Read MAASAI REVISED PROTESTANT Esekiel 41 Bible Online

Esekiel 41 - MAASAI REVISED PROTESTANT bible

Esekiel 41

¹Naariku nanu atua olgilata le polos, netem ninye ing'apeta enyena, ore ake te nchoto nabo naa intemat enkaina ile apa endapasho oo ntoneta eng'ape.

²Ore endapasho e ine nejing'ieki naa intemat e nkaina tomon; ore isunta e ine nejing'ieki naa intemat imiet too nkaloli pokira; netem ninye enkadori e ilo gilata naa intemat e nkaina artam ore endapasho enye naa intemat e nkaina tikitam.

³Ina peyie ejing atua olgilata liatua netem ing'apeta e kutuk aji, intemat are; o endapasho eina kutuk aji, intemat ile; o suntai natii embata e kutuk aji intemat naapishana.

⁴Netem enkadori e ilo gilata, intemat e nkaina tikitam o endapasho enye, intemat e nkaina tikitam, tinigiroo olgilata le polos. Naajoki ninye nanu, ore ene naa ewueji sinyati aisul.

⁵Ina peyie etem ina suntai enkaji e Nkai, intemat ile enkirrushai; ore endapasho oo lgilat le nchoto, naa intemat e nkaina ong'uan, eman ina aji e Nkai.

⁶Ore ilgilat le nchoto neidikidikokino inkajijik uni te shumata, neipirare ake obo likae, tomoni uni ake te nkaji nabo natii shumata enkae. Netii ineeipiku naamanita ina suntai e nkaji e Nkai aa ninche naairishaa nena ajijik too nchot pooki kake meshetakino.

⁷Ore lelo gilat loo mbat nepuo aalalau anaa enaailep enkaji. Ore ina aji natashare enkaji e Nkai neteshetaki too nkilepat metaa kelalau ilgilat anaa enaailep enchetata e nkaji. Netii nkedeta naailep eiteru te nkaji e abori o metabaiki eneshumata eim ene polos.

⁸Atoduaa sii ajo ore enkaji e Nkai neeta eneika namanita; ore ilkitamanyunot loo lgilat le nchoto naa entiyani nalulung'a oo ntemat ile naalulung'a enkadori.

⁹Ore enkirrushai eina suntai e oriong to lgilata le nchoto naa intemat e nkaina imiet. Ore enchoto e ine neika nemetii toki, naa intemat enkaina imiet, ore te rishata e ine neika e ina aji e Nkai,

¹⁰o lgilat lo lodung'oro naa endapasho oo ntemat tikitam eman ina aji e Nkai te pooki shoto.

¹¹Eeta apa lelo gilat loo mbat inkutukie naabolo, nabo naing'or moi kuapa o nkae naaing'or kopikop, ore endapasho eine wueji natung'uayioki metii toki naa intemat imiet emanita.

¹²Ore ina aji apa naipirare olodung'oro leina aji e Nkai te nkalo oloontoluo naa intemat intomoni naapishana elalai; ore ina suntai eina aji naa intemat imiet te nkirrushai emanita, ore enkadoro naa intemat intomoni naaudo.

¹³Netem ninye ina aji e Nkai, intemat enkaina iip nabo enkadori; o lodung'oro tenebo ina aji o sunta enyena, intemat iip nabo enkadori;

¹⁴tenebo endapasho te nkalo oloontoluo te dukuya enkaji e Nkai, tenebo olodung'oro intemat enkaina iip nabo.

¹⁵Netem enkadori eina aji eipirare ilo odung'oro otii enkalo oloontoluo o sunta enyena too nkaloli pooki, intemat e nkaina iip nabo. Ore ilo gilata olala leina aji e Nkai o lgilata liatua oilo lioriong neeta ineerupa.

¹⁶Ore emanaroto e pokira okuni neeta ilusien o ng'apeta. Ore te ntonata naipirare enetonie enkaji e Nkai nerupa too nkeek emanita, eiteru to ltiren o meilepaki ilusien (ore ilusien naa kemura),

¹⁷o metabaiki ine nemetii toki te shumata kutuk aji o tenebo ilo gilata liatua o te nkalo e oriong; Ore too sunta pooki naamanita tiatua olgilata liatua o ilo gilata sapuk liatua neguetuno te nkitanyaanyukoto o lkerubi,

¹⁸o lchani loo ltuka, netii ake oltukai erishata o lkerubi o lkerubi.

¹⁹Neeta ake olkerubi obo inkomomi are: enkomom o ltung'ani oipirare oltukai te nkalo nabo, o enkomom oloti ng'atuny eipirare oltukai te nkae alo. Neguetakino ninche enkaji pooki e Nkai te manaroto.

²⁰Ore eiteru to ltiren o meshomo shumata e kutuk aji naguetakino olkerubi o ltukai ina suntai.

²¹Ore nena molinkaishi e kutuk aji e ilo gilata nerisioro pooki aloli. Ore te dukuya ine wueji sinyati netii entoki nanyaanyukie olperere loo nkeek,

²²intemat e nkaina uni enkadoro enkilepata, intemat are enkadori, intemat are endapasho; ore ilpijat lenyena entonata enye o sunta enyena naa inoo nkeek. Naajoki ninye nanu, “Nena ina misa natii dukuya Olaitoriani.”

²³Ore ilo gilata liatua tenebo ine wueji sinyati neeta ake nabo kikenet naidikidiko katitin are.

²⁴Neeta nena kikeneta imatuan are, imatuan are naamanaa too eneta te pooki kikenet.

²⁵Ore te nena kikeneta e ilo gilata neguetakino ilkerubi o ltuka, anaa lelo ooguetakino nena sunta; netii ilkeek kumok oonukita ilo gilata lioriong.

²⁶Netii ilusien enchoto e ilo gilata too nkaloli pokira, neikodoki nena sunta too lkeek lo ltukai.