Read MAASAI REVISED PROTESTANT Esekiel 36 Bible Online

Esekiel 36 - MAASAI REVISED PROTESTANT bible

Esekiel 36

¹“Ore iyie nakerai e tung'ani imbonoki lelo doinyo le Israel, nijoki; intae ildoinyo le Israel, entoning ororei lo Laitoriani.

²Inji ejo Olaitoriani Enkai; ore amu etejo ilo mang'atinda te iyie ‘Aha! Ore iwuejitin e apa neeika netaa enaang.’

³Neaku imbonoki nijoki, Inji ejo Olaitoriani Enkai: Ore te nkaraki naitaa ninche intae mitili nepurd intae too nkaloli pooki, metaa itaa intae entoki e kulie kuapi, nitaa intae enkiroroto o entorroni olmarenke loo ltung'ana;

⁴metaa, oi intae ildoinyo le Israel, entoning ororei lo Laitoriani Enkai: Inji ejoki Olaitoriani Enkai lelo doinyo o ndoinyo, o lashepak[11] o nenen neeidurrieki o nkanas naaidurraki aaing'uaa, nena naataa entoki nanya pooki toki netaa enameni iloreren pooki oomanita;

⁵metaa inji ejo Olaitoriani Enkai: Ekairo nanu to lom lai oirowua aarare ilkulikae oreren, naarare Edom pooki, lelo ooishoo enkop ai ate metaa enenye te nchipai oltau neimaki ino lmena, pee etum aawaita ninye te ngolon.

⁶Metaa imbonoki ina kop e Israel, nijoki lelo doinyo o nena doinyo, lelo ashepak o yarat, tiaaki: Inji ejo Olaitoriani Enkai, Ing'ura ajo, ekairo nanu to lom le ngoro ai, amu itaa intae iloonoto enkurruna too loshon;

⁷metaa inji ejo Olaitoriani Enkai, anya olmumai ajo ore iloshon oomanita intae naa ketum ninche enkurruna.

⁸“Kake ore intae ildoinyo le Israel, naa keitubulu ninche ilng'osil lenye, neiki ilng'anayio linyi iltung'ana laainei Israel; amu kepuonu ninche aasieku ang.

⁹Ing'ura ajo enkalo inyi atii, naa kaaibelekenyakino iyie naa aikituri nikiuni;

¹⁰naa kaponaa iltung'ana te iyie, enkaji pooki e Israel, ninye pooki; ore nena anas naa kemanyi, ore iwuejitin mijoonito nesheti;

¹¹naa kaponaa te iyie iltung'ana o ng'uesi; naa keponari ninche neisho oleng; naa kaaitaa iyie enamanyae anaa apa inkolong'i naatulusoitie, naa kaaitaas iyie esidai eneitu apa aekata aaitaas. Ina peyie iyiolouu aajo Kara nanu Olaitoriani.

¹²Ee, ekaisho iltung'ana meshomo tiatua iyie, o ltung'ana laainei Israel; naa keya ninche intae, iyakuku intae enjung'ore enye, nemeitoki aekata inkera ang aatum osina.

¹³Inji ejo Olaitoriani Enkai: Ore amu kejoki intae iltung'ana, ‘Inyanya intae iltung'ana, nioruru olosho linyi inkera,’

¹⁴neaku mintokiki aekata aanya iltung'ana nimintokiki aaoru olosho linyi inkera, ejo Olaitoriani Enkai;

¹⁵nimintokiki intae aainining aekata enkurruna e lelo oreren, nimintokiki aekata aanap esulare oo ltung'ana nimintoki aaisho olorere linyi metorrorroto, ejo Olaitoriani Enkai.”

¹⁶Nelotu ororei lo Laitoriani enatii naajoki:

¹⁷“Enkerai e tung'ani, ore peyie emany enkaji e Israel enkop enye, neisarkionie ninye too nkoitoi enye o too nkiaasin enye; ore olkuaak lenye te dukuya nanu netiu anaa oloirerio le nkitok te nkata e nkiduruk enye.

¹⁸Metaa atubukoko nanu engoro ai shumata ninche te nkaraki osarge oibukoitie ninche te nkop, te nkaraki nena aaitin nemeishu naisarkionie ninche.

¹⁹Aidapasha ninche tiatua iloreren, neidapashari ninche tiatua inkuapi, te risioroto oo lkuaaki lenye, ore too siaaitin enye naiguanare nanu ninche.

²⁰Kake tenepuonu ninche iloreren, ore pooki wueji neetuo ninche, neisarkionie ninche enkarna ai sinyati, ore teina nejo iltung'ana te nkaraki ninche, ‘Ore kulo tung'ana naa iltung'ana lo Laitoriani, naa kepuku ake aapuo aaing'uaa enkop enye.’

²¹Kake kaata endamunoto te nkaraki enkarna ai sinyati, ina naitaa enkaji e Israel enaisarkionieki tiatua iloreren laa ninche eing'uaa.

²²“Metaa tiaaki ina aji e Israel, Inji ejo Olaitoriani Enkai: mme te nkaraki intae, na aji e Israel, peyie etaa kaas ena, kake te nkaraki enkarna ai sinyati ina nisarkionie intae tiatua lelo oshon lietuo.

²³Naa kaibalie esinyatisho enkarna ai kitok, ina apa naisarkionieki tiatua iloreren, naa intae oo isarkionie intae tiatua ninche; neyiolou iloreren ina kata aajo Kara nanu Olaitoriani, ejo Olaitoriani Enkai ina kata naibalie esinyatisho ai aimaa intae te dukuya nkonyek enye.

²⁴Amu kaitupuku nanu intae aitung'uaa iloreren, naiturrurru intae too nkuapi pooki nayau intae atua enkop inyi maate.

²⁵Kaisuaaki nanu intae enkare nasila niakuku sidain too ntorrok inyi pooki, o too nkitanyaanyukot oo nkaitin inyi pooki ekaisuj nanu intae.

²⁶Naisho nanu intae oltau ng'ejuk, naisho intae enkiyang'et ng'ejuk napik atua intae; naitayu aitung'uaa iseseni linyi ilo tau lo soit, naisho intae oltau le nkirring'o.

²⁷Naa kapik enkiyang'et ai atua intae, naitaa intae iloopuo too nkiguanat aainei nijurrurru oleng aaing'or nkikoot aainei.

²⁸Imanyimanya ina kop naishoo iloo papaai linyi; niakuku intae iltung'ana laainei, naaku nanu Enkai inyi.

²⁹Naa kaitajeu intae too loirerioni linyi pooki; naitanap entapa naitaa sapuk nemaitoki aiteleiki intae olameyu.

³⁰Naa kaponaa ilng'anayio naitubul enkurma ino peyie mintokiki aekata aatum enkurruna o lameyu tiatua iloreren.

³¹Ina peyie idamumu inkoitoi inyi torrok; o siaaitin inyi neme sidain; nimbayuyu ate te nkaraki ing'ok inyi, o lminong linyi litaasa.

³²Mme te nkaraki iyie peyie aas ina, ejo Olaitoriani Enkai; inchoo ina eyiolounoyu te iyie. Tukurru nimilo too nkoitoi inono, iyie na aji e Israel.

³³“Inji ejo Olaitoriani Enkai: Ore teina olong naaituku iyie too ntorrok inono pooki, naa kaisho inkanas inono metamanyi, ore iwuejitin nememanya nesheti.

³⁴Ore ina kop apa nememanyae neturi, alang enaitoki aaku mitil te lelo pooki oogiroo ninye.

³⁵Naa kejo ninche: Ore apa ena kop mitil netotiwuo anaa ina kurma e Eden; ore nenen mijoonito naa mitil nememanya o nkanas naaidaitie, nemanya taata nesheta osempewuet.

³⁶Ore ina kata lelo oreren ootung'uayioki likimanita iyie neyiolou aajo nanu Olaitoriani, otesheta nene wuejitin apa neeidaitie, naun ine apa netung'uayioki aa olmuaate; Nanu, Olaitoriani oiroro, naa kaas ina.

³⁷“Inji ejo Olaitoriani Enkai: Ore sii ena naa kaisho ina aji e Israel maaikilikuana nanu maitaasa ninche; peyie aponaa ilewa lenye anaa inkerrai.

³⁸Anaa inkerrai naaitainyieki ilasarri anaa nena kerrai e Yerusalem te lelo siruai lenye gelunot, metaa keaku keiputayu nena anas apa mijoonito too ntukusi oo ltung'ana. Ina peyie eyiolou aajo Kara nanu Olaitoriani.”