Read MAASAI REVISED PROTESTANT Esekiel 27 Bible Online

Esekiel 27 - MAASAI REVISED PROTESTANT bible

Esekiel 27

¹Nelotu ororei lo Laitoriani enatii naajoki:

²“Ore tena kata nakerai e tung'ani tudumu enkishirata nchiraki Tiro nijoki ninye,

³nijoki Tiro, ina naton namanya enejing'ieki enaiposha, olbiasharai le lelo tung'ana to loomanaa loo naaiposha, inji ejo Olaitoriani Enkai: ‘Oi Tiro, itejo iyie, atimitunye nanu te nkishiaa.’

⁴Ore ilpolosien linono netii empolos oo naaiposha; ore ilashetak linono netimitunye kinkishiaanie iyie.

⁵Eitobirutua ninche imbaoi inyi pooki too lkeek ooing'uaa Semir; neyau iltarakua aaitung'uaa Lebanon nikintobiraki iyie eng'ape naado.

⁶Ore too lkeek oonyaanyukie ilng'abolo le Bashan, nintobiru ilkurteta[7] le meli; neitobiru ewueji ino neitasheyieki too nkeek olchani oing'uaa olomanaa le naiposha e Kupro, nepik ine ilala loo lkanchaoni.

⁷Tenebo enkitani sidai naikodo naing'uaa Misiri, naa ninye apa olkarasha oreu emeli, naa ninye naitashe anaa enanka ino; enkarasha pus o emorijoi naing'uaa olomanaa le naiposha e Elisha, naa ninye apa enchuret ino.

⁸Ore lelo oomanya Sidon o Arfad naa ninche ilarewak linono loo melin, ore iltung'ana linyi arriyiak le Semer netii apa atua intae, ninche apa ilarewak linyi loo melin.

⁹Ore lelo ashetak le meli, le Gebal o ltung'ana arriyiak netii atua iyie, kinukaki ilbaat loo melin inono. Ore nena melin pooki e naiposha tenebo isikarini le naiposha netii atua iyie, eitawalaa imasaa inono e biashara.

¹⁰“Ore apa Pasia o Lud o Put netii atua enjore inyi anaa iltung'ana linyi lo larrabal; neik ninche nena long'oi enye tenebo imaupen tiatua iyie; neisho ninche intae esidano enye.

¹¹Ore lelo tung'ana le Arfad o Helek netii apa isunta inyi aamanita, ore iltung'ana le Gamad netii sii ninche iltaleta linono; neik ninche ilong'oi enye too isunta inono aaitaman; neitisidan aitaa bayarot enkishiaa inyi.

¹²“Ore Tarshishi nikitoning'ore te siaai e biashara enye amu iata imasaa kumok e pooki pukunoto; enkosholai o esekenkei, empirbil o risasini. Eitawalunye ninche imasaa inyi e biashara.

¹³Ore Yafan o Tubal o Meshek netimirishote tenebo iyie; eitawalunye ninche iltung'ana nena masaa o suyai aawalunye imasaa inyi.

¹⁴Ore Betogarma newalunye imasaa inyi mbartan olarrabal o nyumpui.

¹⁵“Ore lelo tung'ana le Rode netaasa biashara tenebo intae; iloomanaa loo naaiposha iwuejitin inyi nimirishorere, eyakita intae te laata ilala loo lkanchaoni o nkeek oltiasika.[8]

¹⁶Ore Edom nikitoning'ore te siaai e biashara, te nkaraki enkumoi oo masaa inono; eitawalunye ninche imasaa inyi isoito oonyori o nkilani morijo, intokitin naaikodo, kitani naapuyiapui, o sikira le naiposha o soit oji agate.[9]

¹⁷Ore Yuda o ina kop e Israel netimirishote tenebo iyie; einyang'utua imasaa inyi emirare te nkano, too loirienito o lng'abolo le dukuya, o inaishi o ila, o lchani oji Seri[10].

¹⁸Ore Dameski netijing'a esiaai e biashara tenebo iyie te nkaraki enkumoi oo masaa inono, te nkaraki enkumoi ino oo masaa e pooki pukunoto; enaisho oo sabibu e Helbon, o ilpapit ooibor loo ntare,

¹⁹o enaisho oo sabibu naing'uaa Usal newalunye ninche too ntokitin inyi; isekenke naasika, o enkaitubului naji mdalasini, o enkaitubului naji mchai naatii apa atua imasaa inono e biashara.

²⁰Ore Dedan netaasa esiaai e biashara tenebo iyie too nkilani naarewueki imbartan.

²¹Ore Arabia tenebo ilkituaak pooki le Kedar naa ilamirak linono linyor too ilkuoo linono le kerra, o lmeregeshi tenebo inkineji; neaku te nena apa etaasa biashara tenebo iyie.

²²Ore ilbiasharani le Sheba o Rama netaasa biashara tenebo iyie; newalunye ninche imasaa inyi e nkorropil oo mpukunot pooki naaisul te sidano o soito pooki oogol enkinyang'a, o saabu.

²³Ore Haran, o Kane, o Eden o Ashur tenebo Kilmad netaasa esiaai e biashara tenebo iyie.

²⁴Etaasa ninche biashara too nkilani sidain, te nena kilani pusi o nkilani naaikodo, o too ilkarash ooisalaashi tiatua iltirenito loo muain kumok neteenaki too lgoso aaitirrish; naa te kuna apa etaasie ninche biashara tenebo iyie.

²⁵Ore imelin e Tarshishi nepuo te nkaraki intae enapita imasaa inyi nimirimiri. “Metaa kimputaki apa iyie nikiroishiyieki oleng tiatua ineegut oo naaiposha.

²⁶Ore ilarewak linono loo melin nikintupukutuo iyie aapik inaaiposha naado. Ore olkutati lo loosaen nikitoosho amut te mpolos oo naaiposha.

²⁷Ore enkarsisisho ino, o masaa inono, o ntokitin inono e biashara, o sikarini linono le naiposha o lelo arewak le meli, lelo aripak linono le meli o lbiasharani linono, o ltung'ana linono pooki lo larrabal otii atua iyie, tenebo olorora lino pooki, lelo ootii atua erishata ino. Nedoiki pooki empolos oo naaiposha, teina olong ino enkidaaroto.

²⁸Ore to ltoilo le nkishirata lo lkiyioi loo larewak linono le meli ore nkuapi naamanita neikirikira,

²⁹ore tiabori imelin enye, mepuonu lelo pooki aaing'uaa. Ore lelo sikarini le naiposha tenebo pooki ootii atua emeli o larewak loo melin, neitashe pooki te nkop natoyio

³⁰nikinchiraki ninche iyie to ltoilo sapuk, neishir too lkiyio le mion. Nepik enterit ilukuny enye neiperipera too nkuruon;

³¹nebarn ninche ilukuny enye te nkaraki iyie, neen ate too lkuniyiani neishiraki intae oleng te mion sapuk oltau, te nkishirata sapuk e mion.

³²Ore to lkiyioi lenye, nikidumaki iyie enkishirata, nikinchiraki iyie ejo; ‘Aing'ae aekata eidaikieki anaa Tiro, te mpolos e naiposha?

³³Ore tenepuku imasaa inyi too naaiposha, nintaraposh iyie iltung'ana kumok; te nkumoi ino oo masaa e biashara ino, inkarsisiyie lelo aiguanak le nkop.

³⁴Ore taata nikitumutaki aaidaikie too naaiposha, too neegut e nena ariak; ore imasaa inono pooki nimirita tenebo iltung'ana linono pooki liaata neimiso pooki tenebo iyie.’

³⁵“Ore lelo pooki oomanya olomanaa le naiposha, neing'asiate te nkaraki iyie; ore ilaiguanak lenye neiruto oleng, ore inkomomi enye netanyamala.

³⁶Ore lelo biasharani otii atua iltung'ana neisulisho te nkaraki iyie; ieuo iyie enkiting'oto torrono oleng nimikintokini aekata aata intarasi.”