Read MAASAI REVISED PROTESTANT Esekiel 33 Bible Online

Esekiel 33 - MAASAI REVISED PROTESTANT bible

Esekiel 33

¹Nelotu ororei lo Laitoriani enatii naajoki:

²“Enkerai e tung'ani, irorie iltung'ana linono nijoki ninche, tenelo nayau olalem shumata enkop, negelu iltung'ana oltung'ani obo tiatua ate, neitaa ninye olarriponi lenye;

³naa tenedol ninye olalem elotu shumata enkop neosh esekekua aitayiolo iltung'ana.

⁴Neaku ore pooki ng'ae otoning'o ilo toilo leina tarumpeta neitaa parmetii, nelotu olalem aar ninye, ore osarge lenye naa shumata endukuya enye etii.

⁵Etoning'o ninye ilo toilo leina tarumpeta, neitu esuj ina naitayioloki ninye; ekeaku etii osarge lenye shumata enkorrok enye. Kake tenetusuja ina naitayioloki, anaata eitajewuo enkishui enye.

⁶Kake te nedolu olarriponi olalem elotu nemeosh ninye ina tarumpeta, metaa eitu eitayioloi iltung'ana, nelotu olalem, neya ake ninye obo lenye; ore ilo tung'ani newaki too ng'ok enyena, kake ore osarge lenye naa kaikilikuanu too nkaik e ilo arriponi.

⁷“Metaa ore iyie enkerai e tung'ani, aaitaa iyie olarriponi te nkaraki enkaji e Israel; ore pooki kata nining ororei oing'uaa enkutuk ai, naa intayiolo ninche olkilikuai oing'uaa enatii.

⁸Tenelo najoki ilo torrono, Oi iyie ele tung'ani torrono, meeta inchere pee miye neitu iyie irorie ilo torrono aitayiolo meibelekenyunye aing'uaa enkoitoi enye, ore ilo tung'ani torrono naa keye tiatua ing'ok enyena, kake ore osarge lenye naikilikuanu too nkaik inono.

⁹Kake tinintayiolo ilo torrono pee eibelekenyunye te nkoitoi enye, neitu eibelekenyunye ninye te nkoitoi enye; naa keye ninye too ng'ok enyena, kake intajewuo iyie enkishui ino.

¹⁰“Ore iyie nakerai e tung'ani, tiaaki ina aji e Israel, Inji itejo iyie: ‘Ore inkitarruorot ang tenebo ing'ok ang netii shumata iyiook, nikiishunye iyiook pesho te nkaraki ninche, kaji naa kinko tinikinchu?’

¹¹Tiaaki ninche, ore anaa enaishu nanu, ejo Olaitoriani Enkai, maata nanu enchipai te keeya e ilo torrono, kake peyie eibelekenya ilo torrono te nkoitoi enye peyie eishu; imbelekenyunye, imbelekenyunye too nkoitoi inono torrok; ainyoo doi peyie iye iyie, oi naaji e Israel?

¹²Ore iyie, nakerai e tung'ani, tiaaki iltung'ana linono, ore esipata e ilo supat nemeitajeu ninye teneas entorroni; naa ore teina torroni e ilo torrono nemebatata te ninye teneibelekenyunye te nkitarruorroto enye; ore ilo supat nemeitoki aidim atotona te supatisho enye teneas eng'oki.

¹³Ore hoo natiaaka ilo supat meeta inchere peyie meton ninye eishu, kake ore ake peyie eisilig ninye esipata enye neas intorrok, meetae hoo nabo oosiatin enyena esupatisho naaitokini aadamu; kake ekeye ninye tiatua ina ng'oki nataasa.

¹⁴Ore ake sii, hoo natiaaka ilo torrono, ‘Meeta inchere aimiye,’ kake ilo teneibelekenyunye too ng'ok enyena, neas ina nasipa naishaakino.

¹⁵Tenelo neshuku ilo torrono ina nainosie apa olmumai, neshuku ina apa nawa te nkikonya, nelo too nkoitoi enkishon, nemeitoki aas enkarruoisho; naa kesipa keton katukul eishu, nemeye ninye.

¹⁶Meetae hoo eng'oki nabo oo naataasa apa ninye naitokini aadamu te nkaraki ninye; etaasa ninye ina naishaakino nesipa, nemeeta inchere pee meton ninye eishu.

¹⁷“Kake ejoito ake sii iltung'ana linono inchere, ‘Ore enkoitoi o Laitoriani nemetii esipata;’ naa inkoitoi enye maate metii esipata.

¹⁸Ore teneibelekenya osupat aing'uaa esipata enye makewan, neas enkarruoisho, naa keye ninye te nkaraki ina.

¹⁹Naa teneibelekenya ilo torrono aing'uaa entorroni enye, neas ina naishaakino neas nasipa, neton eishu teina.

²⁰Nijojo ake sii, ‘Ore ina oitoi o Laitoriani nemesipa’; iyie na aji e Israel, ekaiguanare pooki ng'ae linyi terisioroto oo nkoitoi enyena.”

²¹Ore to lari le tomon aare le yararoto ang, to lapa le tomon, te nkolong e imiet o lapa nelotu oltung'ani oisikua aing'uaa Yerusalem enatii nanu naajoki: “Etabatate enkanasa.”

²²Etii apa enkaina o Laitoriani shumata nanu ina teipa eng'or elotunoto e ilo oisikua; netabolo ninye enkutuk ai teina kata naewuo ilo tung'ani enatii tadekenya; metaa etaboloki apa enkutuk ai, nemeekure ara olemeiro.

²³Nelotu ororei lo Laitoriani enatii naajoki:

²⁴“Enkerai e tung'ani, ore lelo oomanya kunen neetumutaki te nkop e Israel, nejoito; ore apa Abraham naa oltung'ani obo ake, kake enoto ninye aitaa ina kop enenye, nikira iyiook kumok, esipa tukul eishooki iyiook enkop maitaa enaang.”

²⁵Neaku, tiaaki ninche, inji ejo Olaitoriani Enkai: Inyanya intae inkiri tenebo osarge, nidumakiki inkonyek inyi inkitanyaanyukot oo inkaitin inyi nemeishu, nimbukoo osarge; intokiki ake aaku iloopeny ena kop?

²⁶Ipikipiki ilo alem aaitaa osiligi linyi, niasiasa inolminong, ore pooki ng'ae linyi neidurukie enkitok ole latia enye; ijojo iakuku iloopeny ena kop?

²⁷Tiaaki ena ninche, inji ejo Olaitoriani Enkai: Ore anaa enaishu nanu, esipa tukul ajo ore lelo ootii iwuejitin neidaaitie naa kebatata to lalem; ore ilo otii enkong'ata naisiasha naa kaisho ninye ing'uesi entim meinosa, ore lelo ootii isempewueti o lootii nkapuniaa naa keye to lmeitai.

²⁸Naa kaitaa ina kop mitil naidaayie, ore ina golon enye nawuasare nebaiki enkiting'oto; ore lelo doinyo le Israel neaku mitili oleng metaa meetae hoo oloim empolos enye.

²⁹Ina pee eyilou aajo Kara nanu Olaitoriani ina kata naitaa ina kop enkop mitil naitomijoon naa ene pesho te nkaraki nena baa olminong lenye pooki naataasa ninche.

³⁰“Ore te iyie, enkerai e tung'ani, ore iltung'ana linyi ooiro tenebo te nkaraki iyie too sunta, o too nkutukie oo nkajijik, ejokino ninche maate, pooki ng'ae ejoki olalashe lenye, ‘Wou sii iyie toning'o ajo kalo rorei ilo olotu eing'uaa Olaitoriani.’

³¹Nepuonu enitii anaa enapuonu iltung'ana enitii, netoni te dukuya intae anaa iltung'ana laainei; neinining ina nijo iyie kake meas ninche ina amu eibalunye oleng too nkutukie enye enyorrata sapuk, kake ore iltauja lenye netii atua dupoto enye.

³²Naa, ing'ura, itiu iyie te ninche anaa ilo oranyaki isinkolioitin le nyorrata, to ltoilo sidai oleng neosh te nkarriyiano e nkinanda, amu ening ninche ina nijo, kake meas ninche ina.

³³Ore peyie elotu ena, naa kelotu ninye, ina peyie eyiolou aajo etii apa oloiboni atua ninche.”