Read MAASAI REVISED PROTESTANT Esekiel 23 Bible Online

Esekiel 23 - MAASAI REVISED PROTESTANT bible

Esekiel 23

¹Nelotu ororei lo Laitoriani enatii naajoki;

²“Enkerai e tung'ani, etii apa inkituaak are naa intoyie enkitok nabo;

³neiborrie apa onyek te Misiri; neas ine nkiborra oo nkonyek te kitisho, neirrag ilki lenye, neirrapirrapi ilgooitie lenye.

⁴Keji apa enkarna eina botor Ohola neji enkarna enkanashe enye Oholiba. Neaku ninche inaainei, neiu ninche ilayiok o ntoyie. Ore too nkarn enye ore Ohola naa Samaria ore Oholiba naa Yerusalem.

⁵“Eiborrie ong'u Ohola aa enaai ninye, netonyarra ninye isintan lenyena, le Asiria,

⁶ilmurran ooishopo inkilani naata emua morijoi, ilaitoriak o laitasheikinok, laa ore pooki naa ilbarnot oo ng'uarri oleng, nekedito ninche imbartan.

⁷Eishoo ninye kewan ninche anaa emulayoi lelo gelunot pooki le Asiria; neidurukie kewan too nkitanyaanyukot oo nkaitin e pooki ng'ae otaasie ine nkiborra oo nkonyek.

⁸Eitu ninye epal esiaai enye enkiborra oo nkonyek ina apa nataasa eiteru too nkolong'i naatiiyie Misiri; amu ore apa te kitisho enye netaboitare ilewa ninye, neibung'a olgoo, netaboitare ninye etonaa eselenkei te mulayaisho nebukoki ninye enkiborra enye oo nkonyek.

⁹Metaa atanang'aka nanu ninye atua inkaik oo sintan lenyena, inkaik oo le Asiria lelo apa ootonyorra te nkiborra oo nkonyek.

¹⁰Nebolu lelo emasipaisho enye; neibung ilayiok lenyena o ntoyie enyena; ore tenebo ninye nedung to lalem; neaku ninye entoki naimakini tiatua inkituaak ina kata nadung'okini ninye enkiguana.

¹¹“Ore enkanashe enye Oholiba netoduaa ena naa torrono apa ninye oleng alang enkanashe enye te nkiborra oo nkonyek.

¹²Eiborrie ninye onyek too le Asiria, ilkituaak o larikok, ilmurran ooishopo too masaa olarrabal, ilookedito imbartan, laa ore pooki naa ilbarnot oong'uarrayu.

¹³Nadol apa ajo eidurukieki ninye; neim pokira orrekie obo.

¹⁴Kake etanapa ninye enkiborra enye oo nkonyek aitulus; etoduaa ninye ilewa, ootaguetakaki inkitanyaanyukot enye isunta nena kitanyaanyukoto oo Ilkaldayo ooela to rankii oonyokie,

¹⁵nerretena impolosi enye too nkeenta oo mpolosi o nkarash natii ilukuny enye netiu pooki anaa ilkituaak, empisha oo Ilbabilon laa ore enkop enye naa Ilkaldayo.

¹⁶Ore peyie edol ninye ninche neiborrie onyek te ninche neirriwaki ilkiliku ninche too Ilkaldayo.

¹⁷Nejing'aki Ilbabilon ninye tiatua endapash enye enyorrata, neidurukie ninye to lng'uarra lenye; ore peyie eidip ninche aaisarkionie ninye, nelo ninye aing'uaa ninche te ngoro.

¹⁸Ore teneas ninye inenkiborra oo nkonyek meeta enkuretisho neboloo emasipaisho enye aaibelekenya te ngoro aing'uaa ninye, anaa peyie aibelekenya aing'uaa enkanashe enye.

¹⁹Kake etoponayie ake ninye enkiborra oo nkonyek, edamu inkolong'i enyena e kitisho, ina kata eiborrie onyek te nkop e Misiri.

²⁰Neiborrie ninye onyek te lelo mao lenyena ooba irubat oo seseni lenye anaa inoo sirkon neeta esing'ate oo lamuyeishi loo mbartan oonyaanyukie isirkon, neikununo eneing'uaa anaa enetiu eneing'uaa imbartan.

²¹Neaku neijia etiu eyieunoto e ntorroni oo lbarnot linono ina kata kimbung Ilmisiri olgoo lino neirony ilki linono kutiti.”

²²Metaa, oi iyie Oholiba, inji ejo Olaitoriani Enkai: “Ing'ura ajo kadumakino ilmao linono limbelekenyakine te ngoro mikitigilunore iyie eing'uaa nkaloli pooki.

²³Ore ile Babilon tenebo Ilkaldayo pooki o Pekod o Shoa o Koa, tenebo ile Asiria pooki tenebo ninche o ltung'ana pooki ooti sidain, ilaiguanak o laitoriak pooki tenebo, ilarikok o lmurran, ekedito pooki imbartan.

²⁴Naa aikipuonu aarare iyie eing'uaa enkalo e moikuape too ngarrin oo imbartan o ngarrin o lorora kitok lo lorere; keiturrurro ninche peyie kiarare too nkaloli pooki eeta ilong'oi kutiti o sapuki o nkopiyiani o larrabal, naa kapik enkiguana atua ninche, naa keiguanare intae anaa enatiu enkiguana enye.

²⁵Naa kaibelekenyaki intae engoro ai aarare intae, peyie atum ataarare intae te ngoro napi. Kedung'oo ninche inkumeishin inyi o nkiyiaa inyi, ore ilekunot linyi nebatatakino olalem. Naa keibung aaya ilayiok linyi o ntoyie inyi, ore ilekunot linyi nemuti te nkima.

²⁶Keoru sii intae inkilani inyi neya te intae isoito linyi linkasiesie.

²⁷Neaku neijia aiko tenaiting'ie enkiborra inyi oo nkonyek ina niyautua te nkop e Misiri; metaa mintokiki aaraposhoki nkonyek inyi Ilmisiri aashu intokiki aadamu ninche.

²⁸Amu inji ejo Olaitoriani Enkai: Ing'ura ajo kapik intae atua inkaik e lelo limbaba, atua inkaik e lelo limbelekenyanya aaing'uaa te ngoro;

²⁹naa kearare ninche intae te nkiba, neya ninche aaitung'uaa intae ilng'anayio pooki le siaai inyi, neing'uaa intae irara imasipa nemeishopo, ore emasipaisho inyi o enkiborra oo nkonyek inyi neboluni. Ore olng'uarra lino tenebo enkiborra ino oo nkonyek

³⁰ninye nayawua ena shumata iyie, amu itaasa enkiborra oo nkonyek tenebo iloreren, nindurukie ate too nkitanyaanyukot enye oo nkaitin.

³¹Itusuja iyie ina oitoi enkanashe ino; metaa kapik enkikompe enye enkaina ino.

³²Inji ejo Olaitoriani Enkai: “Iok iyie enkikompe enkanashe ino, ina nagut naa sapuk; aikikueneiyieki iyie nikimenuni, amu keeta ninye esapuk;

³³aikimputi iyie emerei o sina Enkikompe enkuretisho sapuk o emutata, ina kikompe enkanashe ino Samaria;

³⁴iok iyie ninye nimitu pooki aishu, nidotu kewan ilpapit, nidung ilki linono; amu airoro nanu, ejo Olaitoriani Enkai.”

³⁵Metaa inji ejo Olaitoriani Enkai: “Ore amu kitorikine iyie nanu, nikinyaaya oriong ino, neaku tanapa naa enyamali ino olng'uarra lino o enkiborra ino oo nkonyek.”

³⁶Naajoki nanu Olaitoriani: “Enkerai e tung'ani, inguanare iyie Ohola o Oholiba? Neaku imbalakinye naa ninche imbaa enye olminong.

³⁷Amu etaasa ninche ine nkiborra oo nkonyek, netii osarge atua inkaik enye; ore too nkitanyaanyukot oo nkaitin enye nemeishu netaasa eloloito; neishoo doi ninye endaa lelo ayiok laa nanu etoikitio.

³⁸Ore ake sii eyia aaitaasa ninche nanu ena: eisarkionie ninche ewueji ai sinyati teina olong ake neisarkionie isabatoni aainei.

³⁹Amu ore peyie eidip aateyieng inkera enye te mpolosare too nkitanyaanyukot oo nkaitin enye nemeishu, ore teina olong ake neetuo ninche atua ewueji ai sinyati aaisarkionie ninye. Naa ing'ura ena etaasa ninche te nkaji ai.

⁴⁰Eipotutuo doi ninye iltung'ana meetu tenelakua naa nepuonu. Amu tiatua ninche isuja iyie kewan, niyel inkonyek inono, nikus kewan too masaa;

⁴¹nitonini intae te shumata olorika sidai, niata emisa natipikaki dukuya iyie naa ninye itipika iyie enkorropil ai tenebo eilata ai.

⁴²Netii atua ninye oltoilo loo lororani lemeshilaa toki; tenebo ilewa ookishore tenebo ootorikuoki tiong'ota, nepik ninche ilkataarri inkaik e nena kituaak o maupen enkitoo sidain too ilukuny enye.

⁴³“Ina peyie ajo, aimeasita tena kata ilewa eloloito teneas enkiborra oo nkonyek tenebo ninye?

⁴⁴Amu etijing'akita ninche ninye, anaa enajing'aki ilewa enkitok naibor onyek. Neaku neijia eikunakinote ninche Ohila o Oholiba peyie eas ine nkiborra oo nkonyek.

⁴⁵Kake ore iltung'ana supati naa kedung'oki ninche enkiguana oo iltung'ana ooiborr onyek, tenebo o enkiguana oo nkituaak naaibukoitie osarge; amu inaaibor onyek ninche, netii osarge inkaik enye.”

⁴⁶Neaku inji ejo Olaitoriani Enkai: “Iyau olorora taarare ninche, nintaa ninche entoki naitureisho naaruno.

⁴⁷Naa kenang olorora ninche too soito neiwuang'ie ninche too lalema lenye; naa keyieng ninche ilayiok lenye o ntoyie enye nepejoo inkajijik enye.

⁴⁸Neaku neijia aiko tenaiting'ie enkiborra enye oo nkonyek te nkop peyie etum ing'oruo pooki aaibung'ie ina inkiyiaa nemeitoki aas ine nkiborra oo nkonyek anaa enitaasa iyie.

⁴⁹Ore enkiborra inyi oo nkonyek naa keitalakuni te intae, ninapinapa elaakinoto te nkaraki eng'oki oo inkitanyaanyukot inyi oo nkaitin nemeishu; niyiolouu aajo Kara nanu Olaitoriani Enkai.”