Read MAASAI REVISED PROTESTANT Esekiel 6 Bible Online

Esekiel 6 - MAASAI REVISED PROTESTANT bible

Esekiel 6

¹Aairorie Olaitoriani naajoki:

²“Enkerai e tung'ani, intorioki enkomom ino enkalo oo ldoinyio le Israel, nimbonoki agilunore ninche,

³nijo: intae lo doinyio le Israel, entoning ororei lo Laitoriani Enkai! Inji ejoki Olaitoriani Enkai ildoinyo o ndoinyo o lashepak o nong'ot: Ore nanu enkewan ai naa kayau olalem shumata intae, naar ainyal iwuejitin inyi neeika.

⁴Ore ilpereren linyi naa kemijoonu, ore ilpereren le nkorropil inyi naa kegili; ore lelo linyi ootaraki metuata nanang'aa ninche te dukuya inkitanyaanyukot inyi oo nkaitin.

⁵Naa kairragie lelo seseni ootuata loo ltung'ana le Israel te dukuya inkitanyaanyukot enye oo nkaitin nemeishu; naidapash iloik linyi aitaman ilpereren linyi loo lasarri.

⁶Ore pooki wueji nimanyimanya naa kemijoonu nkanas inyi nemuti iwuejitin inyi neeika, metaa ore ilpereren linyi loo lasarri neaku ile pesho netumutaki, negili aabelibel inkaitin naaguetuno inyi nemeishu, nedung'i ilpereren linyi le nkorropil aauroo, nejutori isiaaitin inyi.

⁷Nebatatakino ilkumok ootuata atua intae, niyiolouu aajo kara nanu Olaitoriani.

⁸“Naa kaleku ilkuti linyi eishu. Neaku iatata too loshon ilekunot ooilanya ilo alem, naa teneidapashi intae too nkuapi,

⁹neaku ore lelo linyi ooilanyishote naadamu nanu te lelo oshon oowaita ninche aitaa iyarunot, ina kata atigila iltauja lenye lemaairuk naaing'uaa nanu, naitamodok inkonyek enye nena naaibelekenyakinote to lng'uarra nena kitanyaanyukot enye oo nkaitin; naa keibayu te nduaata enye maate nena torrok naataasa o lminong lenye pooki.

¹⁰Naa keyiolou ina kata aajo kara nanu Olaitoriani; eitu airo te mpesho inchere kaitaas ena torrono ninche.”

¹¹Inji ejo Olaitoriani Enkai: “Entoosh inkaik inyi, nioshieshie nkejek inyi enkop nijojo, Aha! Ore te nkaraki ina bae o lminong le nkaji e Israel; amu kebatata ninche to lalem o lameyu o lmeitai.

¹²Ore ilo olakua oleng naa keye to lmeitai; ore ilo otaana nebatatakino olalem; ore ilo otelekua neitajewuoki naa keye to lameyu. Neaku neijia aikunaki engoro ai napi ninche.

¹³Niyiolouu aajo kara nanu Olaitoriani, ina kata eirragaa impopoki enye tiatua inkaitin naaguetuno enye nemeishu emanita ilpereren lenye, te shumata pooki doinyo oodo o too nchumat pooki oo ldoinyo o tiabori olchani pooki onyori o tiabori pooki shani dapashi mbenek o te pooki wueji ake neitainye esong'uana narropil aaitaiki inkaitin naaguetuno enye nemeishu.

¹⁴Naa kaitorioo enkaina ai agilunore ninche, naitaa enkop mitil naitomijoon, too manyishoritin enye pooki, eiteru to lpurkel o meshomo Ribla. Ina kata eyiolou ninche aajo ara nanu Olaitoriani.”