Read MAASAI REVISED PROTESTANT Esekiel 47 Bible Online

Esekiel 47 - MAASAI REVISED PROTESTANT bible

Esekiel 47

¹Naariku nanu arrinyu oriong e kutuk aji e nkaji e Nkai; nadol epuku enkare tiabori ine neitasheyie enkaji e Nkai te nkalo oloosaen (amu ore enkaji e Nkai neipirare oloosaen); neruko enkare abori naing'uaa kopikop o eneitasheyie ina aji e Nkai, kopikop olperere lo lasar.

²Naaipang'unye ninye nanu te nkalo e kishomi e kopikop, naarik nanu aitaman oriong ina kishomi e oriong, ina naipirare enkalo oloosaen; nepuku enkare te nkalo e kopikop.

³Ore eloito enkalo o loo saen eeta enkopito te nkaina enye, netem ilo tung'ani intemat enkaina enkalifu nabo, naarik nanu aimie atua ina are; naa oloure kokoyo ebaiki eng'uton enye.

⁴Neitoki atem intemat enkaina enkalifu, naarik nanu aimie atua enkare; naa enkung'u ebaiki eng'uton, neitoki atem intemat enkalifu, naarik nanu aimie atua enkare; nebaiki empolos ai ina are.

⁵Neitoki atem intemat enkaina enkalifu, naa olkeju lemaidim aima atalang'a, amu eilepua enkare; ekegut apa oleng enaa indim aisompirayu[14] tiatua olkeju lemelang'ayu.

⁶Naajoki ninye nanu, “Enkerai e tung'ani, itoduaa iyie ena?” Naarriny nanu aimie enkiyopata o lkeju.

⁷Ore arrinyo, nadol te nkiyopata olkeju ilkeek kumok te nchoto nabo o te nkae.

⁸Naajoki ninye nanu, “Ore ena are nerukokino enkalo enkop oloosaen, nelo arukokino atua Araba; ore peyie ejing atua nkariak nemeruko e naiposha, nesilayu ina are.

⁹Ore pooki wueji neim ilo keju naa keishu impukunot pooki o ng'uesi o sinkir. Neitaa ilo keju inkariak e naiposha naaisukut inaasila, neaku meye hoo toki teine nerukokino ilo keju.

¹⁰Ore lelo arreshok loo sinkir neitashe te nkiyopata enaiposha; eiteru te En-gedi, ometabaiki Eneglaim, keaku ewueji neidapashieki irresheta; ore isinkir lenyena naa keaku iloo mpukunot kumok, anaa isinkir le naiposha kitok.

¹¹Kake ore olng'arua o lkishankual lenye; nemesila asidanu ekeing'uaa ninche metaa emunyan.

¹²Ore too nkiyopat o lkeju too lkekuno pokira lo lkeju, naa kebulu impukunot kumok oo lkeek aaku endaa. Metoyu mbenek enye aashu elau ilng'anayio lenye, kake keiu ilng'anayio sidain te pooki apa, amu ore ina are enye nerukunye aing'uaa ine wueji sinyati. Ore ilng'anayio lenye naa keaku ile ndaa ore imbenek enye neaku olmairo[15] oishiunye olorere.

¹³“Inji ejo Olaitoriani Enkai: Kulo ninche ilpolosien laa ninche iorie enkop te njung'ore tiatua lelo oshon loo Siraeli tomon aare. Ore Yosef naa ketum irubat are.

¹⁴Naa ior iyie ninye aitoris; ainosa apa olmumai ajo kaisho ninye iloo papaai linyi, naa keaku ena kop te intae enjung'ore.

¹⁵“Keaku ena olpolosie leina kop: ore te nkalo e moikuape, eiteru te Naiposha kitok te nkalo enkoitoi e Hetlon, o metabaiki ine nejing'ieki e Hamat, o te nkalo e Sedad, o Berota,

¹⁶o Sibraim (ina natii olpolosie orish Dameski o Hamat) o metabaiki Haseratikon, ina natii olpolosie le Hauran.

¹⁷Metaa kepuku olpolosie le naiposha e Hasarenon, ina natii moikuape olpolosie le Dameski, tenebo olpolosie le Hamat o meshomo moikuape. Keaku ena enkalo e moikuape.

¹⁸“Ore te nkalo oloosaen, naa kepuku olpolosie te Hasarenom te rishata Hauran o Dameski; eimaa Yordan te rishata e Gilead o enkop e Israel; o meshomo enkalo oloosaen enaiposha o metabaiki Tamau. Keaku ina enkalo oloosaen.

¹⁹“Ore te nkalo e kopikop, naa kepuku te Tamar o metabaiki nena ariak e Meribatkadesh, o meshomo lelo motioo le Misiri, o metabaiki enaiposha kitok. Keaku ina enkalo e kopikop.

²⁰“Ore te nkalo o loontoluo, ore ina aiposha kitok neaku ninye olpolosie o metabaiki ewueji enkae alo ine nejing'ieki Hamat. Keaku ina enkalo oloontoluo.

²¹“Neaku iorioro ena kop tiatua intae te risioroto oo loshon le Israel.

²²Idung'okiki ate metaa enjung'ore te ntae o tenebo ilomon oomanya atua intae netoiutuo nkera tiatua intae. Keaku ninche te intae olayioni oino loo layiok le Israel; ore tenebo intae naa keishori enjung'ore tiatua iloshon le Israel.

²³“Ore te pooki ake ninye osho omanya ilo omoni, neaku teine idung'okiki ninye enjung'ore enye, ejo Olaitoriani Enkai.