Read MAASAI REVISED PROTESTANT Daniel 1 Bible Online

Daniel 1 - MAASAI REVISED PROTESTANT bible

Daniel 1

¹Ore to lari liokuni le nkitoria e Yohoiakim olaiguanani le Yuda, nelotu Nebukadnesa olaiguanani le Babilon, Yerusalem nemuat ninye near.

²Neishooyo Olaitoriani Yohoiakim olaiguanani le Yuda apik atua inkaik enyena, te nebo embata oo masaa e nkaji e Nkai, neyau ninye ninche enkop e Shinari atua enkaji e Nkai enye, nepik nena masaa e wueji neshumieki ntokitin e tipat e nkai enye.

³Neitoki olaiguanani aitanap Ashpenas, ilo aitasheikinoni lenye kitok sunash ogelema, pee eyau embata oo ltung'ana le Israel, lelo le nkaji e nkitoo o lelo kituaak,

⁴ilbarnot lemeeta leyiat, shaati[1] naa arriyiak te ng'eno pooki nagut, ooishoro eyiolounoto, o enkibung'ata e nkiteng'enata, oodupa te nkisiayiare e nkaji o laiguanani, pee eiteng'eni ninche isirat o enkutuk oo Lkaldayo.

⁵Nedung'oki olaiguanani ninche erubata e anaa ake e ndaa sidai naa ninye apa einos olaiguanani, o ene naisho oo sabibu naa ninye eok. Naa kepuoi apa aaiteng'en ninche ilarin okuni, ore te siadi ina kata nepuo ninche aaitashe te dukuya olaiguanani.

⁶Ore te kulo naa Daniel, o Hanania, o Mishael, o Asaria lo losho le Yuda.

⁷Ore ilo kitok loo laitasheikinok loo sunashi oogelema nedung'oki ninche nkarn: nejo Daniel Belteshasa, ore Hanania nejo Shadrak, ore Mishael nejo Meshak, ore Asaria nejo Abednego.

⁸Kake etumuta Daniel nchere meyieu neisarkionie kewan te ndaa o laiguanani aashu teina aisho oo sabibu apa naok ninye; neaku eikilikuana apa ninye ilo kitok loo laitasheikinok loo sunashi oogelema pee enyorraa ninye, pee meisarkionie kewan.

⁹Neisho Olaitoriani Daniel omom o lng'ur too nkonyek e ilo kitok loo laitasheikinok loo sunashi oogelema;

¹⁰nejoki ilo kitok loo laitasheikinok sunash ogelema Daniel, “Kaureisho nanu, medol ake olkitok lai olaiguanani, laa ninye likitegelaka endaa ino o entoki niok, ajo ira menati alang lelo barnot le risiori ino. Neaku ipik iyie enkishui ai batisho tialo olaiguanani.”

¹¹Neitoki Daniel ajoki ilo aitasheikinoni laa ninye apa etegelua ilo kitok loo laitasheikinok sunash ogelema meing'ura Daniel, o Hanania, o Mishael o Asaria;

¹²“Tujurro isinkan linono too nkolong'i tomon; nchoo eishori iyiook mbenek mainosa o enkare nikiok.

¹³Nitum taa aing'ura empukunoto ang o ene lelo barnot ooinos endaa sidai o laiguanani, naa ore te risioroto e mbae naba anaa enidol neijia ntaasa isinkan linono.”

¹⁴Neaku etoning'o apa ninye ninche tena bae, nejur ninche nkolong'i tomon.

¹⁵Ore te siadi nkolong'i tomon nedoli aajo ninche oopir naa biot aalang lelo barnot pooki oonya endaa sidai o laiguanani.

¹⁶Neaku eiwuang'ie ilo aitasheikinoni ina daa enye sidai o ina aisho oo sabibu apa naji pee eok ninche, neisho ninche mbenek.

¹⁷Ore kulo barnot pokira oong'uan, neisho Enkai ninche enkiteng'enata o enkarriyiano too sirat pooki o te ng'eno; neeta apa Daniel eyiolounoto too nduaat pooki o te ng'eno nagut.

¹⁸Ore te siadi ina kata, eidipa olaiguanani aitanapisho nchere meitijing'uni ninche atua aji, neyau ilo kitok loo laitasheikinok sunashi oogelema ninche atua aji dukuya Nebukadnesa.

¹⁹Neirorie olaiguanani ninche, ore te ninche pooki meetae hoo obo onotoki onyaanyukie Daniel, o Hanania, o Mishael o Asaria; neaku eitasheito ninche te dukuya olaiguanani.

²⁰Naa ore te pooki bae e ng'eno o eyiolounoto naipirta enaikilikuana olaiguanani ninche, nedol ajo kelang ninche katitin tomon ilkuyantik pooki o lasakutok ootii atua enkitoria enye pooki.

²¹Neton Daniel o metabau olari le dukuya lo laiguanani Sairas.