Read MAASAI REVISED PROTESTANT Esekiel 43 Bible Online

Esekiel 43 - MAASAI REVISED PROTESTANT bible

Esekiel 43

¹Ore te siadi naayau ninye nanu kishomi, ina kishomi naipirare enkalo o loosaen.

²Eeuo enkitoo e Nkai e Israel eing'uaa enkalo oloosaen; ore oltoilo le lotunoto enye netiu anaa oltoilo loo nkariak kumok; newang'u enkop te nkitoo enye.

³Ore ina duaata natoduaa, netiu anaa enduaata apa natoduaa apa ina kata nalotu aidaikie ina anasa, netiu anaa enduaata apa natoduaa te mbata o lkeju le Kebar; nabatata te nkomom ai.

⁴Ore ejing'ita enkitoo o Laitoriani atua ina aji e Nkai eimu ina kishomi natii enkalo o loosaen,

⁵naadumu nanu Enkiyang'et ailepie, naayau atua olgoriet liatua; neiputa enkitoo o Laitoriani ina aji e Nkai.

⁶Ore eitashe ilo tung'ani te mbata nanu, naning obo laairorie nanu tiatua enkaji e Nkai; naajoki ninye nanu,

⁷“Enkerai e tung'ani, ore ene wueji naa ewueji olorika lai le nkitoo, naa ewueji oo ndapi oo nkejek aainei, ewueji namany tiatua iltung'ana le Israel intarasi. Nemeitoki aekata enkaji e Israel aaisarkionie enkarna ai Sinyati, nemeitoki ninche, aashu ilaiguanak lenye, teina kiborra enye oo nkonyek, o too mpopoki oo laiguanak lenye ootuata

⁸eitasheyie ineeidong'ishoreki enye te wueji ai neidong'ishoreki, o ntaloishin e kutuk aji enye te mbata oo ntaloishin e kutuk aji aainei, metaa esuntai ake natii erishata e nanu o ninche. Eisarkionie ninche enkarna ai sinyati teilo minong otaasa ninche, metaa atumuta nanu ninche te ngoro ai.

⁹Inchoo taata eitalamaa ninche enkiborra enye oo nkonyek o mpopoki oo laiguanak lenye ootuata aaitalamaa te nanu, naa kamany nanu atua ninche intarasi.

¹⁰“Ore iyie, nakerai e tung'ani, toliki ina aji e Israel enkaji e Nkai o enaikununo o enaikununi, peyie etum aatukurru too ntorrok enye.

¹¹Naa tenaa kekurru te pooki nataasa ninche, imbalie enkaji e Nkai, enkitobirata enye neeipang'ieki, o ineejing'ieki enyena o pooki kitamanyunoto enye nintayiolo ninche pooki nkiguanat enye o nkitanapat enyena pooki; ninger ninche edolita, peyie etum aatujurru neibung inkitanapat pooki tenebo nkiguanat pooki.

¹²Ena ninye enkitanapata e Nkaji e Nkai: ina kop pooki namanita te shumata e ilo doinyo keaku enasinya oleng. Ing'ura ajo ena ninye enkitanapata e nkaji e Nkai.

¹³“Kuna ninche ntemeta o lperere lo lasar too ntemeta adoru (entemet e nkaina nalulung'a o ndapasho enkaina.) Ore entonata enye naa keaku entemet e nkaina nabo eilep naa entemet e nkaina nabo endapasho, tenebo enkamanaa nabo namanita osegel lenye. Naa ena ninye naaku enkadori olperere lo lasar.

¹⁴Ore eiteru te ntonata enkop o metabaiki enkedet enye e abori, naa intemeta are e nkaina, neeta endapasho e ntemet e nkaina nabo; ore eiteru te nkedet kiti o metabaiki enkedet sapuk, naa intemeta ong'uan e nkaina, neeta endapasho entemet enkaina nabo.

¹⁵Ore ewueji e nkima o lperere lo lasar, naa intemeta ong'uan e nkaina; ore epuku te wueji e nkima o lperere lo lasar eilep shumata naa imowuarak ong'uan entemet nabo e nkaina eilep.

¹⁶Ore ine wueji e nkima o lperere lo lasar naa keaku kerisioro pooki intemeta tomon aare e nkaina enkadoro, naa intemeta tomon oaare e nkaina endapasho.

¹⁷Ore sii ninye enkedet naa kerisioro te pooki aloli, intemeta e nkaina tomon oong'uan enkadoro, naa intemeta e nkaina tomon oong'uan endapasho, neeta enkamanaa namanita ninye olpisiai le ntemet e nkaina endapasho, ore entonata enye naa entemet nabo e nkaina emanita. Ore inkedeta e ilo perere lo lasar neipirare enkalo o loosaen.”

¹⁸Naajoki Olaitoriani nanu, “Enkerai e tung'ani, inji ejo Olaitoriani Enkai: Kuna ninche inkitanapat naaipirta olperere lo lasar: Ore teina olong naitasheyieki ninye peyie eitaini olasar opejori te shumata ninye o pee ebukokini osarge shumata ninye,

¹⁹inchoo ilo apolosani loo Lawi lo lmarei le Sadok, ilo laanyikaki nanu aaisiai, ejo Olaitoriani Enkai, inchoo oloing'oni meitainyie olasar le ng'oki.

²⁰Naa iya iyie embata osarge lenye, nipik ninye nena mowuarak ong'uan o lperere lo lasar, nipik ilpijat oong'uan le nkedet, nipik ina amanaa aitaman neaku neijia inko tinimpok olperere lo lasar aitisiny, nintayu olning'o lo sotua te ninye.

²¹Iya sii ilo oing'oni lo lasar le ng'oki, nepeji ninye teine wueji negeluno e nkaji e Nkai, tiauluo ine wueji nesinya.

²²Ore te nkolong e are nintayu oloro lemeeta entioto te nkaraki olasar le ng'oki; naa keipoki olperere lo lasar, anaa apa peyie eipoki te ilo oing'oni.

²³Ore peyie indip aipoo ninye, nintayu oloing'oni lemeeta entioto o lmeregesh oing'uaa intare nemeeta entioto.

²⁴Ninchooyo ninche te dukuya Olaitoiriani, naa keisuaaki ilapolosak emunyan shumata ninche neitayu ninche anaa olasar opejori aitaiki Olaitoriani.

²⁵Ore too nkolong'i naapishana, naa intayu anaake enkine te nkaraki olasar le ng'oki, tenebo oloing'oni o tenebo olmeregesh oing'uaa intare, lemeeta entioto, ninye eitaini.

²⁶Neitayu ninche olasar lo lning'o lo sotua too nkolong'i naapishana te nkaraki olperere lo lasar aipok ninye aitisiny, neiteng'elakini ninye.

²⁷Ore peyie eishu kuna olong'i, neaku ore te nkolong e isiet nepuo dukuya aaitayu ilapolosak to lperere lo lasar lelo asarri linyi oopejori tenebo ilasarri linyi le seriani, naa kang'amaa intae, ejo Olaitoriani Enkai.”