Read MAASAI REVISED PROTESTANT Esekiel 3 Bible Online

Esekiel 3 - MAASAI REVISED PROTESTANT bible

Esekiel 3

¹Naajoki ninye nanu, “Enkerai e tung'ani, inosa ina nikinchooki iyie; inosa ele piyayati le mbuku, nilo airorie enkaji e Israel.”

²Metaa atabolo nanu enkutuk ai, naaisho ninye nanu olpiyayati le mbuku mainosa.

³Naajoki ninye nanu, “Enkerai e tung'ani, inosa ele piyayati le mbuku laaisho iyie nimput enkoshoke ino ninye.” Metaa ainosa ninye; naa ore etii enkutuk nemelok anaa olkenkei le naisho.

⁴Naajoki ninye nanu, “Enkerai e tung'ani, shomo, tabaiki enkaji e Israel, niro too rorei laainei airorie ninche.

⁵Amu eitu kirriwari iyie aairriwaki iltung'ana le likae ng'ejep o enkutuk nagol enkiroroto, kake enkaji e Israel

⁶neme iloreren kumok loo lng'ejepa oopaashaa o enkutuk nagol, ilaa mining'u irorei lenye. Kesipa tenaairriwaki iyie kulo, naa aikindim aatoning'u iyie.

⁷Kake ore enkaji e Israel nimikinining iyie; amu meyieu ninche naaning nanu amu ore enkaji pooki e Israel naa inoo loogol lukuny negolong'u iltauja.

⁸Ing'ura ajo aitagolo elukunya ino anaa enagol ilukuny enye.

⁹Ore anaa enagol osoit oji almasi alang isoito pooki aitaa elukunya ino neijia. Miureyu ninche tukul, nimimputukuny too nking'urat enye, amu enkaji kiserut ninche.”

¹⁰Aanyaaka ake sii ajoki nanu, “Enkerai e tung'ani, ore irorei laainei pooki, lelo laaliki iyie tang'amai to ltau lino nining'u too nkiyiaa inono.

¹¹Nilo enetii iltung'ana linono ootii eyararoto nijoki ninche, inji ejo Olaitoriani Enkai; toliki ninche eyieu o meyieu nening.”

¹²Ina peyie aadumu enkiyang'et nanu ailepie, ore edumunye enkitoo o Laitoriani te wueji enye, naning te siadi nanu oltoilo sapuk le nkirikirata enkop.

¹³Naa oltoilo loo naipuko e nena ng'uesi naaishu eibung'a maate, naning sii nena kejek oo ngarrin naashepita te mbata enye, nening'oyu anaa olokirikiri sapuk le nkop.

¹⁴Naadumu ina Kiyang'et nanu ailepie naaya, nalo te mion enkirowuaj oltau lai, eiroishi ina aina o Laitoriani te shumata nanu;

¹⁵nalotu enetii lelo yarunot te Telabib, lelo ootii enkiyopata o lkeju le Kebar. Naton teine aing'asie tenebo ninche nkolong'i naapishana.

¹⁶Ore peyie eishunye inkolong'i naapishana, nelotu ororei lo Laitoriani enatii nejo:

¹⁷“Enkerai e tung'ani, aaitaa iyie olarriponi te nkaji e Israel; ore ake pooki kata nining ororei eing'uaa enkutuk ai, nincho ninche enkikoo naing'uaa enatii.

¹⁸Tenajoki ilo torrono, ‘Meeta nchere aimiye,’ neitu inkok ninye aliki, neitu iro aikok ilo torrono metung'uai enkoitoi enye torrono, peyie etum aitajeu enkishui enye, keye oltung'ani torrono too ntorrok enyena; kake ore osarge lenye naa kaing'oru te nkaina ino.

¹⁹Kake tininkok ilo torrono, nemeibelekenya ninye aing'uaa ntorrok enyena, aashu too nkoitoi enyena, naa keye ninye too ng'ok enyena; kake intajewuo iyie enkishui ino.

²⁰“Ore ake sii, teneibelekenya oltung'ani supat aing'uaa esupatisho enye neas intorrok, napik entoki narror dukuya enye, naa keye ninye; amu eitu inkok iyie ninye, keye ninye too ng'ok enyena, ore isiaaitin enyena sidain nena naataasa nemeitokini aadamu; kake ore osarge lenye nayieu too nkaik inono.

²¹Kake ore ake eyia, tininkok ilo tung'ani supat peyie meas eng'oki, neitu eas eng'oki, nemeeta nchere meton eishu, amu etang'amayie ninye enkikoo; nintajeu iyie enkishui ino.”

²²Netii apa enkaina Olaitoriani shumata nanu; naajoki nanu, “Tudumunye shomo eneisiasha peyie aatum airorie teine.”

²³Metaa atudumunye nalo enkisiashata[2], nadol eitashe enkitoo o Laitoriani teine, neikununo anaa enkitoo apa natoduaa te nkiyopata o lkeju le Kebar te Babilon; nabatata te nkomom ai.

²⁴Kake aatijing'a Enkiyang'et nanu, naadumu aitasheyie too nkejek; naairorie nanu naajoki, “Shomo inkenoi kewan tiatua enkaji ino.

²⁵Ore iyie nakerai e tung'ani, ing'ura eikipiki iyie inkeenta, naa aikiyeni iyie metaa mintoki alo tenebo iltung'ana;

²⁶naa kaiterep olng'ejep lino enoret ino, metaa iaku olemeidim airoro aikoo ninche; amu enkaji kiserut ninche.

²⁷Kake tenaairorie iyie, naabol iyie enkutuk, naa aijoki iyie ninche, ‘Inji ejo Olaitoriani Enkai;’ ore ilo oning, inchoo ening; ore ilo oany ening, inchoo eany amu enkaji kiserut ninche.