Read MAASAI REVISED PROTESTANT Esekiel 19 Bible Online

Esekiel 19 - MAASAI REVISED PROTESTANT bible

Esekiel 19

¹Ore iyie tudumu enkishirata adumaki ilkituaak le Israel,

²nijo: Kaa lipong apa olng'atuny ng'utunyi tiatua ilng'atunyo! Eitubulua ing'atunyo kutiti tiatua ilng'atunyo.

³Eitubulua nabo oo ng'atunyo enyena, neaku oloti ng'atuny, neitamok kewan eneiko teneibung ing'uesi, nenya ninye iltung'ana.

⁴Ore iloreren nening'oo ninche, nerreshi ninye te ngumoto enye neyau ninche ninye too lala oogamishoreki, aayau enkop e Misiri.

⁵Ore pee edol ng'otonye ajo eisulieki, netaa eiting'o osiligi lenye, neya ninye likae kuoo, too lkuoo lenyena, neitaa oloti ng'atuny.

⁶Neloolo ninye tiatua ilng'atunyo, neaku oloti ng'atuny; neitayiolo kewan eneiko teneibung ing'uesi; nenya iltung'ana.

⁷Nemut aidaikie isempewueti lenye, neitomijooni inkanas enye; ore enkop neiputukuny o lelo pooki oomanya ninye, to ltoilo le nkikurrukur enye.

⁸Ina peyie edumakino ninye iloreren aarare ninye, nepik irresheta pooki alo; neisalaashaki orreshet lenye shumata enye; neyae ninye atua engumoto enye.

⁹Ore too lala oololo nepiki ninye osanduku, oibung'ieki nenapieki ing'uesi neyakini ninye olaiguanani le Babilon; nenapi ninye atua ewueji neikenorieki, peyie meitokini aekata aaning oltoilo lenye, te shumata lelo doinyo le Israel.

¹⁰Etiu apa ng'utunyi anaa osabibu le nkurma, otuunokoki embata enkare, oiu ilng'anayio nebore sii ilng'osil, te nkaraki enkare sapuk.

¹¹Ore enchata enye e mpolos neaku eng'udi o laiguanani; etubulua ninye alus pooki, tiatua nenen neesur oo lng'osil; nedoli enkadori enye, tiatua enkumoi oo lng'osil lenyena.

¹²Kake etadotuoki olchani loo sabibu te ngoro napi, aanang'aki enkop, ore olkutati loo loo saen neitoi ninye; ore ilng'anayio lenyena nedung'ori, ore entonata o lchani ogol neitoi, nemut ninye enkima aidaikie.

¹³Enyaakaki taata aaun to lpurkel, te nkop natoyio nemetii enkare.

¹⁴Neshomo enkima aing'uaa entonata enye, nemut ilng'osil lenyena olng'anayio, metaa metii enetelekua te ninye teina tonata nagol, nemeetae eng'udi o laiguanani. Ore ena naa enkishirata, netaa enkishirata.