Read MAASAI REVISED PROTESTANT Daniel 11 Bible Online

Daniel 11 - MAASAI REVISED PROTESTANT bible

Daniel 11

¹“Ore tialo nanu te ilo ari le dukuya le Dario loo Lmede, aitasho aitisip ninye napik engolon.

²“Naa ore taata kaaitodol nanu esipata. Ng'ura keitoki aailepu laiguanak okuni te Parsia; ore oliong'uan eikarsis alang ninche pooki; ore ake pee egolu te nkaraki karsisisho enye neisisaki ninye ninche pooki metaarare enkitoo oo Lyunani.

³Neitoki adumunye olaiguanani magilani laa kelotu aitoreisho te nkitoria kitok neasisho te risioroto e yieuna enye.

⁴Ore eidipa ninye atudumunye negila enkitoria enye neoro aipir ilubot ong'uan e nkop, kake mme taa te nkaraki dupoto enye, neme te nkaraki ina kitoria naitore ninye; amu kedotuni ina kitoria enye neishori ilkulikae leme ninye.

⁵“Negolu ilo aiguanani le kopikop, kake ore obo loo lkituaak lenyena naa kegolu alang ninye ore enkitoria enye naa keaku enkitoria kitok.

⁶Ore te siadi ilarin oata esiana, neitobir ninche enchula, ore ina tito o laiguanani le kopikop nelotu enetii olaiguanani le moikuape aitayu osotua; kake mebikie engolon enkaina enye, ore ninye o eishoi enye nemebik; kake keishieki ninye, te nebo lelo ooisiai ninye, o enkerai enye o ilo ora olkitok lenye.

⁷“Ore kenya te nena katitin naa kedumunye olng'osila le ntonai enye te rishata enye; kelotu ninye aarare enjore nelo ajing osempewuet lo laiguanani le moikuape, neitainye ninche olarrabal nemirisho.

⁸Kelo sii anap aya Misiri nkaitin enye te nebo nkitanyaanyukot naaipurjuno te sarng'ab te nebo imasaa e tipat e nkosholai o ne sahabu; naa ore too larin oora esiana nepal ninye eitu eitainye olarrabal olaiguanani le moikuape.

⁹Neitoki ilo aiguanani alotu atua enkitoria e kopikop kake kerrinyo alo atua enkop enye makewan.

¹⁰“Keipiru ilayiok lenyena olarrabal neiturrur olorora kitok le njore laa keilepu alotu neimisie neim atua, nereu ninye olarrabal o metabaiki osempewuet lenye.

¹¹Ore ilo aiguanani le kopikop etagore oleng keipang'u alotu aarare ilo aiguanani le moikuape; naa kedumu ninye olorora kitok, kake keishoori ilo orora aapik atua enkaina o lmang'atinta lenye.

¹²Ore pee eyae ilo orora, neng'idayu oltau lenye newuasayu, nenang'ie ninye enkop iltung'ana nkalifuni maa tomon, kake melo ninye amirisho.

¹³Amu keitoki ilo aiguanani le moikuape adumu olorora, kitok alang ola duoo le dukuya; ore te siadi ilarin oata esiana naa kelotu ninye te nebo enjore kitok o masaa kumok.

¹⁴“Ore kenya te nena katitin naa kedumunye ilkumok aarare ilo aiguanani le kopikop; ore lelo tung'ana lo larrabal tiatua iltung'ana linono naa kerup ate pee etum aaitabai ina apa natolimuoki kake kepuo ninche aabatata.

¹⁵Kelotu ilo aiguanani le moikuape ayau eng'adunoto, neya ina ang nasheta isunta. Ore nena jorin e kopikop nemeitashe, aashu ilo orora lenye ogeluno, amu metumi engolon naitasheyie.

¹⁶Kake ore ilo olotu aarare ninye naa keas anaa enayieu ninye makewan, nemeetae oloidim aitasho te dukuya ninye; naa kelo ninye aitashe teina kop e nkishiaa, ore pooki e ina kop naa keaku atua enkitoria enye etii.

¹⁷Naa keipirakinore ninye te nkomom enye pee elotu atua enkitoria enye pooki, naa keyau ninye olning'o lo sotua neas ninche. Naa keisho ninye entito e nkitok meidaikie enkitoria, kake meitashe ninye nemetum dupoto.

¹⁸Ore te siadi neibelekenya ninye aing'or olemankale, naa kelo aya ilkumok lenye; kake kelotu likae kitok aishie ilo wuasa lenye le sulare. Ee kerrinyokino ninye ilo wuasa lenye le sulare alotu shumata ninye.

¹⁹Neitoki ninye aibelekenya alo lelo sempewueti le nkop enye, kake kelo ninye arrorro nebatata, nemeitokini aatum.

²⁰“Neitoki adumunye te rishata enye likae oirriu iladung'ok le kodi pee eirony iltung'ana te nkaraki enkitoria enye; kake too nkuti olong'i ake negila ninye, neme te ngoro aashu to larrabal.

²¹“Ore te rishata enye neitoki adumunye olomeni leitu eishori enkanyit anaa olaiguanani; kelotu ninye aluamisho neya enkitoria to losek.

²²Keiwuang'ieki njorin aaishie tukul te dukuya ninye, te nebo ilo kitok lo sotua.

²³Ore teina kata naning'oi o ninye neasisho ninye te lejare; nelo ninye agolu eeta ilkuti tung'ana.

²⁴Ore eluamisho nelotu ninye atua nene wuejitin sidain e ina kop; nelo ninye aas ina neitu ae kata eas iloomenye anaa iloo nkakuyiaa lenye, eidapash tiatua ninche imasaa o nena naataarua ninye te njore. Keipiru ninye nkiguanat pee ear isempewueti, kake te nkiti kata ake.

²⁵Naa keputu ninye engolon enye o empijan enye pee elo aitayunye olarrabal o laiguanani le kopikop eeta enjore kitok; ore ilo aiguanani le kopikop nelo olarrabal te nebo enjore kitok oleng magilani; kake melo ninye aitashe, amu keitobirakini ninye ilnukat.

²⁶Ore ninye lelo onya endaa enye sidai ninche oar ninye. Ore enjore enye neishieki, nebatata ilkumok etaraki too lalema.

²⁷Ore tialo lelo aiguanak aare neibelekenyakino ndamunot enye entorroni, neiro ninche elejare te misa nabo, kake metum toki; amu ore enkiting'oto naa te nkata natudung'uoki.

²⁸Naa keshukunye ninye alotu enkop enye eeta masaa kumok; kake ore oltau lenye eibelekenye aibayu ilo sotua sinyati. Naa keas ninye anaa enayieu, nerrinyo alo enkop enye makewan.

²⁹“Ore kenya teina kata nategeluaki nerrinyo ninye alo enkalo e kopikop; kake melo atiu teina kataa anaa enatiu apa.

³⁰Amu kepuonu imelin e Kitim aaitainye ninye olarrabal, naa keureishoyu ninye nerrinyo nelo agorokino ilo sotua sinyati. Kerrinyo ninye aning lelo ooany ilo sotua sinyati.

³¹Nelotu enjore naing'uaa ninye neisarkionie ina aji e Nkai o sempewuet neya ilo asar opejori le anaake. Neitasheiyie ninche olminong aaitaa ine olmuaate.

³²Neitapong'oo te nkilelemare lelo ooany ilo sotua. Kake ore lelo tung'ana ooyiolo Enkai enye neitashe aauno neas enkiaas.

³³Ore lelo oora olorere ng'eni tiatua olorere neidimie ilkumok metayiolo hoo naa kepuo ninche aabatata to lalem o to lng'ejep le nkima, o te yararoto o te enata, too nkuti olong'i.

³⁴Ore te nebatata ninche naa ketum enkiti retoto. Naa keibung'a ilkumok maate to lkoroj.

³⁵Ore embata e lelo oora ng'eni nebatata, pee esil neitisiny ninche neiborrie ninche, o metabau enkata e nkiting'oto, amu eton ina aa ene nkata apa nategeluaki.

³⁶“Naa keas olaiguanani anaa enayieu; kerup ninye kewan neilepie kewan aitulus te pooki ai, naa keiro ninye mbaa esulare tialo Enkai oo nkaitin. Kedupayu ninye o metaba anaa neitabari engoro; amu ore ina apa natudung'oki kepuoi aas.

³⁷Mening ninye nkaitin oo loo menye, aashu ina nanyor nkituaak; meshilaa ninye hoo ae ai, amu keilepie ninye kewan aitulus te pooki.

³⁸Keyanyitu ninye enkai oo sempewueti te rishata e kuna; ina ai neitu aekata eyiolou loo menye eyanyit ninye te saabu o te nkosholai, too soito oogol enkinyiang'a o too nkishoorot naagol enkinyiang'a.

³⁹Naa kear ninye osempewuet ogol oleng te retoto e nkai omoni. Ore lelo oonyorraa ninye neilepunye ninye ninche aisho enkanyit. Neitaa ninche ilkituaak te shumata ilkumok naa keor ninye enkop te nkinyiang'a.

⁴⁰“Ore te nkata e nkiting'oto kelotu ilo aiguanani le kopikop arasaki ninye; kake ore ilo aiguanani le moikuape ogilunore ninye anaa olemua, eeta ngarrin oo mbartan, o lakedok loo mbartan, te nebo imelin kumok; naa kelotu nena kuapi, neiput aaibulu enkop pooki.

⁴¹Naa kelotu ninye atua ina kop e nkishiaa. Ore nkalifuni maa iip tomon nebatata, kake ore kulo kekorduni aaitayu te nkaina enye: Edom o Moab o erubata kitok oo Lamori.

⁴²Keitorioo enkaina enye aarare nkuapi, ore ina kop e Misiri nemeimisho.

⁴³Neaku ninye oitore ilchumat le saabu ole nkosholai, ore nena tokitin pooki e tipat e Misiri; o ne Libia o ne Etiopia neirukurukore iroruat enyena.

⁴⁴Kake keitanyamal ninye ilomon ooing'uaa oloo saen o moikuape, naa kelo ninye te ngoro kitok napi pee einyal neidaikie ilkumok.

⁴⁵Naa kelo ninye aunoki lelo ng'oborri lenyena le nkitoo erishata e naiposha e ilo doinyo kitok sinyati; ore eyia kelotu ake enkiting'oto enye, nemetii hoo obo oret ninye.