Read MAASAI REVISED PROTESTANT Esekiel 20 Bible Online

Esekiel 20 - MAASAI REVISED PROTESTANT bible

Esekiel 20

¹Ore to lari le naapishana, to lapa le imiet te nkolong e tomon o lapa, nepuonu embata oo lpayiani le Israel aaikilikuanu mbaa to Laitoriani, netoni te dukuya nanu.

²Nelotu ororei lo Laitoriani enatii naajoki:

³“Enkerai e tung'ani, irorie ilpayiani le Israel nijoki ninche, inji ejo Olaitoriani Enkai, Ainanu ipuonunu aaikilikuanishore pee ietuo? Ore anaa enaishu nanu, ejo Olaitoriani Enkai, mikinkilikuanishorere nanu.

⁴Aiminguanare iyie ninche, enkerai e tung'ani, aiminguanare iyie ninche? Ina pee inchosho ninche metayiolo olminong loo loo menye,

⁵nijoki ninche, inji ejo Olaitoriani Enkai: Ore teina olong apa nategelua Israel, nanya olmumai teina ishoi e nkaji e Yakobo, naitayiolo kewan ninche teina kop e Misiri, ainosa apa olmumai teninche ajo, Kara nanu Olaitoriani Enkai inyi.

⁶Ore teina olong nainosa olmumai te nkaraki ninche inchere kayau ninche aitupuku teina kop e Misiri aya ninche ina kop naing'uraka ninche, enkop naruko kule o enaisho, enkop sidai aisul too nkuapi pooki.

⁷Najoki nanu ninche, entayu enturrai intokitin torrok naadaare nkonyek inyi, pooki ng'ae te intae, nimintokiki aaisarkionie ate too nkitanyaanyukot oo nkaitin nemeishu e Misiri; Kara nanu Olaitoriani Enkai inyi.

⁸Kake etaa ninche kiseruti te nanu nemaaning nanu; eitu eitayu aipang'ie ong'ata pooki tung'ani intokitin torrok naaing'or nkonyek enye neitu eiturraa nena kitanyaanyukot oo nkaitin nemeishu e Misiri. “Nadamu nanu ajo kabukoki engoro ai napi shumata ninche, naishoru engoro ai aarare ninche tiatua enkop e Misiri.

⁹Kake ataasa enataasa te nkaraki enkarna ai, peyie meisarkionieki te dukuya iloreren lelo oomanya atua, lelo laibalakinye kewan edolita aitupuku ninche teinakop e Misiri.

¹⁰Metaa atorikoyie ninche aitung'uaa enkop e Misiri nayau ninche atua olpurkel.

¹¹Naisho ninche nkiguanat aainei naitodol ninche nkitanapat aainei, laa ore pooki tung'ani ogolie asuj ninche, neton eishu.

¹²Ore ake sii aishoo ninche isabatoni aainei, anaa olmonekie te rishata ai o ninche, peyie etum aatayiolo aajo nanu Olaitoriani oitisiny ninche.

¹³Kake ore enkaji e Israel netaa kiseruti te nanu to lpurkel, eitu ninche epuoyie nkiguanat aainei kake etanyaita nkitanapat aainei, naa tenesuj oltung'ani ninche neton eishu; ore isabatoni aainei neisarkionie oleng. “Ina peyie adamu ajo kabuku engoro ai abukoki shumata ninche to lpurkel peyie atum aishie ninche tukul.

¹⁴Kake ataasishe te nkaraki enkarna ai, peyie meisarkionieki ninye te dukuya iloreren, laa ninche aitupukunye ninche edolita.

¹⁵Ore ake sii nainosa olmumai te nkaraki ninche to lpurkel inchere mayau ninche ina kop naishoo ninche, enkop naruko kule o enaisho, enkop naisul te sidano.

¹⁶Ore amu etanyaita ninche nkiguanat aainei neitu epuoyie ninche nkitanapat aainei, neisarkionie isabatoni aainei; amu etusuja iltauja lenye nena kitanyaanyukot oo nkaitin enye nemeishu.

¹⁷Ore ake eyia, eing'urrie enkong'u ai ninche, neaku eitu amut ninche aidaikie aashu aiting'ie ninche tiong'ota.

¹⁸“Najoki nanu nkera enye tiong'ota, emipuoyie nena kitanapat o loo papaai linyi, aashu isujusuju inkiguanat enye, aashu indurukiekie ate too nkitanyaanyukot oo nkaitin enye nemeishu.

¹⁹Kara nanu Olaitoriani Enkai inyi; enchomie nkitanapat aainei ning'oring'oro oleng aajurru nkiguanat aainei,

²⁰niyanyititi isabatoni aainei peyie etum aataa olmonekie te rishata ai o intae, peyie iyiolouu aajo Kara nanu Olaitoriani Enkai inyi.

²¹Kake ore nena kera netaa kiseruti te nanu; eitu ninche epuoyie nkiguanat aainei, neitu ejurru aaing'or inkiguanat aainei, naa te njurrunoto najurruni eishu oltung'ani; eisarkionie ninche isabatoni aainei. “Ina peyie adamu ajo kairriu engoro ai napi shumata ninche naitorioki engoro ai agilunore ninche ti ong'ata.

²²Kake aibooyie nanu enkaina ai, naasisho te nkaraki enkarna ai, peyie meisarkionieki ninye te dukuya iloreren, laa too nkonyek enye aipang'unye nanu ninche.

²³Ore ake sii ainosie ninche olmumai tiong'ata inchere ekaisardakie ninche tiatua iloreren naidapashaa ninche too nkuapi,

²⁴amu eitu eas ninche nkiguanat aainei, kake etanyaita nkitanapat aainei neisarkionie isabatoni aainei, ore nkonyek enye neitoriokino nkitanyaanyukot oo nkaitin nemeishu oo loo menye.

²⁵Ore ake eyia naishoo ninche nkitanapat nena nemesidain o nkiguanat naa te ninche meidim aanoto enkishui;

²⁶naisarkionie nanu ninche te nena kishoorot enye, aisho ninche meishooi to lasar le nkima lelo kikaunot lenye, pee atum aituria ninche; ataasa nanu ina pee etum ninche aatayiolo nchere Kara nanu Olaitoriani.

²⁷“Metaa, nakerai e tung'ani, irorie enkaji e Israel nijoki ninche, Inji ejo Olaitoriani Enkai: Ore ake sii, nena ae toki naatamorie iloo papaai linyi, amu eitarruoitie ninche te dukuya nanu.

²⁸Ore apa peyie ariku ninche ina kop apa nainosie olmumai ajo kaisho ninche, neaku ore pooki doinyo oodo odol aashu olchani ake ninye pooki oata imbenek, neishooyo ninche teine ilasarri lenye, neitarasaa ninche teine olasar le ngoro; neirriwaa teine olasar le ngoro ooki.

²⁹(Naikilikuan nanu ninche, kaji ine wueji neika nipuopuo? Neaku keji enkarna e ine Bama o metabaiki ena olong.)

³⁰Neaku naa tiaaki enkaji e Israel, Inji ejo Olaitoriani Enkai: Indurukiekie ate anaa enaikuna iloo papaai linyi nipong'oriri aasuj nena tokitin enye naaiduruk?

³¹Ore tinintayuyu inkishoorot inyi nintayuyu inkera inyi too lasarri le nkima, nindurukiekie ate too nkitanyaanyukot oo nkaitin inyi nemeishu pooki o ena olong. Naa aikindimidimi intae aaikilikuanishore nanu, na aji e Israel? Ore anaa enaishu nanu, ejo Olaitoriani Enkai, mikinkilikuanishorere intae nanu.

³²“Ore ina natii indamunot inyi nemeaku aekata ina damunoto, ‘Matotiu anaa iloreren anaa iloshon loo nkuapi, nikiserem inkeek o soito.’

³³“Ore anaa enaishu nanu, ejo Olaitoriani Enkai, esipa te nkaina magilani o te nkaina naitoriori, o te ngoro natubukuoki, kaaku nanu Olaiguanani te shumata iyie.

³⁴Ekaaitayu iyie aitupuku tiatua iloreren naiturrurru intae aitung'uaa nkuapi nena nindapashakinote, te nkaina magilani o te nkaina naitoriori, o te ngoro nabukuni,

³⁵naa kayau nanu intae ongota too loshon, najing teine enkiguana tenebo intae king'ura too nkomomi.

³⁶Anaa enatijinga enkiguana tenebo iloo papaai linyi tiong'ota enkop e Misiri, naa kajing enkiguana tenebo intae, ejo Olaitoriani Enkai.

³⁷Ekaimie intae abori eng'udi, naisho intae entijing atua te nkikena.

³⁸Ekaisujaa lelo kiseruti tiatua intae, o lelo ooas intorrok aagilunore nanu; ekaitupuku ninche teina kop nashomo kake mejing ninche enkop e Israel. Ina peyie iyiolouu aajo ara nanu Olaitoriani.

³⁹“Ore te iyie, iyie naaji e Israel, inji ejo Olaitoriani Enkai: Shomo pooki ng'ae isiayia inkaitin oo nkitanyaanyukot inono nemeishu, tenakata o te siadi ena, tinimikining'ining'i nanu; kake ore enkarna ai sinyati mintokiki aikata aaisarkionie too nkishoorot inyi oo nkitanyaanyukot oo nkaitin nemeishu.

⁴⁰“Amu ore te shumata oldoinyo lai sinyati, too nchumat oo ldoinyo le Israel, ejo Olaitoriani Enkai, teine aaisiai enkaji pooki e Israel pooki ng'ae, akaaisiaiai nanu teina kop; naa kang'amaa nanu ninche teine, naa teine aikilikuanu inkishoorot inyi o ntokitin sidain oo nkishoorot inyi, tenebo lasarri linyi oosinya.

⁴¹Anaa esong'uana narropil ekang'amaa intae, ina kata naitupuku intae too loreren, naiturrurru intae aitung'uaa nena kuapi pooki naaidapashakaki intae; naa kaibalunye esinyatisho ai tiatua intae edolita iloreren pooki.

⁴²Niyiolouu aajo Kara nanu Olaitoriani, ina kata nayau intae enkop e Israel, ina kop apa nainosie iloo papaai linyi olmumai ajo kaisho ninche

⁴³ore teine naa idamumu inkoitoi inyi o pooki nitaasa te nena nindurukie ate, naa igorokinono ate te pooki torrono nitaasa.

⁴⁴Naa iyiolouu inchere Kara nanu Olaitoriani, ina kata naitaas intae ina te nkaraki enkarna ai, neme te nkaraki inkoitoi inyi torrok neme te nkaraki isiaaitin inyi torrok, iyie naaji e Israel, ejo Olaitoriani Enkai.”

⁴⁵Nelotu ororei lo Laitoriani enatii naajoki:

⁴⁶“Enkerai e tung'ani, intorioki enkomom ino enkalo e kopikop tolikioi ororei tigilunore kopikop,

⁴⁷nimbonoki agilunore entim e nkop e Negeb ijoki: entim e Negeb toning'o ororei lo Laitoriani, inji ejo Olaitoriani Enkai, ekaainuaaki iyie enkima, naa kemut pooki shani onyori otii atua iyie o pooki shani otoyio; ore ilo olang'at le nkima nemearaiyu, ore inkomomi pooki eiteru te kopikop o metabaiki moikuape naa keilang ninye.

⁴⁸Ore iseseni pooki naa kedol aajo nanu Olaitoriani oinuaa ninye nemeari ninye.”

⁴⁹Ina peyie ajo, “Aha, Olaitoriani Enkai! Aajoki ninche nanu, ‘Aime hoo nkitanyaanyukot ake elimu ele?’ ”