Read MAASAI REVISED PROTESTANT Esekiel 2 Bible Online

Esekiel 2 - MAASAI REVISED PROTESTANT bible

Esekiel 2

¹Naajoki ninye nanu, “Enkerai e tung'ani, inyo ntasho too nkejek inono, amu kaairorie nanu iyie.”

²Ore peyie aairorie nanu, naajing Enkiyang'et Sinyati atua nanu naaitasheyie maitasho; naning ninye aairorie nanu.

³Naajoki ninye nanu, “Enkerai e tung'ani, ekaairriwaa iyie airriwaki iltung'ana loo Siraeli, ilo orere ogolong'u; laatogolong'akita nanu; ore ninche o loo menye netaasa eng'oki te nanu o metabaiki ena olong.

⁴Ore sii kulo tung'ana nemeeta enkanyit negolong'u sii: Ekaairriwaa iyie shomo enetii ninche; nijoki ninche, ‘Inji ejo Olaitoriani Enkai.’

⁵Naa tenaa keinining'u aashu eany ening (amu enkaji kiserut ninche) ekeyiolou aajo etii oshi oloiboni atua ninche.

⁶“Ore iyie, enkerai e tung'ani, miureyu ninche, nimiureyu irorei lenye, hoo netii ilaimerrerruak o lkiku tenebo iyie nitonie nkolupani, miureyu irorei lenye, aashu kinture enking'odia enye, amu enkaji kiserut ninche.

⁷Naa ilo iyie airo irorei laainei airorie ninche einining'u o meinining'u amu enkaji ninche nataa kiserut.

⁸“Kake ore iyie, enkerai e tung'ani, inining'u enaajoki iyie; miaku iyie kiserut anaa ina aji kiserut tabolo enkutuk ino inosa ina naaisho iyie.”

⁹Ore peyie aaing'or, nadol aaitoriokoki nanu enkaina, nadol etii olpiyayati le mbuku oigero ina aina;

¹⁰neisalaash ninye te dukuya nanu; nesira inkaloli pokira e ilo piyayati le mbuku, nesira teine irorei le nkishirata o emion o nkigorot.