Read MAASAI REVISED PROTESTANT Esekiel 7 Bible Online

Esekiel 7 - MAASAI REVISED PROTESTANT bible

Esekiel 7

¹Nelotu ororei lo Laitoriani enatii naajoki:

²“Ore iyie nakerai e tung'ani, inji ejo Olaitoriani Enkai ajoki enkop e Israel: Enkiting'oto! Eewuo enkiting'oto shumata ilpijat pokira oong'uan le nkop.

³Etabawua taata enkiting'oto shumata iyie, naa kabolu engoro ai meeu shumata iyie naa kaaiguanare iyie anaa enaikununo inkoitoi inono; naa kaaitame iyie to lminong lino pooki.

⁴Nimikileku iyie enkong'u ai, nemaata olng'ur; kake kaaitame iyie te nkaraki nkoitoi inono, ina kata etii olminong lino atua iyie. Ina peyie iyiolouu aajo ara nanu Olaitoriani.

⁵“Inji ejo Olaitoriani Enkai: ‘Emutata nasuju emutata!’ Ing'ura, neina nalotu.

⁶Etabawua enkiting'oto, eewuo enkiting'oto; kitudumakine ninye iyie agilunore. Ing'ura elotu.

⁷Eewuo emutata enitii iyie, oi intae oomanya ina kop; etabawua enkata, etinyikua ina olong enkolong enkishirata neme enkolong nabuakuni too nchumat e lelo doinyo.

⁸Ekayau aitasieku engoro ai shumata intae, nayaki intae engoro ai napi, agilunore intae, naiguanare intae te risioroto oo nkoitoi inyi; naa kaitame intae to lminong linyi pooki.

⁹Nemeleku enkong'u ai, nemaata nanu olng'ur, ekaitame intae te risioroto oo nkoitoi inyi, ina kata etii olminong linyi pooki atua intae. Ina pee iyiolouu aajo kara Olaitoriani oitameisho.

¹⁰“Ing'ura, ina olong! Ing'ura elotu ninye! Eewuo emutata inyi, eitapuka imbaa e nkikonya, etubulutua ilukuny olwuasa.

¹¹Etubulua enkikonya aaku eng'udi oo ntorrok; meetae obo lenye oleku, aashu ninye enkumoi enye, aashu enkarsisisho enye; nemeitokini aata te ninche oloituruku.

¹²Etabawua enkata, etinyikua enkolong. Mincho ilo oinyang'isho eshipa, aashu olamirani eishir, amu etii engoro napi atua olorora lenye pooki.

¹³Amu merrinyunye olamirani arrinyokino ina natimira, eton eishu ninche amu etii engoro napi sapuk shumata olorora lenye pooki; nemerrinyo siadi; naa ore te nkaraki ing'ok enyena, meeta oloidim aitasheiki enkishui enye.

¹⁴“Etoosho ninche esekekua nerretena pooki; nemeeta obo lenye olo olarrabal, amu etii engoro ai napi shumata olorora lenye pooki.

¹⁵“Etii olalem auluo, netii olmeitai o lameyu atua boo. Ore pooki ng'ae otii atua enkurma neye to lalem, ore pooki ng'ae otii atua enkanasa nemuat olameyu o lmeitai.

¹⁶Naa teneilanyisho ake ninye obo loo lekunot, naa kepuo ildoinyo, anaa nturkuluoni oo nong'ot, eishir pooki, eishiraki pooki ng'ae intorrok enyena.

¹⁷Ekelepori nkaik e pooki ng'ae, neshalu nkung enye anaa enkare.

¹⁸Neishopoki ate ilkuniyiani, neitoipoo ate to lkirutoto; netii enkurruna inkomomi enye pooki, nemetii ilpapit ilukuny enye pooki.

¹⁹Naa kenang'aa enkosholai enye too nkoitoi naalala e nkanasa, ore saabu enye netiu anaa entoki naiduruk; ore enkosholai enye o saabu nemeidim aaitajeu ninche teina olong engoro napi o Laitoriani; meitaraposh ninche esumash enye aashu eiput inkoshuaa enye te ninye. Amu endapidapoi apa ina narror ing'ok enye.

²⁰Ore imasaa enye sidain naaishopo te nkisisa e pesho, neitobiru inkitanyaanyukot oo loipi lo lminong o ntokitin enye pooki torrok metaa kaitaa entoki naiduruk te ninche.

²¹“Naa kapik ninye inkaik oo ltung'ana leeiking'a metarresho ninche aaibung naisho ilarruok mewaita ninche; naa kepuo aaisarkionie ninye.

²²Ekaiwuang'ie enkomom ai aitung'uaa ninche, peyie etum ninche aaisarkionie ewueji ai e tipat; ejing ilaikonyak atua neisarkionie ninye,

²³neitaa olmuaate. “Ore amu kebore enkop esesekuanare o sarge; nebore enkanasa entorroni enkikonya,

²⁴naa kayau nena kuapi torrok oleng meibung'a aaya inkajijik enye; ekaiting'ie ilo wuasa lenye le ngolon, ore wuejitin enye sinyat neisarkionieki.

²⁵Ore tenebau emion, naa keing'oru ninche eseriani, nemetum ninye.

²⁶Kelotu emutata nasuju ae mutata, nelotu olkilikuai leme sidai asuju olikae, neing'oru ninche enduaata to loiboni le Nkai, kake eisha enkitanapata to lapolosani, neisha enkikoo too lpayiani.

²⁷Neishir olaiguanani neiting'o osiligi lo ltung'ani kitok, ore inkaik oo ltung'ana oopeny enkop neikirikira te nkuretisho sapuk. Ekaitaas ninche te risioroto oo nkoitoi enye, o terisioroto oo nkiguanat enye ekaiguanare ninche, naa keyiolou aajo kara nanu Olaitoriani.”