Read MAASAI REVISED PROTESTANT Esekiel 18 Bible Online

Esekiel 18 - MAASAI REVISED PROTESTANT bible

Esekiel 18

¹Neitoki ororei lo Laitoriani aigil alotu enatii ejo:

²“Ainyoo eutu ena ning'il ena dung'et e rashe te nkop e Israel, ‘Einosa iloo papa isabibu ooisuisho, ore ilala loo nkera nenoto enkisuisho?’

³Ore anaa enaishu, ejo Olaitoriani Enkai, ore ena dung'et e rashe mintokiki aikata aasishore te Israel.

⁴Ing'ura, ore iltauja pooki naa ilaainei; o ltau sii le papa anaa enatiu oltau le nkerai olalai sii ninye: ore oltung'ani pooki oas ing'ok naa keye.

⁵“Tenaa supat oltung'ani neas ina supat naishiaakino

⁶tenemedaa too ldoinyo aashu edumu inkonyek enyena aing'or nena aitin nemeishu enkaji e Israel, nemeisarkionie enkitok olelatia enye aashu elo enetii enkitok te nkata enye oloirerio,

⁷nemeirony hoo likae tung'ani, kake elaaki ilo oata esile elaata enye, nemeas inenkikonya, neisho emukate enye lelo oata esumash neitoip olemeeta enkila te nkila,

⁸nemeisilenoo eponaa aashu eya pooki ponaroto, neibooyo enkaina enye aitung'uaa ntorrok, nedung enkiguana nasipa terishata oltung'ani o likae

⁹nelo too nkitanapat aainei neing'or oleng agolie nkitanapat aainei, naa supat ninye, eketon ninye eishu, ejo Olaitoriani Enkai.

¹⁰“Teneiu ninye olayioni laa olaikonyani, olaibukoroni lo sarge, ilo lemeas nabo e kuna siaaitin,

¹¹kake edaa te kulo doinyo, neisarkionie enkitok olelatia enye,

¹²neirony lelo aisinak o lelo oata enyamali, neas ine nkikonya, nemeiteng'el ilo mumai, nedumu nkonyek enyena adumaki inkaitin nemeishu, neas imbususi,

¹³neisilenoo te mponaroto neya emponaroto; keitoki pasa aton eishu? Meitoki ninye aton eishu. Etaasa ninye kuna baa pooki olminong, meeta nchere aimeye, naa ore osarge lenye neaku shumata enyeetii.

¹⁴“Kake teneiu ele tung'ani enkayioni nadol nena ng'ok pooki naataasa papaai lenye, neureishoyu, nemeas nena naataasa

¹⁵nemedaa too nchumat oo ldoinyo aashu edumu inkonyek enyena adumaki nkaitin nemeishu enkaji e Israel, nemeisarkionie enkitok olelatia enye

¹⁶nemeinyal likae tung'ani, neshuku ina nainosie olmumai elulung'a nemeas inenkikonya, kake eisho endaa enye lelo oata esumash neishopoki lelo lemeishopo enkila,

¹⁷neibooyo enkaina pee meas intorrok, nemeya ina naponari aashu eponaa, neing'or ajurru irrekiei laainei, nelo tiatua nkitanapat aainei; nemeye ninye too ng'ok e papaai lenye; meeta nchere pemeton eishu.

¹⁸Ore enkaraki papaai lenye, amu eitamoo kewan imbaa enkiba, neikony olalashe lenye, neas ina neme sidai tiatua iltung'ana lenyena, ing'ura, keye ninye te nkaraki ing'ok enye.

¹⁹“Nijo ake, ‘Ainyoo peyie menyamalu ilo ayioni too ng'ok e menye?’ Teneas olayioni ina naishiaakino nesipa, netujurruo oleng inkitanapat aainei, metaa nchere pee meton eishu.

²⁰Ore oltung'ani oas eng'oki naa keye. Menyamalu olayioni te nkaraki ing'ok e menye, aashu enyamalu menye te nkaraki ing'ok o layioni lenye; ore esupatisho osupat neton te shumata e ilo oata, ore entorroni e ilo torrono netonie shumata ninye.

²¹“Kake teneibelekenyunye ilo torrono too ntorrok enyena pooki naataasa neibung inkitanapat aainei neas ina naishiaakino nesipa, meeta nchere pee meton eishu; nemee ninye.

²²Meetae entorroni enye nabo naataasa naitokini aadamu te nkaraki ninye; ore tesupatisho nataasa nemeeta nchere, meton eishu.

²³Kaatayie nanu enchipai keeya e ilo torrono, ejo Olaitoriani Enkai, neme nchere pee eibelekenya ninye te nkoitoi enye neton eishu?

²⁴Kake teneibelekenya oltung'ani supat aing'uaa ina supatisho enye neas ing'ok neas nena bususi olminong pooki naasita ilo tung'ani torrono, keidim atotona eishu ninye? Meetae nabo oo siaaitin naataasa supati naitokini aadamu; amu ore te nkitapong'oto nataayie ninye olarruoni o te ng'oki nataasa ninye, naa kee.

²⁵“Nijo ake, ‘Ore ina oitoi Olaitoriani nemesipa!’ Inining'o tena kata, iyie naaji e Israeli: Amaa enkoitoi ai aimesipa? Aime inkoitoi inyi nemesipa?

²⁶Ore teneibelekenya oltung'ani supat aing'uaa esupatisho enye, neas ing'ok, naa keye te nkaraki ina; keye te nkaraki ina ng'oki nataasa.

²⁷Ake sii, ore teneibelekenyunye oltung'ani aing'uaa nena torrok naataasa neas ina naishiaakino nesipa, naa keitajeu enkishui enye.

²⁸Amu etujurruo neibelekenyunye aing'uaa ntorrok pooki naataasa, meeta nchere peyie meton eishu, meye ninye.

²⁹Nejoito ake enkaji e Israel, ‘Ore enkoitoi o Laitoriani nemesipa!’ Iyie na aji e Israel, amaa nkoitoi aainei aimesipa? Aime nkoitoi inono nemesipa?

³⁰“Metaa ekaaiguanare iyie, iyie na aji e Israel, pooki ng'ae te risioroto oo inkoitoi enyena, ejo Olaitoriani Enkai. Irridu nimbelekenya aing'uaa intorrok inono pooki, aashu eyaku ing'ok inono enkidaaroto ino.

³¹Taarai intung'uai kewan intorrok pooki nena nitaasa kigilunore nanu, nitumokiki ate oltau ng'ejuk o enkiyang'et ng'ejuk! Kainyoo peyie iye naaji e Israel?

³²Amu maata enchipai e keeya e pooki ng'ae ejo Olaitoriani Enkai; metaa imbelekenyunye pee inchu.”