Read MAASAI REVISED PROTESTANT Esekiel 25 Bible Online

Esekiel 25 - MAASAI REVISED PROTESTANT bible

Esekiel 25

¹Nelotu ororei lo Laitoriani enatii aajoki,

²“Enkerai e tung'ani, intorioki enkomom ino enkalo oo Lamoni, imbonisho tigilunore ninche.

³Tiaaki Ilamoni: Entoning ororei lo Laitoriani Enkai: Ore amu itejo ‘Aha!’ Te nkaraki ewueji ai sinyati ina kata peyie eisarkionieki ninye o te nkaraki ina kop e Israel ina kata peyie eitaa ninye mitil o te nkaraki ina aji e Yuda ina kata peyie elo eyararoto;

⁴neaku kaaitarasaa iyie aitarasaki iltung'ana le nkalo o loosaen peyie iaku emasaai enye, naa keitasheyie ninche ilng'oborri lenye tiatua intae neitobiru imanyat enye tiatua intae; naa kenya ninche ilng'anayio linyi, neok ninche kule inyi.

⁵Ekaitaa Raba olokeri loo ntamesin, ore nkanas oo Lamori emuatata oo ntare. Niyiolouu taa aajo Kara nanu Olaitoriani.

⁶Inji ejo Olaitoriani Enkai: ore amu itoosho inkaik inyi nioshieshie inkejek inyi enkop nishipapa te nkaraki intorrok pooki naatii atua intae te nkaraki enkop e Israel,

⁷metaa, neaku aitorioyie nanu enkaina ai aagilunore iyie naa kaaitarasaa iyie anaa iyarunot aitarasaki iloreren; naa kaadung'oo iyie aaitung'uaa loreren; naaisho iyie ndaai too nkuapi; ekaaidaikie iyie. Pee itum iyie atayiolo ajo Kara nanu Olaitoriani Enkai.

⁸“Inji ejo Olaitoriani Enkai: Ore amu etejo Yuda, ing'ura ajo ore ina aji e Moab netiu anaa ilkulikae oreren pooki,

⁹neaku kaboloo inkanas oo lpolosien le Moab eiteru too nkanas naatii ilpolosien lenyena o ina kop e Beteshimot o Baalmeon o Kiriatai.

¹⁰Ekaishooyo ninye tenebo ile Amoni o metabaiki iltung'ana le nkalo o loo saen metaa enjung'ore, metaa meitokini aekata aadamu too loreren.

¹¹Naa kadung'oki Moab enkiguana; ina peyie etum aatayiolo nchere Kara nanu Olaitoriani.

¹²“Inji ejo Olaitoriani Enkai: Ore amu etaasa Edom entorrono aarare enkaji e Yuda, naaitagoro ninye aitalaku elap te ninche.

¹³Metaa nji ejo Olaitoriani Enkai, ekaitorioo enkaina ai aarare Edom, nadung'oo tiatua ninye tung'ani o eng'ues; naa kaitaa ninye mitil; eiteru te Teman o metabaiki Dedan naa kebatata ninche to lalem.

¹⁴Naa kapik elap ai shumata Edom te nkaina oo ltung'ana laainei Isiraeli; naa keas ninche te Edom anaa enatiu engoro ai anaa enatiu; naa keyiolou ninche elap ai, ejo Olaitoriani Enkai.

¹⁵“Inji ejo Olaitoriani Enkai: ore amu eitalakutua Ilfilisti elap neya ina to lwuasa lo ltau pee eidaikie teilo omang'ati lemeish;

¹⁶neaku inji ejo Olaitoriani Enkai: Ing'ura ajo kaitorioo enkaina ai agilunore Ilfilisti, naa kadung'oo ile Kereti, namut iloomanaa le naiposha.

¹⁷Ekairriu elap sapuk shumata ninche te ngoro sapuk e nkitamioto. Ina pee eyiolou ninche aajo Kara nanu Olaitoriani, ina kata naiteleiki elap ai shumata ninche.”