Read MAASAI REVISED PROTESTANT Esekiel 22 Bible Online

Esekiel 22 - MAASAI REVISED PROTESTANT bible

Esekiel 22

¹Ore ake sii eewuo ororei lo Laitoriani ine natii naajoki:

²“Nakerai e tung'ani, aiminguanare iyie, aiminguanare iyie enkanasa osarge? Nimbalakinye ninye nena baa pooki olminong enyena.

³Naa ijoki, inji ejo Olaitoriani Enkai: Ore enkanasa naibukoyie osarge te rishata enye; peyie etum enkata enye aeu, neitobiru nkitanyaanyukot oo nkaitin nemeishu aidurukie kewan!

⁴Itaa iyie torrono te nkaraki osarge limbukoitie; ninduruko te nena kitanyaanyukot oo nkaitin nemeishu nintobirutua, niyautua aaitinyiku enkolong inyi etabawua ina kata nageluno oo larin linyi. Neaku aaitaa iyie enkurruna too loreren, nikisurdaanyi iyie too nkuapi pooki.

⁵Ore lelo ootaana o lelo oolakua te iyie naa aikisurdaany iyie, iyie neme toki, nebore enking'oling'ol.

⁶“Ng'ura ajo ore lelo kituaak le Israel netii atua iyie, pooki ng'ae te ngolon enye, netemerregelaki to sarge oibukori.

⁷Ore papa o yieyio neitaasaki ino lmena tiatua iyie; ore olomoni otii atua iyie neisimaki te rishata ino; ore nkokishin o nkolia tiatua iyie neinyalaki.

⁸Itemenayie iyie intokitin aainei sinyat, nisarkionienie isabatoni aainei.

⁹Etii iltung'ana ootii atua iyie ooiro imbaa enkarruoisho pee eibukori osarge, oltung'ana tiatua iyie oodaa too nchumat oo ildonyio; iltung'ana ooas enkarruoisho tiatua intae.

¹⁰Ore tiatua iyie neoru iltung'ana iloo menye ilkilani, ore tiatua iyie neibung inkituaak te rishata enye o lapa.

¹¹Eas obo olminong te nkitok ole latia enye; ore likae neotiki te nkoitoi torrono ainyal enkitok olayioni lenye; ore likae tiatua iyie neinyal enkanashe enye, entito e papaai lenye.

¹²Ore ake tiatua iyie neya iltung'ana eropare peyie eibukoo osarge; niyaya ilaat emponaroto e dupoto inyi too lelatia linyi ironyironyo; nemeekure kidamumu nanu, ejo Olaitoriani Enkai.

¹³“Ing'ura, ore naa, atoosho inkaik aainei tenebo teina dupoto e lejare nintobirua o te ilo sarge otii erishata ino.

¹⁴Keidim engolon ino e oshoke atobikoi, aashu keidim inkaik inyi aatagol, te nena olong'i naalotu aarare iyie? Nanu Olaitoriani oiroro, naa kaas ina.

¹⁵Ekaaidapash iyie tiatua iloreren naisardakie iyie too nkuapi, namut ilduruki linono te iyie.

¹⁶Naa kaaisarkionieki nanu te dukuya iyie tiatua iloreren; niyiolou ajo Kara nanu Olaitoriani.”

¹⁷Nelotu ororei lo Laitoriani enatii naajoki:

¹⁸“Enkerai e tung'ani, ore enkaji e Israel netupuruko[5] oleng te nanu, ninche pooki. Ore enkosholai o suyai o empirbil o esekenkei o risasi otii atua olkokuet, netupuruko pooki.

¹⁹Neaku inji ejo Olaitoriani Enkai: Ore amu itupuruko pooki, neaku ing'ura ekaiturrur intae te rishata e Yerusalem.

²⁰Ore anaa enaiturrurru iltung'ana enkosholai o suyai o esekenkei o risasi o empirbil nepik atua olkokuet peyie ekutaki ninche enkima shumata ninye peyie etum aatoshol ninye; neaku kaiturrurru intae te ngoro ai o te ngoro ai napi, napik intae atua ashol intae.

²¹Ekaiturrur intae nakutaki intae enkima engoro ai napi, naa kesholi intae te rishata enye.

²²Anaa enasholi enkosholai to lkokuet, naa kesholi intae te rishata enye; naa iyiolouu ajo nanu Olaitoriani otubukoko engoro ai shumata inyi.”

²³Nelotu ororei lo Laitoriani enatii naajoki:

²⁴“Enkerai e tung'ani tiaaki ninye, ira iyie enkop nemesinya, aashu natashaikia teina olong e ng'oro.

²⁵Ore ilkituaak ootii atua ninye netiu anaa olng'atuny oikurrukur opolos eng'ues, etumuta enkishui oo ltung'ana; ewaita ninche ilchumat o ntokitin naagol enkinyiang'a; eitaa ninche inkituaak kumok inkolia.

²⁶Ore ilapolosak lenye netaasa ine nkikonya too nkitanapat aainei neisarkionie intokitin aainei sinyat; eitu ninche erishu intokitin sinyat o ntokitin e pooki ng'ae, neitu eitamok olorere enepaashare entoki naiduruk o esidai, netemenaitie ninche isabatoni aainei, metaa aaisarkionieki nanu tiatua ninche.

²⁷Ore ilkituaak ootii erishata enye netiu anaa isuyian oopolos inkiri e ng'ues naibung'a, neibukoo osarge, neishu enkishui peyie etum nena kishoorot nemesipa. Ekairriu enchan sapuk oleng, isoito sapuki le nchan, nelotu olkutati kitok oleng.

²⁸Ore iloibonok lenye netumura te nturoto e monkoi, nedol induaat nemesipa, neibonoki ninche elejare ejoki: ‘Inji ejo Olaitoriani Enkai’, eitu ninye eiro Olaitoriani.

²⁹Etaasa iltung'ana lena nkop entorrono, netaasa ine nkikonya; eironya ninche ilaisinak o loomena, netaasa ine mesipa too ldokunot eitu ejurru enyamali enye.

³⁰Naing'oru oltung'ani tiatua ninche olo ashet ina suntai neitashe teina lusie e suntai te dukuya nanu te nkaraki ina kop, peyie matum aidaikie ninye; kake eitu atum hoo obo.

³¹Metaa atubukuo nanu engoro ai shumata ninche; atumuta nanu ninche te nkima engoro ai napi; ore enkoitoi enye eitalakua too lukuny enye, ejo Olaitoriani Enkai.”