Read MAASAI REVISED PROTESTANT Esekiel 31 Bible Online

Esekiel 31 - MAASAI REVISED PROTESTANT bible

Esekiel 31

¹Ore to lari le tomon oobo, to lapa liokuni, te nkolong e dukuya olapa, nelotu ororei lo Laitoriani enatii naajoki:

²“Enkerai e tung'ani, tiaaki Farao olaiguanani le Misiri o lororani lenyena inchere: “Aing'ae doi inyaanyukie iyie te sapuko ino?

³Ing'ura, ekaaitanyaanyukie iyie oltarakuai otii Lebanon, oata ilng'osil sidain, neeta oloip le ntim, naa keado oleng, ore enkadori enye netii nkatampo.

⁴Ore inkariak neitoti ninye, ore eng'uton enye neisho ninye metoodoro neitaa lelo kejek lenyena ilooruko, neitaman ine wueji netuunieki, neidapashaa inchorroi enyena, aidapashaki lelo keek pooki le ntim.

⁵Metaa eilepa ninye oleng alus ilkeek pooki le ntim, ore ilng'osil lenyena sapuki nebul aasapuku; neado ilng'osil lenyena, te nkaraki enkare sapuk too ntona enyena.

⁶Ore imotonyi pooki o loing'ang'e, neitobira isinkin enye too lng'osil lenyena sapuki; ore abori ilng'osil lenyena netii ing'uesi pooki e ong'ata, neisho teine aaiu inkera enye; ore abori oloip lenye, netii iloreren kituaak.

⁷Aisidai apa oleng te sapuko enye; o te nkadori oo lng'osil lenyena; amu eshomo intona enyena abori, ine netii inkariak kumok.

⁸Ore iltarakua ootii enkurma e Nkai nemekeshare ninye, nemerisiore lelo keek oonyori ilng'osil lenyena; ore lelo keek oorisiore naa pesho, tinintanyaanyukie ilng'osil lenyena; meetae olchani te nkurma Enkai onyaanyukie ninye te sidano.

⁹Aitobira ninye aikishiaan, te nkumoi oo lng'osil lenyena, ore lelo keek pooki le Eden neng'uar ninye, lelo ootii apa enkurma e Nkai.

¹⁰“Metaa inji ejo Olaitoriani Enkai: Ore amu etubulua ninye ajing atua inkatampo, ore oltau lenye newuasa te nkaraki enkadori enye.

¹¹Ekapik ninye atua enkaina e ilo magilani loo loreren naa kearare ninye anaa enatiu ing'ok enyena, atanang'ayie ninye ong'ata.

¹²Ore lelo omon torrok oleng loo loreren, naa kedung ninye aauroo neing'uaa. Edoiki inchumat oo ldoinyo o nong'ot pooki ilng'osil lenyena, ore lelo ng'osil lenyena sapuki neirrag too wuejitin pooki neeim inchorroi eina kop; ore iloreren pooki le nkop nepuo aaing'uaa oloip lenye aaing'uaa ninye.

¹³Ore teina kidaaroto enye netonie imotonyi pooki oloing'ang'e, ore atua ilng'osil lenyena, netonie ing'uesi pooki oo nkong'at.

¹⁴Ore kuna pooki naa inchere peyie meeta ilkeek le mbata enkare oobulu aaika oleng te shumata aashu epik ilukuny enye inkatampo, nemeetae likae shani ook enkare ebaiki shumata ninche te nkadori; amu eishooki ninche pooki metuata, teinakop oo lmeneng'a natii tung'ani oye, tenebo lelo oopuo olodo le nkop.

¹⁵“Inji ejo Olaitoriani Enkai: Ore peyie elo abori enemeneng'a, naa kaitaa enegut pee eishir te nkaraki ninye, naibok lelo kejek lenyena pooki, ore inkariak kumok nedung'i; naishopoki Lebanon osina te nkaraki ninye, ore ilkeek pooki liong'ota netoito te nkaraki ninye.

¹⁶Ekaisho iloreren meikirikirata to ltoilo le mbatata enye, ina kata nanang'aki ninye abori enemeneng'a tenebo lelo oopuo tenebo engumoto; ore lelo keek pooki le Eden, lelo ooisul gelunot sidain le Lebanon, lelo pooki ook enkare, neitagoli to lodo le nkop.

¹⁷Ekepuo sii ninche abori enemeneng'a tenebo ninye, ine netii lelo ootaraki to lalem; ee, lelo ootoni tiabori oloip too loreren naa keish.

¹⁸Ira naa iyie ng'ae onyaanyuke te nkisisa o te nkitoo tiatua lelo kejek le Eden? Aikintadoyiori iyie tenebo lelo keek le Eden aaya olodo le nkop; nirrag iyie tenebo lelo lememurata, tenebo lelo ootaaraki to lalem. “Ore ele naa Farao tenebo olorora lenye pooki, ejo Olaitoriani Enkai.”