine neeika aisul oldoinyo;

²³ore te nchumata oldoinyo le Israel naa kaun ninye peyie etum atoiu ilng'osil neiu ilng'anayio, neaku oltarakuai kitok; ore tiabori enye nemany impukunot pooki oo ng'uesi; ore to loip loo lng'osil lenyena ore impukunot pooki oo motonyi neponari aaisho.

²⁴Neyiolou ilkeek pooki liong'ota aajo nanu Olaitoriani oitadoyio lelo keek adoru, naitubulu aitoodor lelo keek dorropu, naitoi lelo keek oonyori, naitonyorij lelo keek ootoito. Nanu Olaitoriani oiroro naa kaas ina.