Read MAASAI REVISED PROTESTANT Esekiel 34 Bible Online

Esekiel 34 - MAASAI REVISED PROTESTANT bible

Esekiel 34

¹Nelotu ororei lo Laitoriani enatii, naajoki:

²“Enkerai e tung'ani, imbonoki taarare lelo airritak le Israel, imbonoki tiaaki ninche, Inji ejo Olaitoriani Enkai: Oi ilairritak le Israel lelo ooitotito ate! Amaa ilairritak aimeitoti intare?

³Inyanya intae nena naapir, ninchopokiki ate inkilani oo lpapit loo ntare, niyieng'iyieng'e nena naaisul te mpiron; kake mintotiti intae nena tare.

⁴Ore nena naashal neitu intagoligolo, ore nena naamuoi neitu inchiunyenye, ore nena ng'ojiniaa neitu iruburubu, ore nena naatapong'ori neitu irrinyunyu, ore inaaimina neitu ing'oruru, neaku te ngolon o te nking'odia intoria ninche.

⁵Metaa eidapashate ninche, amu metii apa olairritani; neaku ninche endaa oo ng'uesi pooki e ntim.

⁶Eidapashaki apa intare aainei, nepuaya ninche too ldoinyo pooki, o te pooki doinyo naado; ore intare aainei neidapashi te nkoriong enkop pooki, meetae obo oikilikuanua aashu oing'oru ninche.

⁷“Metaa, entoning intae lo airritak ororei lo Laitoriani enajo:

⁸Ore anaa enaishu nanu, ejo Olaitoriani Enkai, ore amu etaa intare aainei entoki nainosi, netaa intare aainei endaa nanya ing'uesi pooki entim, anaa ae metii olairritani; neaku ore amu eitu eing'oru ilairritak laainei intare aainei, kake eitotito ate ilairritak, neitu eitoti intare aainei;

⁹neaku entoning intae ilairritak ororei lo Laitoriani:

¹⁰Inji ejo Olaitoriani Enkai, ing'ura ajo kaarare lelo airritak; naa kayieu nanu intare aainei too nkaik enye, naiting'ie te ninche ina kitotio enye oo ntare; meigil aekata ilairritak aaitoti ate. Ekaitajeu nanu intare aainei too nkutukie enye, peyie meitoki aaku endaa te ninche.

¹¹“Amu inji ejo Olaitoriani Enkai: Ing'ura, nanu, nanu kewan oing'oru intare aainei, nalilitu ninche.

¹²Anaa enaing'oru olchekut intare enyena ina kata naidapashate kulie tare enyena too neelakua, neaku kaing'oru sii nanu ntare aainei; naa kaitajeu ninche too wuejitin pooki neeidapashakaki teina olong natii inkatampo netii sii enaimin narok ong'u.

¹³Naa kaitupuku ninche too loreren, naiturrurru ninche too nkuapi naa kayau ninche enkop enye maate; naa kaitoti ninche too ldoinyo le Israel, too nkiyopat e nena shorroi, o too wuejitin pooki neemanyae eina kop.

¹⁴Kaitoti ninche too wuejitin neeleng, o too nchumat oo ldoinyo le Israel, keaku ninche ndaat enye; ore teine neiperipera ninche teine te neleng sidai, o too wuejitin neebore olkujita, ekedaa ninche too ldoinyo le Israel.

¹⁵Ore nanu makewan naa kaaku olchekut loo ntare aainei, naa kaisho ninche meirraga, ejo Olaitoriani Enkai.

¹⁶Ekaing'oru ina naimina, naa karrinyu ina natapong'ori, naa karub ina ng'ojine, naa kaitagol ina natashala, ore ina napir o ina nagol naa kaing'or; naa kaitoti ninche te sipata.

¹⁷“Ore intae intare aainei, inji ejo Olaitoriani Enkai: Ing'ura, ekaiguanare enker o enker, naiguanare ilmeregeshi o loroi.

¹⁸Aimebaiki intae entadaata too neeleng sidain eji metaa intunyoo ake too nkejek inyi olokeri pooki; niokioko enkare nasila, peyie intunyoo inkulie too nkejek inyi?

¹⁹Naa kenya intare aainei nena nintunyoitie too nkejek inyi, neok ina are ning'ola too nkejek inyi?

²⁰“Metaa, inji ejo Olaitoriani Enkai ajoki ninche; ing'ura, ore nanu, nanu makewan ekapik enkiguana erishata oo nkerra naapir o nkerra sasin.

²¹Amu irrumoo te murte o too ronyi, nimponyaa nena pooki naashal too mowuarak inyi, o metaba anaa nindapashakiki ninche pooki wueji,

²²ekaitajeu nanu intare aainei, meitoki aekata aaku inaanya ing'uesi; naa kaiguanare erishata e nker o enker.

²³Aa kaitasheyie olchekut obo oitasheiki ninche, osinka lai Daudi, naa keitoti ninye ninche: ekeitoti ninye ninche neaku ninye olchekut lenye.

²⁴Ore nanu, Olaitoriani, naa kaaku Enkai enye, ore osinka lai Daudi neaku olkitok tiatua ninche; nanu Olaitoriani oiroro.

²⁵“Ekaitobir tenebo ninche osotua le seriani, naishu ing'uesi pooki entim teinakop, peyie etum aatobik ninche te seriani ti ong'ata neirrag atua entim.

²⁶Naa kaitaa ninche o nene wuejitin pooki neemanita ildoinyo laainei e mayianata; naa kairriu aitadou enchan te rishata enye; naa ninye enkoirujuruji e emayianata.

²⁷Ore lelo keek liong'ota neiu ilng'anayio lenye, ore enkop neiu ilng'anayio lenyena, naa keaku ninche ilooserian te nkop enye; neyiolou ninche aajo Kara nanu Olaitoriani, ina kata nagil iloom le nchata enye oo murto, nalaku ninche aitung'uaa inkaik e lelo ooitaa ninche isinkan.

²⁸Meitoki aaigil aekata aaku eng'ues nainosi iloreren, nemeitoki ilowuarak le ina kop aapolol ninche; eketoni ninche te seriani, nemeeta entoki naitoki aiture ninche.

²⁹Naa kaisho ninche embularoto oo ndaiki metaa meitoki amut ninche esumash teinakop, nemeitoki aatum enyamali enkurruna oo loreren.

³⁰Naa keyiolou aajo Kara nanu Olaitoriani Enkai enye, atii nanu tenebo ninche, naa ore ninche, ina aji e Israel naa iltung'ana laainei, ejo Olaitoriani Enkai.

³¹Nirara intae intare, intare o lokeri lai, nara nanu Enkai inyi, ejo Olaitoriani Enkai.”