Read MAASAI REVISED PROTESTANT Daniel 12 Bible Online

Daniel 12 - MAASAI REVISED PROTESTANT bible

Daniel 12

¹“Ore kenya teina kata naa kedumunye Mikael, ilo kitok oitore iltung'ana linono. Naa kelotu enkata e nyamali, neitu aekata etumi ebaiki apa meetae olorere o metabaiki ina kata; kake ore inakata naa kepuoi aakordu iltung'ana linono, pooki ng'ae otumi enkarna enye eigero tiatua embuku.

²Ore ilkumok le lelo ooirurate tiatua enterit e nkop neinyototo, ore kulikae nedumakino enkishui nemeiting, ore ilkulikae naa enkurruna o esulare oo ntarasi.

³Ore lelo ng'eni newang'u anaa ewang'an e shumata; ore lelo ooboiniki ilkumok enkoitoi oosipat newang'u anaa ilakir ntarasi o ntarasi.

⁴Kake ore iyie Daniel, nkeno ina buku; nimishir aiken tukul o metabau enkata e nkiting'oto. Keyooki ilkumok aakuet nekuetu, naa keponari eng'eno.”

⁵Ore nanu Daniel naing'orisho, naa ng'ura, eitashe kulikae oaare, obo tele kekun e olkeju o likae te lido kekun o lkeju.

⁶Najoki nanu ilo tung'ani oishopo too nkilani naapuyiapui, ilo otii shumata eilo keju, “Ke nkata nabaa pee ebau enkiting'oto e kuna baa e nking'asia?”

⁷Ore ilo tung'ani oishopo too nkilani naapuyiapui, ilo otii shumata nena ariak olkeju nedumu enkaina enye e tatene o enkaina enye e kedianye aipirie shumata; naning nanu ninye einos olmumai teilo oishu ntarasi nchere te nkata, o inkatitin are, o lpisiai le nkata; naa te neidip ninche aatigil engolon e lelo tung'ana sinyat aaiting'ie ore kuna baa pooki neaku eitabayioki.

⁸Atoning'o nanu kake eitu aning'u ayiolou. Najo nanu, “Olaitoriani lai, kainyoo kenya epuo kuna baa aaku.”

⁹Nejo ninye, “Shomo enkoitoi ino Daniel, amu eikenoyioki lelo rorei aaisudoo nepiki olmishire ometabau enkata e nkiting'oto.

¹⁰Keipok ilkumok ate, neiborrie ate, nesilayu; kake ore lelo arruok neasisho te nkarruisho; nemeetae obo le lelo arruok olo aning'u; kake ore lelo ng'eni naa kepuo aaning'u.

¹¹Naa ore ebaiki ina kata neiwuang'ieki ilo asar opejori anaake aaitasheyie ilo minong le mijoonisho, naa keaku nkolong'i enkalifu nabo, o iip are o ntomoni naaudo, (1,290).

¹²Emayiana ilo oanyisho nelotu nena olong'i enkalifu, iip uni o tomoni uni o miet (1,335).

¹³Kake shomo enkoitoi ino o metabau enkiting'oto; amu ilo ayeng'iyeng'a, nilo aitashe te wueji ino negeluno te nkiting'oto e nena olong'i.”