Read MAASAI REVISED PROTESTANT Esekiel 28 Bible Online

Esekiel 28 - MAASAI REVISED PROTESTANT bible

Esekiel 28

¹Nelotu ororei lo Laitoriani enatii naajoki:

²“Enkerai e tung'ani, tiaaki ilo kitok le Tiro, inji ejo Olaitoriani Enkai: “Ore amu kewuasa oltau lino, nitejo iyie, ‘Ara nanu Enkai. Aton nanu te ilo orika loo nkaitin, te mpolos oo naaiposha; nira ake sii tung'ani, nimira Enkai, hoo naa idol kewan anaa ira ng'en anaa Enkai.

³Ijo doi iyie ira ng'en alang Daniel? Metii entoki naisudoro te iyie;

⁴teng'eno ino o tening'unoto ino inotoko kewan imasaa, ninturrurruo saabu o enkosholai apik atua arsisisho ino;

⁵teng'eno ino nagut e biashara itoponayie imasaa inono, netawuase oltau lino too masaa inono,

⁶neaku inji ejo Olaitoriani Enkai: Ore amu idol kewan anaa olotiu anaa Enkai te ng'eno,

⁷neaku, ing'ura, ekayau nanu ilomon atua iyie lelo ooitureisho oleng loo loreren, naa keshutu ninche ilalema lenye aarare esidano eng'eno ino nagut neisarkionie esikar ino.

⁸Naa kenang'aki ninche intae engumoto niyeye intae enkeeya e lelo ooyieng'i te mpolos oo naaiposha.

⁹Eton ake ijo: Ara nanu enkai! Te dukuya lelo likiyieng iyie, hoo nira tung'ani neme Enkai, tiatua inkaik e lelo likipik iyie ilbaa?

¹⁰Iye iyie aya enkeeya e ilo lememurata te nkaina oo ltung'ani leeiking'a, ilo omoni, amu airoro nanu ejo Olaitoriani Enkai.’ ”

¹¹Ore ake sii eewuo ororei lo Laitoriani enatii naajoki:

¹²“Enkerai e tung'ani, teyietu olkiyioi intorioki olaiguanani le Tiro, nijoki ninye, Inji ejo Olaitoriani Enkai: Ira apa iyie enkitanyaanyukoto bayaroti, kibore apa eng'eno nagut, nitimitunye te nkishiaa.

¹³Itii apa iyie Eden, ina kurma e Nkai; ore apa pooki soit ogol enkinyang'a naa ninye intoipore, isoito ooji Karnelian o Topas o Yaspa o Krisolit o Beril o Oniks o Safire o Karbunkol o emerald; ore saabu nasiluno naa ninche apa ininono, ninche apa isoito liguetiguete, ore teina olong apa nikintobiruaki iyie ina kata eitobiruaki sii ninche.

¹⁴“Aaitaboitaka iyie olmalaika likirrip. Itii apa iyie enchumata oldoinyo sinyati le Nkai, nishomo aimaa isoito le nkima.

¹⁵Miata apa iyie entioto too nkoitoi inono, eiteru teina olong apa nikintobiruaki o menoti ing'ok tiatua iyie.

¹⁶Ore te nkumoi e biashara ino nikibore apa iyie olarrabal, nias iyie eng'oki; neaku aatanang'ayie iyie anaa entoki naisarkionieki aaitung'uaa oldoinyo le Nkai, ore ilo kerubi arriponi nikiaraa iyie aipungie ong'ata aitung'uaa empolos e lelo soito ooimerlel.

¹⁷Ore apa oltau lino naa kewuasa te nkaraki enkishiaa ino; inyala iyie eng'eno ino nagut te sikar ino. Aatanang'aka iyie enkop; aataboloyie iyie te dukuya ilaiguanak meitaraposho nkonyek enye te iyie.

¹⁸Ore te nkumoi oo ing'ok inyi, teina nemetii esipata biashara inyi nisarkionie iwuejitin inono sinyat, neaku ayawua atua iyie enkima aitung'uaa erishata ino; nikinya ninye iyie amut, naaibelekeny iyie aitaa nkuruon tioriong enkop, te dukuya lelo pooki likitoduaa iyie.

¹⁹Ore lelo pooki likiyiolo iyie too loreren neing'asia te iyie, itabaikia iyie enkiting'oto torrono, nimintoki atii intarasi.”

²⁰Nelotu ororei lo Laitoriani enatii naajoki:

²¹“Enkerai e tung'ani, intorioki enkomom ino enkalo e Sidon, nimbonoki aarare ninye

²²nijo inji ejo Olaitoriani Enkai: Ing'ura ajo kaarare iyie, oi iyie Sidon, naa kaibalie enkitoo ai tiatua iyie, naa keyiolou ninche aajo Kara nanu Olaitoriani, ina kata nayau inkiguanat shumata ninye, naibalunye esinyatisho ai tiatua ninye;

²³amu kairriu olmeitai atua ninye, nairriwaki osarge inkoitoi enyena naalala enkanasa; ore lelo oari to lalem nebatata tiatua ninye, te ilo alem oarare ninye too nkaloli pooki. Ina pee eyiolou ninche aajo Kara nanu Olaitoriani.

²⁴“Ore teina aji e Israel nemeitokini aata ilkiku oorem aashu eitame lelo oomanita ootaarare ninche. Ina pee eyiolou ninche aajo Kara nanu Olaitoriani Enkai.

²⁵“Inji ejo Olaitoriani Enkai: Ore tenaiturrur ina aji e Israel tiatua lelo oreren ooidapashakaki ninche, naibalie esinyatisho ai tiatua ninche te dukuya lelo oreren pooki, neaku kepuo aatoni te nkop enye maa teina naishoo apa osinka lai Yakobo.

²⁶Naa ketoni tiatua ninye te seriani naa keshet ninche inkajijik neun inkurman oo sabibu. Naa ketoni tiatua te seriani, ina kata nayau adung'oki enkiguana shumata lelo le latia enye lelo ootarare ninye te ng'oro sapuk. Ina peyie eyiolou aajo Kara nanu Olaitoriani Enkai enye.”